Read Huli Madiu 23 Bible Online

Madiu 23 - Huli bible

Madiu 23

¹Ani lowa Yasuhanda wali agali dewaore bu hearuhondobi ibunaga talima piaga biaruhondobi mana lamialu lalu,

²Mana lowinigo lawai haga karumebi Perisi agali karumebi ti Mosese heneyangi Mana lowinigo mandabi heneru tigua bi lo ngago ogo ale lo nga lalu laga ka.

³Ani biagago tigua larago hale halu bidaba laradagua buleneore nga. Anigo tigua mana langiragonaga bu manda nabiagago ti biradagua tágua bulemini.

⁴Tigua wali agalime gendabi nayabehe ngaru yu helo mo ya ho helaga. Ani buwa tinime gi dogolowa gendabi ngaru yamogo nabiaga ka.

⁵Ani buwa tigua bibahende biraru wali agalime ti hendelo biaga ka. Ani buwa nogo dongone aleni Anduane Homogonaga mbugani bi polene ngaru gili buwa tinaga embonenibi tinaga ginibi bo bidago handalimu. Nogo dongone uruni timbuniore bo bidago handalimu. Tigua labolabo lu karulowa mbirale bayale ale ngaru labolabo ogoriani pingi pongo buwa girigerelo heledago handalimu.

⁶Ani buwa tigua tomo nole ngoai haragoriabi ngoai hagane andaruhabi agali haguanenaga biraganeni hangu birule gere biraga kago handalimu.

⁷Ani buwa tigua ibaga bialu magedi hamani wali agalime ti hondowa tinaga mini yaraga helobi tihondo, Lawai haga-o, lelobi hame laga ka.

⁸Tá kamiruhondo, Lawai haga-o, lolene nawi irane tá mbiraore hamenema kamigo tánaga Lawai haga mbiraore hangu kagoni.

⁹Ani buwa dindi ogoriani kago mbirahondo, Aba, lolene nawiore irane Aba mbiraore hangu ibu dahuliya andaga kagoni.

¹⁰Táhondo, Haru haga-o, lolene nawiore irane tánaga haru haga Mbirali Dabo Helenego ibulebira lowinigo ibuni hangu kagoni.

¹¹Tá kamigoria mbirali timbuni bolangua howa dunini hoa kago ibu tánaga biabe bia haga holeneore nga.

¹²Mbirali ibuni mo dunini ho kago ibu mo dindiha halu mbirali ibuni mo dindiha ho kago ibu mo dunini ho helolebira, lene.

¹³Yasuhanda lalu, Mana lowinigo lawai hagabi Perisi agalibi tá tombene hondo kihe kamigoni. Tágua Ngode Datagaliwabehanda Handame Ho Kagoria táni anda pu nabi howa wali agali marume anda pole biraria tinaga wanakuini howa panga paya pai haramili. Anigo tánaga mo ko holene timbu gibiore wulebirago dara holene nga. [

¹⁴Ani buwa tágua wali dalo bedarunaga andaga mbirale ngaru mo page biaga howa wali agali mo hondo hole Ngode Datagaliwabehondo bime dege bi lu laho wiaabo haga kamigoni. Ani beramigonaga pani timbuniore ngia tago howa mulene nga. Anigo tánaga mo ko holene timbu gibiore wulebirago dara holene nga.]

¹⁵Mana lowinigo lawai hagabi Perisi agalibi tá tombene hondo kihe kamigoni. Tágua mana beramigore mbiralime yu tiga bilonaga dindi kaundiaha dindi dindi pialu iba taluni biralu poramili. Mbirali biagome tánaga mana yu tiga bu kagola tágua ibu mo ko timbuniore hai halu tá heli dindiha polene nira lowa ibu polene liraore wulebira. Anigo tánaga mo ko holene timbu gibiore wulebirago dara holene nga.

¹⁶Tá dengalibi degeme dengalibi karu hariga i̱na hendedogo mbaibu lowa gililo yalu pialu kamiru tánaga mo ko holene timbu gibiore wulebirago dara holene nga. Tágua lawai haramigo ogo. Mbiralime Anduane Homogonaga anda mini lalu gi dolayagua i̱na larogoni heneneore laro lo wuwa ibuni bi laragonime ibuni dariba naholebira. Mbiralime i̱na larogoni heneneore laro lo wuwa Anduane Homogonaga andaha ngolo ngagonaga mini lalu lo wiyagua bi ogoni lo wiyagome ibuni dariba holebira, lalu lawai haramili.

¹⁷Tá dengalibi mini nawi lulu yu ibaga bu kamigoni. Duniniore ngolo wiabe be Anduane Homogonaga anda ngolo Ngode Datagaliwabehondo loma bia ho ngelaganego duniniore wiabe.

¹⁸Tágua mana mende lawai haramiligo ogo. Mbiralime Ngode Datagaliwabehondo mbirale bo lomabu miaga dagia ngago mini lalu i̱na larogoni heneneore laro lo wiyagua ibuni bi ogoni lo wiyago bame nagalone lowini. Mbiralime mbirale Ngode Datagaliwabehondo bo lomabu mini dagiani ngagonaga mini lalu i̱na larogoni heneneore laro lo wiyagua ibuni bi ogoni lo wiyago habo nalolene bi lowini, lalu lawai haramili.

¹⁹Tá dengalibiore kamigoni. Duniniore mbirale Ngode Datagaliwabehondo minigobe be bo lomabu miaga dagia mbirale Ngode Datagaliwabehondo minigo mo loma bia haga biago duninibe.

²⁰Anigo mbiralime bo lomabu miaga dagiago mini lalu heneneore laro lo wirangi ibugua mbirale bibahende Ngode Datagaliwabehondo bo mini lomabu miaga dagiani ngarubi heba mini lara.

²¹Ani buwa mbiralime Anduane Homogonaga anda mini lalu heneneore laro lo wirangi ibugua Anduane Homogonaga anda ogoniha haga kagobi mini lalu lo wira.

²²Ani buwa mbiralime dahuliya andaga mini lalu heneneore laro lo wirangi ibugua Ngode Datagaliwabenaga haru howa biraganebi biragane ogoriani mbirali biragagobi mini lalu lo wira.

²³Mana lowinigo lawai hagabi Perisi agalibi tá tombene hondo kihe kamigoni. Tágua tomo mo dende bia hagane palena ale tara tara hangarimigo pini pini Ngode Datagaliwabehondo loma bia halu muwa Mana lowinigo duniniore ngagonaga mo tiga bulenebi dara howa biamogo bulenebi tigabi holenebi yu tiga nabi kami. Tágua mana uruni bialu howa maru wa nahe mandagi bimaga howa bulene nga. Anigo tánaga mo ko holene timbu gibiore wulebirago dara holene nga.

²⁴Tá dengalibi degeme dengalibi karu hariga i̱na hendedogo mbaibu lowa gililo yalu pialu kamigoni. Tágua tánaga iba beha hinabibi ale emene koore bedago na nabi mo waharamili. Ani buwa nogo kamele ale mbedogo beramili.

²⁵Mana lowinigo lawai hagabi Perisi agalibi tá tombene hondo kihe kamiru tágua bo waholenebi habua bulenebi mbirale mbirale yu kamigo tánaga iba bebi beledibi habanehayagi mo to̱lai ho ngaru dodo ho ngelowa tagirahayagi hangu wayawaya biaga kamigoni. Anigo tánaga mo ko holene timbu gibiore wulebirago dara holene nga.

²⁶Perisi agali de kohe kego í̱na iba be habaneha dodo agi kabe hondowa ala wayawaya biriyagua tagirahayagibi bayale dege holebira.

²⁷Mana lowinigo lawai hagabi Perisi agalibi tá tombene hondo kihe kamiru tá homali tagirahayagi hangu bayuwa kau wuwa tamuhayagi homa kuni togo buwa himi tabulo wiagago ale kamigonigo tánaga mo ko holene timbu gibiore wulebirago dara holene nga.

²⁸Ogonidagua dege tá dongone tagirahayagi wali agalihondo bayale hetingi howa tánaga bu habanehayagi tombene hondo kihe holenebi ko tara tarabi to̱laihe kamigoni, lene.

²⁹Mana lowinigo lawai hagabi Perisi agalibi tá tombene hondo kihe kamiru tágua Ngode Datagaliwabe mana latagi haga bamba heneru hora henegoria anda bayale bialubi agali mini bayale bamba heneru tá embeda naholenaga hora henegoria yári bayaleore bia halubi kamigonigo tánaga mo ko holene timbu gibiore wulebirago dara holene nga.

³⁰Ani buwa tágua agua lalu, Ina inanaga mamali henedangi henedale iname Ngode Datagaliwabe mana latagi heneru ti bo wahenedagua bo wa nahe kamale, laga kami.

³¹Ani lowa tágua ina Ngode Datagaliwabe mana latagi haga heneru bo wahenerunaga aguanene kamagoni lo manda buore kamigoni.

³²Ani binigo áyu tágua nde tánaga mamali henerume biala ho wiyadagoria howa bu maro bidaba laro.

³³Tá nogombibi nogombi iginibi kamigoni. Tá heli dindiha pani nole pu laragola agua pu yola holeberamibe.

³⁴I̱na tá langerogo tá kamigoria Ngode Datagaliwabe mana latagi hagabi agali mini gigabiwibi lawai hagabi pudaba larogola tágua uruni maru homelo balu maru ira bangani ba para halu maru ngoai hagane andaha karia minu balu ti dindi dindi ibida pugu pugu biragola minule talima poleberami.

³⁵Anigo wali agali bolene irane nawi howa bame homelo bayagonagabi Abele bolene irane nawi howa homelo bayagonagabi Beregaia igini Segaraia ibu Anduane Homogonaga andala Ngode Datagaliwabehondo mbirale bo lomabu miaga dagiala dombeneha hearia tigua homelo bayagonagabi uruni biyagonaga pani wali agali áyu kamirume na holeberami.

³⁶I̱na tá heneneore langerogo uruni bima penedagoni bibahendeorenaga pani wali agali áyu karume na holebira.

³⁷Yarusalemeni waliagali kamiru-o tágua Ngode Datagaliwabe mana latagi haga heneru homelo balubi Ngode Datagaliwabenaga mana lamule ibiniru to̱le̱me homelo balubi kami. Ega gogologo angibunime ibu igini ibuni tombeha mo mogo bu ngelai howa babaganeme dungu dambi hagadagua i̱na i̱naga gime wali agali bu kamiruni tá mo mogo buwa tali wu mabu bua haabo harugola tágua, Í̱na ani bia, nale harimi.

³⁸Anigo Anduane Homogonaga anda táninaga laramiligo tabuanda halu tamuha mbirali nahe helo wahalu polebira.

³⁹I̱na tá langerogo tu áyu howa be lirahayagiore mbira tágua i̱ nahende haabo howa, Mbirali Anduane Homogonaga minini howa ibirago Ngode Datagaliwabehanda ibu mo turu helo, laramingi i̱ lone de hondoleberami, lene.