Read Huli Sebanaia 3 Bible Online

Sebanaia 3 - Huli bible

Sebanaia 3

¹Yarusaleme-o í̱ mo ko hene mbira o ngegoni. Í̱naga wali agali bu karunaga mana koore Anduane Homogonaga deni ko ngubiore bialu ka. Tigua ibunaga bi mo wahalu tininaga damene bu karu mo ko halu ka.

²Tigua Anduane Homogonaga bi hale holene mangaho howa ibugua ti mo tiga bilobi hame nale dege ka. Tigua Anduane Homogohondo mini mbiraore nawi howa ibuhondo ti biamogo bilonaga bi nale haga.

³Yarusalemenaga agali haguane hearu ti laiono gabuame tomo garibi lo howa bi hongo howa lalu kaligobi halu agali godi hale haga karu tibi nde biangome nogo ega kuniru nalu howa ai maru yawi nole ngela nabi noa dege howa nalu haraligobi ka.

⁴Mana latagi haga agali karume biabe bialu hararu henene tiga tiga bia ndo tigua maru karuhondo ke̱ howa mo ko holenaga dege bialu haya. Ani bialu kagola loma binigo mo miaga agali bu karumebi nde mbirale lomabia howa wubagi hene wiaru ilili biaga wiadagua nabi mo hilahole bialu Ngode Datagaliwabenaga bi mana ngagome tini biamogo bilonaga dege mo tiga bialu haga.

⁵Ani anigo Anduane Homogo ibu Yarusalemeha haabo ka. Ibugua mana bayale ngaru hangu biaabo haga ka. Mana ko ngaru ibu nabiagaore ka. Ibunaga wali agalime birago tiga tiga howaore mo tale biaga ka. Anigo wali agali ko tano ogoniha bu karume mana ko tiga nabi ngaru bialu haabo howa tini taga nahagaore bu kagoni.

⁶Anduane Homogohanda lalu, Hameigini dindi tara taraha hearu bo ereba hai halu i̱na tinaga tano hongohe wiarunaga wai pabe hongohe hearu bo gialo wahai haru. Tinaga ami agalirume mamage howa handa amu nana bu haga anda wai pabe neneni bu helearu bo gialo wahai harugola áyu mo ko hai hene nga. Tanoha wali agali yu wahene mbiraore hangubi nahe wialu tanoha hariga timbuni pedadagua mbirali mbira pialu kariabi nahondoleberemi.

⁷Ainde i̱naga wali agali bu karume i̱na mana bayale tigabi bialu kogo hondowa tigua i̱ andaneha halu i̱nime ti mo tiga buliya holebira mitangi bu haru. Tigua i̱naga bi mana lamirugo baya hangu minime manda bu kale nde i̱na ti mo ko nakole. Anigo tigua i̱naga bi mana lowini wiaruni mo wahai halu mana ko ngubi wiaru abale bialu haga wiago bolangua howa ko bia timbuore haga, lalu laya.

⁸Anduane Homogohanda wali agali ibunaga bi mana talialu karuhondo lalu, Tí mini dege dindiho nahalimu. I̱na wali agali dindi bibahendeha bu karu dabaki buleberogo hondole halimu. Irane i̱na wali agali dindi tara tara bibahendeha bu karuhondo keba howa mo ko hai holene manda bu henego ko. I̱na wali agali dindi tara tarani bu karu bibahende haru íbu mogo bialu ti mo ko hai helolebero. I̱naga keba holene ira hungu daradagua biragome dindi bibahende dai holebira.

⁹Ani bialu horo ogoningi i̱na wali agali dindi bibahendeha bu karunaga mini mo beregedai holebero. Ani berongi tinaga mini gahenge wia aribia ho howa i̱ hangu mitangi bialu i̱nihondo bi lalu holebira. Tinaga mini mo mbiraore howa i̱naga bi mana lowini ngaru talialu holebira.

¹⁰Ani bialu i̱naga wali agali i̱nime Sudana dindi ngagoha pu heledorubi dindi maruha pu heledorubi tigua i̱ninaga lomaru mo yalu ibulebira.

¹¹Heneneore i̱naga wali agaliru tígua i̱naga bi mo wahalu ha harimigonigo ai i̱na mbirale uruni berongi tígua mana ko bialu harimigonaga taga ho holene nawulebira. I̱nime wali agali mine halu balagala haga bu karu bo pelai holebero. Anidagua berogola tigua i̱naga hari nene biagoriani Yarusaleme tano ngogoria howa i̱nihondo lone mine naholeberemi.

¹²I̱na wali agali maru Yarusalemeha helo waholeberoru ti mbirale dewa nawi howa tini mo dindiha ho holebira. Ani howa tigua i̱ni koria ibalu i̱na ti biamogo bia lalu hale halu holebira.

¹³Isaraele wali agali yu wahene emene dagalene hangu karuni tigua wali agali tara karuhondo ko mbira nabi holebira. Ani howa wali agali tini damene bu karuhondo ke̱ halu mo hondo naholebira. Ti bayale holene hanguha kagola tinaga waitigime ti mo gi holenebi mbira nawulebira, lalu Anduane Homogo ibugua laya lene.

¹⁴Isaraele wali agaliru-o tígua turu halu iba gana hongo howa ladaba. Yarusaleme wali agaliru-o tínaga bu miniha dungulo howa turu hadaba.

¹⁵Anduane Homogohanda lalu, Tí mo ko holebero, layago áyu bi ani layagoni wahalu wahayiya. Ibugua tínaga waitigi bu hearu bo taliatagi hai hayada. Anduane Homogo Isaraele wali agalinaga kiniore kago ibu tí heba mandagi haabo kagoni. Ani kago ai tígua mbirale mbirahondo gi ho holene nawiore.

¹⁶Horo mbira tagira ibulebirago ogoni ibirangi tigua Yarusalemehondo lalu, Yarusaleme wali agaliru-o tígua gi nahe halimu. Tígua bame mogo lalu gi holene nawulebiraore.

¹⁷Anduane Homogo tínaga Ngode Datagaliwabe ibuni tí heba mandagi haabo ka. Ibunaga hongo gibiore kagome tí biamogo biragola tígua wai bialu wayali holeberemi. Wali agalirume tinaga horo timbuni wigi binigo tagira ibirangi turuho howa iba gana lagadagua Anduane Homogohanda tíhondo turu howa iba gana lolebira. Ibugua tíhondo gubaliniore ho howa mo palia holene bi lolebira, laya lalu lene. Anduane Homogohanda lalu, I̱na Yarusaleme wali agali tí mana lalu minu barugola tínaga horo timbuni lotu lole mo ngoaiho haga wimiru talialu bibe nahe kamigoni. Tígua i̱nihondo lotu lone lalu habe nahe kamigome tíni mo tagaore henego kamigoni. Anigo áyu i̱na tí lone haru dai bulebero.

¹⁹Horo ogoningi tí bope haga waitigi biaruni i̱na mo ko hai holebero. Isaraele wali agali ti nogo sibi pugu pugu biagadagua pugu pugu binigo tinaga ge ko henego tini kagoha haga haga biagadagua Isaraele wali agali dindi tara tara ngaruha pu haga haga bidamigo i̱na tíninaga dindi henene ngagoria halimulo haru dai bulebero. Áyu wali agali bu karu bibahendenaga deni howa tí taga timbuni ho kamigonigo mani i̱na tínaga taga holene uruni mo wahai halu tí mini lene helolebero. Ani heledogola wali agali dindi bibahendeha karume tínaga mini mo yaraga holebira.

²⁰Horo ogoningi tí dindi tara tara ngaruha pu haga haga bidamigoria howa i̱na tí lone gi mialu tíninaga dindini halimulo haru dai bulebero. Haru dai buwa tí mini leneore heledogola wali agali dindi bibahendeha bu karume tínaga mini mo yaraga holebira. Horo ogoningi tínaga biabe buleneru bibahende mo bayale hai helarogola tínaga holene bayaleore wulebira. I̱ Anduane Homogo i̱na bi o ledogoniore, lalu Anduane Homogohanda laya lalu Sebanaiahanda lene.