Read Huli Madiu 18 Bible Online

Madiu 18 - Huli bible

Madiu 18

¹Horo uruningi talima piaga biarume Yasu hearia ibuwa lalu, Ngode Datagaliwabehanda Handame Ho Kagoria bolangua howa handape ho kago aibe, lene.

²Ani layagola Yasuhanda igiri emene mbira olowa tinaga wanakuihayagi helowa

³lalu, I̱na táhondo heneneore larogo tágua mini mo beregedalu igiri emene ogobi naharimiyagua Ngode Datagaliwabehanda Handame Ho Kagoria anda napoleberami.

⁴Mbirali ibuni mo dindiha halu waneigini ogobi hayagua Ngode Datagaliwabehanda Handame Ho Kagoria ibu bolangua howa duniniore ho holebira.

⁵Ani buwa mbiralime i̱naga minini howa waneigini emene ogobigohondo, I̱la habiya ábu, layagua i̱hondobi i̱la habiya ábu lara, lene.

⁶Mbiralime waneigini ogonibigo i̱hondo mini mbiraore wu kago hado wahelo ko mo bia hayagua ege to̱le̱ timbuni ngago pume ibunaga mani pongo bia howa iba timbuni bedagoha ibame nelo bape holene bayale nga.

⁷Wali agalime i̱hondo mini mbiraore wu kago hada hole bialu wahelo dindi bibahendeni mbirale bu payabu ngarume ani biagagonaga dara emene ndoore ho kogoni. Mbirale uruni horo bibahendengi ani bia ho wiaabo holebirago mbiralime ti ko mo bia haragonaga pani emene ndoore nolebiragonaga dara ho kogoni.

⁸Í̱na i̱hondo mini mbiraore wu kego hado wahabelo í̱naga gi mendegomebi ge mendegomebi ko mo bia hayagua mendego gandulo wahabe. Gi gebi kirabali howa ira dalude daabo ho ngagoria penego nde kogo gi gebi mbiraore hangu howa haabobo holene ngagoria anda polene bayale nga.

⁹Í̱na i̱hondo mini mbiraore wu kego hado wahabelo í̱naga de mendegome ko mo bia hayagua halu wahabe. De kirabali howa heli dindi ira dalude daabo ho ngagoria penego nde kogo de mbiraore hangu howa haabobo holene ngagoria anda polene bayale nga, lene.

¹⁰Tágua waneigini emene o karunibi mbirago handabe manga nahe bayuwa de hondo halimu. I̱na tá langerogo waneigini uruninaga dahuliyali karuni ti i̱ Aba dahuliya andagani kagonaga deni haabo haga ka. [

¹¹Agali Hole Ibiyagome wali agali pu ereba heneru pele mule ibini; lene.]

¹²Ani lowa lalu, Agali mbirame nogo sibi handari mbira (100) hinu kagola mbirago pu ereba hayagua agi bulebirabe. Ibugua nogo sibi pira dirani dira (99) biaru bareni tani nelo helalu mbira pu ereba hayago tai bu polebira.

¹³I̱na tá langerogo ibugua nogo sibi ogoni handa walia howa maru pira dirani dira (99) pu ereba nahe karunaga turu kagobi ndo o biagonaga turu timbuniore holebira.

¹⁴Ogonidaguaore tá Aba dahuliya andagani kagome nde emene o karunibi mbirago pu ereba helo hame naleore ka, lene.

¹⁵Í̱ hamene mbirame í̱hondo ko biyagua ibuni hangu karia puwa ko biyagonaga libuni hangu howa lo tiga bilibu. Ibugua í̱na bi larego hale hayagua í̱na ibu haru dai birigoni.

¹⁶Í̱na bi laregola hale habe manga hayagua í̱ heba kirali tebirali agima puwa Anduane Homogonaga mbugani lo ngadagua, Ko ogo birigo larago kiralibi tebiralibi hendene karume aniore biya lelo, lo ngadagua haru puwa lo tiga bilimu.

¹⁷Ani beramigolabi o biagome hale habe manga dege hayagua wali agali Ngode Datagaliwabehanda olo holebiraru ngoai ho biru ngagoria hale hai helo bibahende biyagoni lamiai habe. Wali agali o biarunime bi laragola hamene biagome hale habe manga dege hayagua nde ibu Ngode Datagaliwabe mitangi nabiaga karubi kago lowa dagisi muni miaga karubi kago lowa o biaruhondo birilidagua ibuhondo ani bibe, lene.

¹⁸Anigo i̱na tá bibahendehondo langerogo tágua dindini howa mbira nabulene nga lalu lo weramigo dahuliya andaganibi nde nabulene dege wulebira. Tágua dindini howa mbira bulene nga lalu lo weramigo dahuliya andaganibi nde bulene dege wulebira.

¹⁹Anigo i̱na táhondo bi marubi langi dege berogo. Dindini howa kiralime bi lo mbiraore howa Ngode Datagaliwabehanda mbirale mbira ogo bilo lalu Ngode Datagaliwabehondo bi larimiyagua i̱ Aba dahuliya andagani kagome hale halu bia laramigo ale bulebira.

²⁰Ogonigo kirali tebiralime i̱ minini howa mandagi mo ngoai ho kagoha i̱ ti heba kogoni, lene.

²¹Ani layagola howa Pida ibu Yasu hearia ibuwa lalu, Anduane Homogo-o i̱ hamene mbirame i̱hondo ko bia ho wiaabo hayagua i̱na agira halu domo waholene ngabe. Ka halu domo waholene ngabe, lene.

²²Ani layagola Yasuhanda ladai bialu lalu, Ka halu ndo. Domalu haabo habe.

²³Irane Ngode Datagaliwabehanda Handame Ho Kagoria ogobi nga. Ala kini mbirame ibunaga biabe bia haga baba dano ho henego mo tiga bule bini.

²⁴Ibugua mo tiga buleore biyaria ibunaga biabe bia haga mbirala muni au lole daga labe nahe dewaore dano ho henegome haru ibini.

²⁵Biabe bia haga ogonime kini biagonaga muni dewa dano ho hayiyago dano hangalu ya dai bibe nahe hene. Aniyagola kini biagome agali maruhondo lalu, Ibubi ibu onebi ibu waneiginibi ibunaga mbirale ngarubi muni dano hangai helo garabaya biabe ale bia haganaga yolo muni miai halimu, lene.

²⁶Ani layagola hale howa biabe bia haga biagome kini biago bereagoria ge duli hanga ho biruwa lalu, I̱na í̱naga biaruni dano hangai holiya emene hondo habe, lene.

²⁷Ani layagola nde kini biagome daraore timbuni howa dano dewa hayagoni la nabi, Wahalu pu, lene.

²⁸Ani laya handala agali biagome puwa ibula mandagi biabe bia hagame agali ogoninaga muni mbiraore dano henego hearia lola howa mani yani howa lalu, I̱naga muni dano harigoni ngi, lene.

²⁹Ani biyagola muni mbiraore dano haga biagome ibu geha bulu paluwa hame lowa lalu, I̱na ya dai biai holiya emene hondo habe, lene.

³⁰Ani layagola danoali biagome, Nabuleorego áyu dege ngi, lowa ibunaga muni dano ho hayago ya dai biragolaore golope hole lowa garabaya andaha helaabo hene.

³¹Ani biyagola biabe bia haga maru hearume nakarulapeore biyago hondowa tinaga kini biago hearia pialu biyaruni bibahende lamiai hene.

³²Ani lamiyagola kini biagome biabe bia haga biago, ábu, lowa lalu, Í̱ garabaya biabe ale bia hagane habane nabulenedago í̱na i̱naga dano ho harigo howa biamogo bialu la nabi waha larigola la nabi hila hole bialu waharugo.

³³Í̱na nde i̱na í̱ dara halu hila hole birudagua í̱ yangone ogoni dara halu la nabi hila hole bialu waharine, lene.

³⁴Ani lowa kini biagome keba emene ndoore howa ibunaga dano ho hayaru bibahende ya dai biai haragola golope hole lowa, Biabe bia haga biago garabaya andaha helaabo hole haru pudaba, lene.

³⁵Yasuhanda la maro bialu lalu, Tá aria marume táhondo ko biragola hila hole bialu henemane wa naharimiyagua i̱ Aba dahuliya andagani kagome nde tá bibahendehondo ogonidaguaore bulebira, lene.