Read Huli Segaraia 4 Bible Online

Segaraia 4 - Huli bible

Segaraia 4

¹Dahuliyali ala i̱la bi lalu haribagome i̱ hewaria ibalu i̱ paliahondo haradagua biwaria barila haya.

²Ani buwa ibugua i̱hondo hale halu lalu, Í̱na agile dege hendedebe, laya. Ani layagola i̱na ibuhondo ladai bialu lalu, I̱na lamu hale wiagane irane mbira ngolome wabini ngaria hendedo. Lamu hale wiagane ogoninaga nguni daligahayagi ndisi be weli bedaore mo paga howa ngane hendedo. Lamu hale wiagane irane mbiraore ogoriani howa lamu karia ho gebaga bigi bidago odaruni ti hale delole iba be mbiraore ogoniha howa dege purogo lagadane hendedo.

³Ai weli be wiaga biagonaga lene mende mendehabi ira olibe kira kane hendedo, lalu dahuliyali biagohondo ladai biru.

⁴I̱na uruni hondowa ai irane agibe lalu ibuhondo hale haru.

⁵Ani hale halu hewaria ibugua ladai bialu lalu, Í̱na uruni manda nabi kebe, layagola i̱na ibuhondo ladai bialu lalu, Agali haguane-o i̱ manda nabiore kogoni, laru.

⁶Ani larugola dahuliyali biago ibugua ladai bialu, Bi ogo agali haguane Serubabele kagohondo lamibe, laya. Bi ogoni Anduane Homogohanda lalu, Í̱na biabe berego bialu í̱naga ami agali kegonaga hongonibi í̱ninaga hongonibi ndo bialu holebere. I̱ dinininaga hongo í̱ha kagome biabe berego bayale bialu holebere.

⁷Í̱ poregoha mbirale taibi hari timbuni wedarubime hapai hayaguabi i̱nime mo waholebero. Ani bialu kogola í̱na i̱naga anda gialo wahene biago lone bia dai bulebere. Anda ogoni bule pigane bialu howa anda háinaga ege to̱le̱ dunini wia maro bialu kegola wali agali tigua hondowa lalu, Anda ogoni bayaleoreda, laga bialu hongo howa ga̱ ladagadaga bialu holebira, laya.

⁸Ai Anduane Homogohanda bi mende langiyago ogo.

⁹Ibugua lalu, Serubabelehanda i̱naga anda ogoni bulenaga dindi gumuni godo tiga bialu gene wedago ibunioreme biai holebira. I̱naga anda ogoni biai kagola i̱naga wali agaliru tigua i̱nime í̱ ti karia pu layada lo manda biai holebira.

¹⁰Biabe ogoni biai nahedagola i̱naga wali agalirume tinaga bu miniha genda ho holebira. Anigo Serubabele ibugua anda pigane tenialu bulenaga pu luni anda magi manda bulenaga yu howa bialu kago hondowa wali agali tigua turu timbuni ho holebira, laya lalu dahuliyali biagome lene. Dahuliyali biagome i̱hondo lalu, Lamu karia uruninaga manane Anduane Homogonaga de karia howa dindi bibahendeore ibugua handame haga ka, laya.

¹¹Ani layagola i̱na ibuhondo hale halu lalu, Lamu hale wiagane gene mende mendehayagibi ira olibe kira kago irane agibe.

¹²Ira olibenaga magane kira olibe lininaga weli piagane baibo harigawi ngolome wabinigoha mandagi kago ogoninaga iranebi langibe, laru.

¹³Ani hale halu hewaria ibugua ladai bialu lalu, Í̱ uruni manda nabi kebe, layagola, i̱na ibuhondo ladai bialu lalu, Agali haguane-o i̱ manda nabiore kogoni, laru.

¹⁴Ani larugola ibugua lalu, Ira olibe kira ogoni libu agali kira dindi bibahendenaga Anduane Homogo kagome ibunaga biabe bilo dabalu libunaga haguaneni olibe weli odo wialu helenego ka, lalu langiya.