Read Huli Segaraia 13 Bible Online

Segaraia 13 - Huli bible

Segaraia 13

¹Anduane Homogo Hongo Haiheore kagome lalu, Horo uruni tagira ibirangi iba tara mbira dugualu piagobudaga halu helolebero. Wali agali Debidi aguanene bu karubi wali agali maru Yarusalemeni haga bu karubi tigua mana ko timbuniore biyarubi dama mitangi bialu gime wabini wiaruhondo bi pupu wiyarubi iba duguaraga haragonime mana ko uruni biyago bibahende domo wahai holebira, laya lene.

²Anduane Homogohanda laabo halu lalu, Horo uruniangi mbirale dama mitangi bialu bi pupu wule gime wabini dindi bibahendeha ngaru i̱na mo wahai harogola mbiralime uruni mitangi bu haabo nahe embedaho wahaiore holebira. Ani bialu ke̱ howa mbiwia halu bi mana latagi haga bu karu bibahende biba hai helolebero. Wali agalinaga mini ko ngaru mo wahai harogola tigua dama mitangi bialu bi pupu wule gime wabini ngaruhondo bi pupu wua nahe wahai holebira.

³Ani kagola mbiralime ke̱ howa mbiwia halu bi mana latagi haabo hayagua ibu aba ai̱yalame ibuhondo lalu, Í̱na bi ogoni Anduane Homogonaga bi larogo lalu henene ndo tindule lalu í̱ninaga bi hangu laregome í̱ homolebere, lolebira. Agali o biagome ke̱ howa mbiwia halu ibuninaga bi latagi hayagua nde ibuni aba ai̱yalame ibu homelo nabime nogoba halu bo waholebira.

⁴Horo uruningi bi mana latagi haga agali mbiragome de gandeba handarago latagi hole taga holebira. Anduane Homogonaga bi mana latagi hagame aga karulo hagadagua ibugua wali agali mo hondo holenaga aga ogoni karu nale holebira.

⁵Agali ogoni ibugua lalu, I̱ Anduane Homogonaga bi mana latagi haga agali ndo i̱ mabuha biabe bialu haruli. I̱ igiri emeneni howa mabu biabe biaabo haga hene kogoni, laga bulebira.

⁶Ani laragola mbiralime ibuhondo hale halu lalu, Í̱naga galu kunini motudu ngagoni agua binibe, lalu hale hayagua ibugua tihondo ke̱ howa ladai bialu lalu, I̱ nenege mbira andaga pu hewaria nogoba henego motudu ogoni, lolebira, laya lene.[3]

⁷Anduane Homogo Hongo Haiheore kago ibugua lalu, Wai biagane ayu tibu ne gadele-o í̱ heya. Í̱ heyalu agali i̱naga biabe bia halu haru haga kago babe. Nogo sibi bu karu ibida purogo lelo nogo sibi haru haga kago bo wahabe. I̱na i̱naga wali agaliru baba wai bulebero.

⁸Dindi ogoha wali agali bu karuni halu tebira mo tale buwa haluki kago bo hilo wahai halu tebonego yu waholebero.

⁹I̱na wali agali halu tebone talebu helarugo tiha ko mbira ngabe hondole ngolo silibaru bayale dodo mbira para nahe ngelonaga irani delaradagua bulebero. I̱na ani bu helowa tigua i̱ mini olaragola i̱na tinaga bi lararu hale holebero. Hale howa i̱na tihondo lamialu lalu, Tí i̱naga wali agaliore kamigoni, lolebero. Tigua nde, Í̱ Anduane Homogo inanaga Ngode Datagaliwabeore kegoni, lalu latagi holebira, lene.