Read Huli Madiu 21 Bible Online

Madiu 21 - Huli bible

Madiu 21

¹Yasubi ibunaga talima piaga biarubi ti Yarusaleme anda polene kaware ngelowa Hari Olibe weagoria Bedabayani anda ibini. Anda ibuwa Yasuhanda ibunaga talima piaga kiralihondo,

²Ogodagua bule bamba halu pudaba, lowa lalu, Dindi amugoha anda bu kagoria anda pialu kabiria nogo dongi igini angibuni dariba howa iginila halu karia de hondoleberabigo hadalu kirabali i̱ kogoria haru ibalibu.

³Hadarabigola libuhondo mbirame aginaga hadarabibe layagua agua lalibu. Anduane Homogo ibu ogonioreme mbira bulene buru padane hadaraba, lalibu. Ani larabigola ibugua, Abale haru pudaba, lolebira, lene.

⁴Binidagoni Ngode Datagaliwabe mana latagi haga mbira henegome mbiwia halu lowinigo mo lola hene. Bi lowinigo ogo,

⁵Saiono wali agali karuhondo lalu, Tánaga Handame Haga Kini biago tá kamigoria ibiragoni de handadaba. Ibuni mini mo dindiha halu nogo dongini biralu ibiragoni. Ibu dongi hungubalua mbirani biralu ibiragoni, lalu gilibu nga.

⁶Ani laya handala talima piaga kira biago labome Yasuhanda, Bilibu, layadagua bule pene.

⁷Libugua nogo dongi biago labo haru dai buwa aga nogo dongi biago labo erekunini dungua hayagola Yasu ibu nogo dongi igini biagoria iraga ho berene.

⁸Ani bereagola wali agali dewaore bu hearu marume tinaga aga harigani dungua haga bialu marume ira magane yuni dewahe dandowa harigani tebara haga bini.

⁹Wali agali dewa bu hearume Yasu pole piyagohayagi bamba halu piyarumebi maha ibiyarumebi awa lama pialu howa lalu; Debidi Igininaga mini yaraga hama. Anduane Homogonaga minini howa ibirago Ngode Datagaliwabehanda ibu mo turu helo larama. Ngode Datagaliwabenaga mini yaraga hama; lalu lama pene.

¹⁰Yasu ibu Yarusaleme anda piyagola wali agali bu hearume mogo lo hondowa laga bialu lalu, O ibiragoni aibe, lene.

¹¹Ani layagola wali agali bu yalu ibiyarume ladai bialu lalu, Ogoni ibu Ngode Datagaliwabe mana latagi haga Nasareteali Yasu Galili howa ibiragoni, lene.

¹²Yasu ibu Anduane Homogonaga andaha anda puwa marume tamuha howa mbirale yolo bialubi yolo mulebi hearu bo ba tagitagi bialu hene. Ibugua muni ariari biaga hearunaga dagiabi ega malibu ale yolo biaga hearunaga biragane wiarubi mo hombeda haealabagabu wahai hene.

¹³Ani bialu howa lalu, Ngode Datagaliwabehanda ibunaga mbugani bi lo ngago ogo, I̱naga anda kago i̱hondo bi lagane anda kagoni lolebira, lalu gilibu nga. Tágua nde pagebibi karu ha do hagane anda bu hinu helarimidagoni, lene.

¹⁴Ani layagola howa de kohebi gi ge kohebi Anduane Homogonaga andaha Yasu hearia ibiyagola ibugua ti mo bayale haga bini.

¹⁵Ibugua agalime nabiagane ale biyago hondowa waneigini emene bu hearume Anduane Homogonaga andaha howa turu halu mambolo balu lalu, Debidi Igininaga mini yaraga hama, layagola hale howa loma binigo mo miaga haguane hearumebi Mana lowinigo lawai haga hearumebi keba hai ho hene.

¹⁶Keba howa tigua Yasuhondo lalu, Tigua laragoni ogo ale laralo í̱ hale ho kebe, lene. Ani layagola Yasuhanda ladai bialu lalu, E̱ i̱ hale hoore kogoni. Anduane Homogonaga mbugani bi mbira lo ngagome, Waneiginirumebi waneigini galiorerumebi Anduane Homogonaga mini baya hanguore mo yaraga helo biawai hari, lalu gilibu ngago tá nahendeore kamigonibe, lene.

¹⁷Ani lalu ti hea handala Yasu ibu Yarusaleme tagira pialu Bedani palima pene.

¹⁸Horo mendengi Yarusalemeha dai bialu hearia Yasu ibu hina garibi lene.

¹⁹Garibi layagola handalu hearia ibu poge mbira hariga gibuniha hearia de hondowa lini dedabe nadedabe hondo pene. Hondo piyaria lini mbira nade yuni hangu ma bu hearia hendene. Nadeyagola ibugua poge biago ha halu lalu, Í̱na mani lini mbira nadoleore bere, lene. Ani layaore poge biago abale yongo bialu gau lene.

²⁰Ani biyagola talima piaga biarume mogolo hondowa lalu, Poge biago abale yongo bialu gau layadagoni aguadabe, lene.

²¹Ani layagola Yasuhanda tihondo ladai bialu lalu, I̱na táhondo heneneore larogo miniha toba toba nahe mini mbiraore wu harimiyagua i̱na áyu poge ogohondo larudagua táguabi ani labehe holeberami. Ani buwa homane ogoni hangu ndo tágua hari hombene o wedagohondo, Í̱nime dugualu puwa iba solowara bedagoria ibiraha, labehe holeberami. Ani laramigola hari biagome hale halu ani bulebira.

²²Tágua Ngode Datagaliwabehondo bi lalu howa mini mbiraore wuwa larimiyagua bia laramigo bulebira ngi laramigobi ngiaore bulebira, lene.

²³Yasu ibu Anduane Homogonaga andaha lone dai buwa ibugua mana lawai halu hearia loma binigo mo miaga haguane hearubi agali ala hene miniwi hearubi ibuwa tigua ibuhondo lalu, Í̱na mbirale uruni bialu kegoni hongo aiwa ngiyane berebe. Ani bibelonaga í̱ aiwa dabo helenego kebe, lene.

²⁴Ani layagola Yasuhanda tihondo ladai bialu lalu, I̱na bi mbira táhondo hale harogo tágua ladai birimiyagua i̱na mbirale uruni buliya hongo ngiyadagoni ogome ngiya lalu tá langulebero.

²⁵Yonehanda baboraya biyago bulene hongo miyago Ngode Datagaliwabehanda minibe be agalime minibe, lene. Ani layagola tigua, Agi ladai bimabe, lowa tini dege dege laga laga bialu lalu, Iname Ngode Datagaliwabehanda mini larimayagua ibugua inahondo lalu, O Yonehanda mana langiyago yu tiga nabi harimidago agibe, lolebira.

²⁶Iname agalime mini larimayagua wali agali bibahende o biru ngarume Yone ibu Ngode Datagaliwabe mana latagi haga hayago lagago manda buwa tigua inahondo mbira buligonaga gi ho kamagoni, lene.

²⁷Ani lowa tigua Yasuhondo lalu, Ina manda nabiore kama, lene. Ani layagola Yasuhanda tihondo lalu, Anidago nde i̱na mbirale uruni berogo buliya hongo ngiyadago nalangulebero, lene.

²⁸Yasuhanda lalu, Tágua agi manda bu kamibe. Bamba agali mbira henego ibu igini kira hene. Agali biagome ibu igini wahene biagohondo lalu, Igini-o áyu ogoni mabuni puwa biabe bialu habe, lene.

²⁹Ani layagola igiri wahene biagome lalu, I̱ mangaba, lowa mani howa mini wia dai bialu biabe bule pene.

³⁰Ani bialu agali biagome ibu igini heyogonego hearia puwa ibuhondobi bi ala layadagua dege lene. Ani layagola igiri heyogone biagome ladai bialu lalu, E̱ aba-o bule porogo, lowa bule pu nabi wahene.

³¹Agali biagome bilo hame layadagua ibu igini agome hale halu binibe, lene. Tigua ladai bialu lalu, Ibu igini wahenegome bini, lene. Ani ladai biyagola Yasuhanda tihondo lalu, I̱na tá langerogo dagisi muni ngi laga karubi bayanda wali kayu bule muni ngi laga bedarubi tá helalu bamba halu Ngode Datagaliwabehanda Handame Ho Kagoria anda poragoni.

³²Ogoninaga baboraya biaga Yone ibugua ibuwa tá hariga tiga tigaore pilimulo walia hayagola tágua yu tiga nabi harimigoni. Dagisi muni ngi laga karumebi bayanda wali kayu bule muni ngi laga bedarumebi Yonehanda mana lamiyago yu tiga biya. Urunime ani biyagola tágua hondowa mini beregedalu Yonehanda mana langiyago yu tiga nabi dege harimi, lene.

³³Yasuhanda lalu, Bi yobage mende ogo nde hale hadaba, lene. Ani lowa lalu, Bamba dindi anduane mbirame pu mbira gerebi lini daganego dewa hongo dugudugu buwa gerebi ibane pingidope holenaga ege to̱le̱ha uli guabuwa wini. Mabu mamage holenaga anda luni daliga bima iraga howa helene. Ani buwa ibugua agali maruhondo, Mabu biabe bia halu hondo ha halimu, lalu ibuni dindi mbiraha ibaga bialu pene.[1]

³⁴Pu mbira lini daga mini gerebi dolene tu hayagola mabu anduane biagome ibunaga garabaya biabe ale bia haga maruhondo lalu, I̱naga gerebi mabu hondo ha haga karuhondo lini maru do ngidaba lole pudaba, lene.

³⁵Ani laya handala ti pialu hearia mabu hondo ha haga biarume garabaya biabe ale bia haga biaru mbira minu balu mende to̱le̱me balu tebone homelo balu bini.

³⁶Ani biyagola anduane biagome garabaya biabe ale bia haga abale pu layadagua ndo mani dewaore pudaba layagola pialu hearia mabu hondo ha haga biarume abale bayadagua dege bene.

³⁷Mahaore anduane biago ibuni igini mbira henego mitangi bialu lalu, I̱ igini ogoni pu larogola tigua ibu mitangi bialu ibuhondo tiga tiga bulebira manda bido, lene.

³⁸Ibu igini piyagola mabu hondo ha haga biarume hondowa tigua laga laga bialu lalu, Mabu anduane biago iginiore ogonigo ibunaga paluni ina karulami̱ya homelo bama; lowa

³⁹tigua mabu tagirahayagi minu ba tagi howa homelo bene, lene.

⁴⁰Ani lowa Yasuhanda tihondo lalu, Ani biyagola anduane biagome ibuwa mabu hondo ha haga biaruhondo agi bulebirabe, lene.

⁴¹Tigua ladai bialu lalu, Ibugua ibuwa mabu hondo ha haga agali koore uruni homelo bo wahai howa mabu ogoni marume lini dolene tu harangi do tale bu ngulebirago tihondo, Mabu hondo ha halimu, lalu mulebira, lene.

⁴²Ani layagola Yasuhanda tihondo lalu, Anduane Homogonaga mbugani bi longago nahende hene kamigonibe. Ege to̱le̱ mbira anda biagame galone nabibehedago lowa dabo wahenego ege to̱le̱ ogoniore mo timbuni duniniore heleda. Ogoni Anduane Homogo ibunioreme mo yu dai bu helenego iname de handalu handawa bu kamagoni, lalu gilibu nga, lene.

⁴³Yasuhanda laabo dege halu lalu, Anigo i̱na táhondo larogo Ngode Datagaliwabehanda Handame Ho Kago tá kamigoria howa mo yalu puwa wali agali marume Ngode Datagaliwabe mana tigabiore biragohondo mulebira, lene. [

⁴⁴Ege to̱le̱ ogoni ngagoriani wali agali pilo paga hararu to̱le̱ ogonime ti bibahendeore budu baga bu waholebira. Ani buwa ege to̱le̱ ogonime mbiralini podo dambi hayagua dambu gingirulo baga bu waholebira, lene.]

⁴⁵Loma binigo mo miaga haguane hearumebi Perisi agali hearumebi Yasuhanda bi yobage layago hale howa, Yobage laragoni inahondo laragoni, lowa

⁴⁶tigua Yasu minule manda biyaria wali agali bu hearume Yasu ibu Ngode Datagaliwabe mana latagi haga ka laga lalu hea handala gi howa wahene.