Read Huli Segaraia 2 Bible Online

Segaraia 2 - Huli bible

Segaraia 2

¹I̱na de gandeba dege handalu hewaria agali mbira magi handagane pu ona yuwa mbirale luni tubagi lalu mo manda bule yu hearia handaru.

²Ani hondowa i̱na ibuhondo hale halu lalu, Í̱ ani porebe, laru. Ani larugola ibugua ladai bialu lalu, I̱na Yarusaleme tano ngagonaga lunaga magibi aranenaga magibi ogobida lo manda bulenaga magi hondole poro, laya.

³Ani layagola handalu hewaria dahuliyali i̱la bi lalu haribago ibu emene amura pialu hearia dahuliyali mende ibu piyagoha ibalu lola haya.

⁴Lola hayagola dahuliyali ala ibiyago ibugua dahuliyali mende mani ibiyago lamialu lalu, Í̱na gerai lalu puwa agali mbirale magi handaga pu yu haragohondo lamialu, Yarusalemeha wali agali dewaorebi nogo bulumaga dewaorebi ho dame bu holebirago ai tano ogoni timbunioredagola tigua tanonaga pabe bibe nahe holebira.

⁵Ani bu holebirago ai Anduane Homogo ibuni ira hungu ale bialu Yarusaleme tanonaga wai pabe kagoha howa ibunime tano ogoni handayaho holebira. Ani howa ibuni Yarusalemeha haabo kagola ibunaga wá taraore holenebi hongo timbuni holenebi wiame hai holebira lamibe, lalu lamini.

⁶Anduane Homogohanda ibunaga wali agaliruhondo lalu, I̱na tí dindi tara tara wiaruha talu purogo lelarugonigo ai áyu Babilono tano ngago yu wahalu Yarusaleme dai bidaba, laya.

⁸Ani lowa lalu, Mbiralime tí bolene manda biyagua nde i̱ bole manda biragoni, lene. Hameigini dindi tara taraha karume Anduane Homogo ibunaga wali agali mo ko hayaru tihondo i̱na bi ogodagua lamuliya Anduane Homogo Hongo Haiheore kago ibugua i̱hondo langialu lalu,

⁹Tígua i̱naga wali agali bu karu mo ko halu barimiyagua i̱nime nde tí baba wai bulebero. Ani bialu wali agali ala tínaga garabaya biabe biaga biarunime tí mo ko halu bo wahai holebira laya lalu lamibe, lene. Ai mbirale uruni bulebira layagoore birangi wali agali bibahendeme Anduane Homogo Hongo Haiheore kago ibunime i̱ dabalu ibunaga bi ogoni latagi hole henemane pu lenedane hondolebira.

¹⁰Anduane Homogohanda laabo halu lalu, Yarusaleme wali agaliru-o i̱ni ibalu tí heba mandagi haabo holeberogonaga tígua turu howa iba gana lalu halimu, laya.

¹¹Horo ogoningi wali agali dindi bibahendeha bu karu tibi nde Anduane Homogo kagoha ibalu ibunaga wali agali dege hai holebira. Ani bialu ibuni tí heba mandagi haabo kagola tígua heneneore ibunime i̱ dabalu tí kamiria ibileneoreda lo manda buleberemi.

¹²Ani bialu Yuda wali agali ti Anduane Homogonaga dindi wiabagi hene ngagoria howa ti ibunaga deni duniniore holebira. Ani bialu Anduane Homogo ibugua tano maru ngaru gubalini hagago emene nira lowa Yarusaleme tano gubalini timbuniore ho holebira.

¹³Anduane Homogo ibu ibuni haga ngagoha howa ina kamaria ibulebirago iname ibunaga deni howa bi mbira nale ema nabi dungulo hami̱ya, lalu Segaraiahanda lene.