Read Huli Madiu 17 Bible Online

Madiu 17 - Huli bible

Madiu 17

¹Horo waragaru howa Yasuhanda Pidabi Yamese Yone libu hamenela henego haru halu tini hangu hole hari mbira timbuni weagoria haru iraga ho hene.

²Ani howa tigua handalu hearia Yasu ibuni mo tara halu ibunaga dengui biago mo tara dege howa ni hanuni howa daragola wá taraore haraligobi halu aga biago pele dege bialu taraore demborerebi hearia de hendene.

³Ani de hondowa talima piaga tebira biarume handalu hearia Mosese Elayala Yasu baba te lalu hearia de hendene.

⁴Ani lalu heagola Pidahanda Yasuhondo lalu, Anduane Homogo-o ina ogoria kamagoni bayaledago i̱na anda nemanda mbira í̱naga mende Mosesenaga tebone Elayanaga lowa tebira hame lareyagua bia holebero, lene.

⁵Pida ibu wene bi lalu heaore beraliba pele taraore demborerebi ti heagoria tiga tiga ibuwa beraliba biagoha howa bi la dali halu lalu, I̱ Iginiore ogoni gubalini ho kogo ibugua bi larago hale halimu, lene.

⁶Bi ani layuago hale howa Yasunaga talima piaga biarume mogo timbuniore lowa dindini bulu palu wigi wigi bini.

⁷Ani bu wiaria Yasu ibuwa ela halu lalu, Gi nahe heyadaba, lene.

⁸Ani layagola ti dengala howa handalu hearia mende nahe Yasu hangu hearia hendene.

⁹Ti harini howa dalialu howa Yasuhanda tihondo hongo howa lalu, De gandeba ale áyu handarimigoni mbirali nalami Agali Hole Ibiyago tongolo muwa mo heya haragola dege lamilimu, lene.

¹⁰Ani layagola ibunaga talima piaga biarume Yasuhondo lalu, Mana lo winigo lawai haga karume Elaya ibu ala ibulebira lalu kago irane agidabe, lene.

¹¹Yasuhanda ladai bialu lalu, Bibahende mo manda manda bulenaga Elaya ibu ala ibulebiraore.

¹²Anigo i̱na tá langerogo Elaya ala ibiya. Ibiyagola wali agali hearume ibu manda nabi tinime ibuhondo bua biyadagua bialu haya. Ani bialu hayadagua dege Agali Hole Ibiyagohondo tigua nde mo tandaga dege holebira, lene.

¹³Ani layagola talima piaga biarume tihondo bi o laragoni baboraya biaga Yonenaga laralo manda bu hene.

¹⁴Ti wali agali bu heagoria dai bialu hearia agali mbirame Yasunaga wanakuihayagi ibuwa ge duli hanga ho biruwa

¹⁵lalu, Anduane-o i̱ iginihondo dara howa biamogo berene. Ibu biango bibi biaabo halu dindini pilaga bialu marungi ibu ira dedagohabi ibahabi pilaga biaga.

¹⁶Ani biyagola i̱na í̱naga talima piaga biaru hearia haru ibirugola tigua ibu mo bayale nahabeheya, lene.

¹⁷Ani layagola Yasuhanda ladai bialu lalu, Wali agali tá mini mbiraore nawi howa mini pu tara ho haabo kamigoni. I̱na tá kamiruha horo agiru haabo holiyadabe. I̱na tá heba howa horo agiru tánaga genda yu haabo holiyadabe, lene. Ibugua ani lowa lalu, Igiri biago i̱ kogoria haru ibidaba, lene.

¹⁸Haru ibiyagola Yasuhanda dama biagohondo, Tagira pu, layagola igiri biago helalu dama tagira piyagola igiri biago bayaleore hene.

¹⁹Ani biyagola ibunaga talima piaga biarume ibuni hangu hearia ibuwa lalu, Iname dama wara tagi nahabehe kamago agidabe, lene.

²⁰Yasuhanda tihondo ladai bialu lalu, Tágua mini mbiraore emene wu kamigome dama wara tagi nahabehe kami. I̱na táhondo heneneore larogo ira masada egene emeneore ngago ale mini mbiraore wu harimiyagua hari wedagohondo lalu, Ogoriani howa amugoria pu, laramigola ibu amugoha polebira. Ani buwa mbirale marubi ta nabi bibehe holeberami, lene. [

²¹Anigo mbirale mbira beramigome ndo tomo nane howa Ngode Datagaliwabehondo bi laramigo hangume dama ogonibi wara tagi holene nga; lene.]

²²Talima piaga biaru Galilini mandagi ábu ngoai hayagola Yasuhanda tihondo lalu, Agali Hole Ibiyago agalihondo minu mulene tu haruagoni.

²³Minu mialu tigua ibu homelo baragola horo kiru howa tebonengi ibuni mo heya holebira, lene. Aniore layagola nde ibunaga talima piaga biarume daraore howa dugupeore ho hene.

²⁴Yasubi ibunaga talima piaga biarubi Kabaniama anda piyagola Ngode Datagaliwabenaga anda dagisi muni miaga hearume Pida hearia ibuwa lalu, Í̱naga lawai haga kagonime Ngode Datagaliwabenaga anda dagisi muni wiagabe, lene.

²⁵Ani layagola Pidahanda lalu, E̱ wiagaore, lene. Ani lowa Pida ibu andaga piyagola Yasuhanda ala lalu, Saimono-o í̱na agi manda bu kebe. Dindi bibahende hangu hangu ho ngarunaga kini karuhondo dagisi muni miradago aiwabe. Dindi uruninaga wali agalirumebe be dindi tara howa ibinirume miagabe, lene.

²⁶Ani layagola Pidahanda ladai bialu lalu, Dindi tara howa ibinirume miaga, lene. Yasuhanda ladai bialu lalu, Anidago dindi uruninaga wali agalirume dagisi muni mulene nawidagoni.

²⁷Anigo iname o karuni mo pila holene hame nale kamago í̱na iba timbuni bedagoha puwa wena pu iba bedagoha bape habe. Wena pinagane baregonaga ne hanganeha muni kuni mbira yulebirago ogonime Ngode Datagaliwabenaga anda dagisi muni i̱nagabi í̱nagabi wulene karula polebira. Kuni ogoni mo yalu iyanaga dagisi muni wule pobe, lene.