Read Huli Madiu 16 Bible Online

Madiu 16 - Huli bible

Madiu 16

¹Perisi agali maru hearubi Sadiusi agali maru hearubi Yasu hearia ibuwa tigua Yasuhanda mbira agi larabe hondole ibuhondo lalu, Ngode Datagaliwabehanda í̱ha howa heneneore birabe hondoloma̱ya í̱na agalime nabiagane ale mbira bia handa, lene.

²Ani layagola Yasuhanda lalu, Ni darama bialu paliragola tágua, Aiore oali gaea bulubada, laramili.

³Egerebagi haragola harini pobo darama bialu aruma haragola, Dalu ibulubada, laramili. Tágua harini hondowa ogo aleore bulubada lowa haramiligodago áyu ogoninaga birago ogo ale biarua lalu mo tale nabi kamigodago.

⁴Wali agali áyu o karu ko dege bialu Ngode Datagaliwabe mo tene nahaga ka. Tágua, Agalime nabiagane ale mbira hondoloma̱ya bia, larimibe. Nabuleyago. Yona hendelo agalime nabiagane ale mbira binigo ogoni dege walia hene mitangi bulene nga, lene. Ani lame halu bialu ibu ti hea handala pu wahalu pene.

⁵Ibunaga talima piaga biarume iba timbuni bereagoria ange abene edehayagi domade halu pu howa handalu hearia mberedi mbira nahene embeda halu pu hene.

⁶Ani biyagola Yasuhanda tihondo lalu, Perisi agalinagabi Sadiusi agalinagabi yidi ngago de hondowa bayuwa mamage ho halimu, lene.

⁷Ani layagola hale howa ibunaga talima piaga biaru tini hangume laga laga bialu lalu, Ibugua o laragoni iname mberedi mbira nahene ibirimagonaga lara, lalu hene.

⁸Yasuhanda tini hangu howa lalu heagoni manda buwa lalu, Tágua mberedi nahene ibirimada lowa lalu kamigoni agibe. Mini mbiraore emene wu kamigonida.

⁹Tá manda nabi dege kamibe. Mberedi homane duria agali daosini duriame (5,000) no karula pelo gai bu baga birugo mitangi nabi kamibe. Ani birugola ti nalu ibira hayagola nu agira hono to̱ larimibe.

¹⁰Ani buwa mberedi homane karia hangu biaru agali daosini mariame (4,000) nelo gai bu baga birugola ti nalu ibira hayagola nu agira hono to̱ larimibe.

¹¹I̱na táhondo mberedi lalu mbira nalarugo manda nabi kamigo agibe. I̱na táhondo Perisi agalinagabi Sadiusi agalinagabi yidi ngago dege de hondowa bayuwa mamage ho halimu laru, lene.

¹²Ani layagola talima piaga biarume manda bialu hearia ibugua layago tinaga mberedinaga yidi lalu ndo Perisi agalimebi Sadiusi agalimebi mana lawai hagago bayuwa de hondowa mamage ho halimu lalu layada manda bini.

¹³Ani lalu bialu Yasu ibu dindi mbira Sisaria Pilibai tanohayagi pu howa ibugua ibunaga talima piaga biaruhondo lalu, Wali agali karume Agali Hole Ibiyago ai ka lalu kabe, lene.

¹⁴Ani layagola tigua ladai bialu lalu, Marume, Baboraya biaga Yone ka, lalu marume, Elaya ka, lalu marume, Ngode Datagaliwabe mana latagi haga Yaremaiabi marubi ka, lalu laga ka, lene.

¹⁵Ani ladai biyagola ibugua tihondo lalu, Tágua nde i̱ ai ka lalu kamibe, lene.

¹⁶Ani layagola Saimono Pidahanda ladai bialu lalu, Mbirali Dabo Helenego ibulebira lowinigo Ngode Datagaliwabe haluhe kagonaga Igini í̱ore kegoni, lene.

¹⁷Ani layagola Yasuhanda ladai bialu lalu, Yone igini Saimono í̱na bayaleore lari. áyu henene larigoni dindi agali karume langiyagola ndo i̱ Aba dahuliya andaga kagome í̱ bayuwa mo manda bia halu, La, layagolaore larigoni, lene.

¹⁸Ani lowa lalu, Anigo i̱na Pida í̱ ege to̱le̱ore kegoni laro. To̱le̱ ogoriani i̱naga wali agali Ngode Datagaliwabehanda olo holebiraru mo bimaga harogola homanaga hongome giala hole bialu karu nalolebira.

¹⁹Ngode Datagaliwabehanda Handame Ho Kagonaga panga duguagane gi í̱hondo ngulebero. Í̱na dindini howa nabulene nga lo werego dahuliya andagani nde nabulene dege wulebira. Í̱na dindini howa bulene nga lo werego dahuliya andagani nde bulene dege wulebira, lene.

²⁰Ani lowa Yasuhanda ibunaga talima piaga biaruhondo lalu, Mbirali Dabo Helenego ibulebira lowinigo i̱ kogonigo mbirali nalamilimu, lene.

²¹Horo ogoningi howa Yasuhanda ibunaga talima piaga biaruhondo tigatiga aguaore bulebero lalu, I̱ Yarusalemeni puwa agali ala hene miniwi karumebi loma binigo mo miaga haguane karumebi Mana lowinigo lawai haga karumebi i̱ mo tandaga timbuniore holebira. Ani bialu tigua i̱ homelo baragola horo kiru howa tebonengi i̱ni mo heya holebero, lene.

²²Ani layagola Pidahanda Yasu haru pu bagi howa talialu lalu, Anduane Homogo-o í̱na bi laregoni agi larebe. Bulebira larigo nabilo Ngode Datagaliwabehanda biamogo bulebira, lene.

²³Ani layagola Yasu ibu beregedowa Pidahondo lalu, Dama Heyolabe í̱ i̱ kogoria nahe pu. Bi o larigoni Ngode Datagaliwabenaga ndo agalinagadago í̱na i̱naga harigani ha pai haregoni, lene.

²⁴Ani lowa Yasu ibugua ibunaga talima piaga biaruhondo lalu, Mbiralime i̱ porodagua ibua ho kayagua ibuni hame ledago mitangi nabi ibuninaga ira banga yalu i̱ talima ibulene nga.

²⁵Ogoninaga mbiralime ibuni holene ngago mo tene hayagua holene ogoni ereba hai holebira. Mbiralime ibuninaga holene wahai halu i̱ mo tene hayagua holene gahenge ibu handa walia holebira.

²⁶Mbiralime dindi bibahendeni ngaru mo tene ho kaore ibuninaga holene maro biyagua biamogo bulebirabe. Biamogo nabulebiraore. Ibuninaga holenego lone mo yu dai bule ibugua mbira bibe naheore.

²⁷Agali Hole Ibiyago ibu Abanaga wá taraore holene karulalu dahuliyali heba áyu dege daibule kago. Dai birangi ibugua wali agali bibahendeme biyadaguaore tihondo emena mulebira.

²⁸I̱na táhondo heneneore larogo maru áyu ogoria kamiru nahome haabo kamiore Agali Hole Ibiyago ibuni Handame Haga Kini howa ibiragola de hondoleberemi, lalu lene.