Read Huli Madiu 26 Bible Online

Madiu 26 - Huli bible

Madiu 26

¹Yasuhanda mana uruni lawai hai howa ibunaga talima piaga biaruhondo lalu,

²Horo kiru hangu howa Bolangua Halu Penegonaga tomo nolene wulebirago manda bu kamigoni. Ogoningi Agali Hole Ibiyago ira bangani ba para helo minu mulebira, lene.

³Loma binigo mo miaga haguane hearubi agali ala hene miniwi hearubi ti loma binigo mo miaga haguane timbuni mini Kaiabasa andaga mo ngoai hene.

⁴Mo ngoai howa tigua Yasu ohowa minalu bo wahole lo manda bialu hene.

⁵Tigua lalu, Wali agali bu karume ina baba gungu buligo tomo nolene harangi iname ibu naminami̱ya, lene.

⁶Yasu ibu Bedani howa Saimono ge hamua mbira ala ibugua mo dabi henegonaga andaga pu berene.

⁷Yasu ibu tomo nalu berearia wali mbirame weli ngabi baya muni dewaoreme yolo buwa beha berelo winigo mo yalu ibuwa Yasunaga haguaneni odo wia hene.

⁸Wali biagome ani biyagola Yasunaga talima piaga biarume hondowa keba halu lalu, Bame oda hole biragoni agidabe.

⁹Weli ngabi baya ogoni muni dewa mulene ngago midale muni mirago yagibano karuhondo talebu ta kaleda, lene.

¹⁰Tigua ani layago manda buwa Yasuhanda tihondo lalu, Wali ogome birago nabi waha laramigo aginagabe. Ibugua i̱hondo o biyagoni bayaore biya.

¹¹Wali agali yagibano karu tá heba mandagi haabo kamigoni. I̱ tá heba mandagi haabo naholebero.

¹²Wali ogome weli ngabi baya i̱naga tinginini odo wia hayagoni nde i̱ hora holebiragonaga manda bialu biyagoni.

¹³Anigo i̱na táhondo heneneore laro. Bi Mana Debene ogoni dindi bibahendeha lamialu howa ibugua i̱hondo biyago mitangi bu dai bialu te ogoni loyogo lolebira, lene.

¹⁴Ani biyagola howa Yasunaga talima piaga homberiali (12) heneru mbirago mini Yudasa Isagariodo henegome loma binigo mo miaga haguane hearu hearia puwa

¹⁵lalu, I̱na Yasu táhondo ndelo ngiruyagua tágua i̱ agi nguleberamibe, lene. Ani layagola agali biarume muni kuni pira tebira (30) daga lowa Yudasa mini.

¹⁶Ani miyagola Yudasahanda ogoningi howa Yasu minu mulene henge aguaore ngabe hondole tai bialu hene.

¹⁷Mberedi Yidi Nahe Hirinigo nolene horo pigane hayangi ibunaga talima piaga biaru ibuwa Yasuhondo lalu, Bolangua Halu Penego Horonaga tomo í̱ nabelo agoha manda manda bule poloma̱ya hamelo kebe, lene.

¹⁸Ani layagola Yasuhanda tihondo lalu, Yarusalemeha puwa agali mbira ogoniha holebirago ibu karia puwa ibuhondo agua lalimu. Inanaga Lawai Haga biagome lalu, I̱naga horo ha para hayadago i̱bi i̱naga talima piaga karubi ina mandagi Bolangua Halu Penego Horonaga tomo í̱ andaga noloma̱ya, laya lalimu, lene.

¹⁹Ani laya handala howa ibunaga talima piaga biarume Yasuhanda layadagua bialu tigua Bolangua Halu Penego Horonaga tomo nole manda manda bu wule pene.

²⁰Alendo tomo nolene tu hayagola Yasu ibunaga talima piaga homberiali (12) biaru heba tomo nalu berene.

²¹Tomo nalu biruwa Yasuhanda lalu, I̱na táhondo heneneore larogo. Agalime i̱ minilo tá mbiraligome nde loleberami, lene.

²²Ani layagola ibunaga talima piaga biarume mogo lowa ibuhondo hangu hangume lagalaga bialu lalu, Anduane Homogo-o í̱na o larigoni i̱ ndo lari, lalu laga laga bini.

²³Ani lagalaga biyagola Yasuhanda ladai bialu lalu, Mbirali i̱ heba ndisiha mberedi iba howa nalu bedagome i̱ minilo nde lolebira.

²⁴Anduane Homogonaga mbugani lo ngadagua Agali Hole Ibiyago homolebira. Agalime ibu minilo ndelalu walia harago ibunaga mo ko holene timbu gibiore wulebiragonaga dara holene nga. Agali ogoni ibu ai̱yahanda taba nahenedale nde bayale kaleda, lene.

²⁵Ani layagola Yudasa ndelaga biagome lalu, Lawai haga-o í̱na o larigoni i̱ lalu larebe, lene. Ani layagola Yasuhanda ladai bialu lalu, Í̱nime o laregoni, lene.

²⁶Ti tomo nalu biruwa Yasuhanda mberedi mbira yamuwa Ngode Datagaliwabehondo turu halu ka̱i̱ lowa gai bu baga buwa ibunaga talima piaga biaruhondo mialu howa lalu, I̱naga tingini ogonigo ya mialu nadaba, lene.

²⁷Ani buwa ibugua iba be yamuwa Ngode Datagaliwabehondo turu halu ka̱i̱ lowa tihondo mialu howa lalu, Ogoni tá bibahendeme no gombedalu nadaba.

²⁸Ngode Datagaliwabehanda habo nalolene bi gahenge lowinigo tene i̱naga darama ogoniha nga. Ani bidago i̱naga darama pelarogome wali agalime ko birago domo wahelo pelaro.

²⁹I̱na tá langerogo waini iba lone nane i̱ Abahanda Handame Ho Kagoria tá heba howa waini iba gahenge nolebero, lene.

³⁰Ani lai howa tigua iba gana mbira lowa tagira pialu Hari Olibe weagoha pene.

³¹Yasuhanda tihondo lalu, áyu mbiraga tá bibahendeme i̱ helalu ibida piai holeberami. Ogoninaga Anduane Homogonaga mbugani lo ngago ogo, I̱na nogo sibi haru haga kago baro handala nogo sibi karu ibida purogo lai holebira, lalu gilibu nga.

³²Anigo Ngode Datagaliwabehanda i̱ mo heya hara handala tá maha ibalimulo i̱ ala Galili bamba halu polebero, lene.

³³Ani layagola Pidahanda Yasuhondo laraga howa lalu, Ti bibahendeme ani wahalu purogo layaguabi i̱na í̱ wahalu napolebero, lene.

³⁴Ani layagola Yasuhanda Pidahondo lalu, Í̱hondo heneneore larogo áyu mbiraga ega gogologome bi naledaore í̱na halu tebo, Yasu manda nabido, lalu lolebere, lene.

³⁵Ani layagola Pidahanda ladai bialu lalu, I̱ í̱la homole howayaguabi ogonidagua naloleore bero, lene. Pidahanda layadagua talima piaga bibahende biarumebi ani dege lai hene.

³⁶Yasu ibu ibunaga talima piaga biaru heba Gedemani dindi wiagoria pu howa ibugua tihondo lalu, I̱ Ngode Datagaliwabela amugoha bi lole porotagi tá ogoria hondo biralimu, lene.

³⁷Ani lowa ibugua Pidabi Sebedi igini kirabi haru halu puwa ibu dara ho howa mini burugulo hene.

³⁸Ani biyagola ibugua tihondo lalu, Genda timbuniore i̱ha anda ibiragome i̱ garali bialu budara. Ina haru mamage howa tá ogoria hondo biralimu, lene.

³⁹Ani lowa Yasu ibu emene pu amu howa dindini bulu palu wuwa Ngode Datagaliwabehondo bi lalu, I̱ Aba-o tandaga nolene ngago nanoliya mo yalu polene ngayagua mo yalu pobe. Anigo i̱ hame ledodagua ndo í̱ hame lededagua hangu bibe, lene.

⁴⁰Ani lalu bialu ibunaga talima piaga tebirali biaru bereagoria dai bialu hearia ti palia hondo hai hearia hondowa ibugua Pidahondo lalu, Tá tebirali kamirume i̱ heba mamage emeneorebi habe nahedagola padamibe.

⁴¹Ko ngagome tá ko mo bia holigo tá bayuwa mamage howa Ngode Datagaliwabehondo bi lalu halimu. Tánaga minime Ngode Datagaliwabe hame ledamigo lowa tánaga tingini gedaore ho kamigoni, lene.

⁴²Ani lowa Yasu ibu lone puwa lalu, Aba-o tandaga nolene ngago ogoni i̱ nane howa mo yalu polene nawiyagua noleberogo í̱ni hame lededagua hangu bibe, lene.

⁴³Ani lowa Yasu ibu lone dai bialu hearia ibunaga talima piaga biaru ti dengala nahe palia hondo dege hearia hendene.

⁴⁴Ani palea handala ibugua puwa Ngode Datagaliwabehondo bi mbiraore layagobi dege halu tebone lene.

⁴⁵Ani lai howa ibunaga talima piaga biaru bereagoria dai buwa ti palearia hondowa lalu, Tá erekui dogolowa palia hondo dege kamibe. Agali Hole Ibiyago agali ko biaga karuhondo minu mulene tu kaware ha para haragonigo handadaba.

⁴⁶I̱ minilo ndelaga biago kaware o kago de handadaba. Ai heyalu ma, lene.

⁴⁷Yasuhanda bi ogoni lalu heaore ibunaga talima piaga hombeane Yudasa ibu agali dewali haru ibini. Loma binigo mo miaga haguane biarumebi agali ala hene miniwi biarumebi, Yasu minule pudaba, layagola tigua wai biagane ayu tibu kangoru yalu Yasu hearia ibini.

⁴⁸Yasu minilo ndelaga Yudasahanda ala agali biaruhondo lalu, Tá manda bilimulo i̱na walia halu mbiralinaga peni nu̱nu̱ larogo ibu minalimu, lene.

⁴⁹Ani layadagua bialu Yudasahanda Yasu heagoria hondo yalu puabo howa lalu, Lawai haga-o mo palia holene í̱ha haabo helo, lowa ibu peni nu̱nu̱ lene.

⁵⁰Ani biyagola Yasuhanda ibuhondo lalu, Hamene-o bule wiridago abale berene, lene. Ani layagola agali hayarume abale ibuwa Yasu minalu gime bayuwa yu ndibu lene.

⁵¹Ani biyagola Yasu heba hayaru mbiragome wai biagane ayu tibu yayagome loma binigo mo miaga haguane timbuni heagonaga garabaya biabe ale bia haga heagonaga hále bagadape hene.

⁵²Ani biyagola Yasuhanda ibuhondo lalu, Wai biagane ayu tibu ogoni ibuni yaganeha ya dai bibe. Mbirali wai biagane ayu tibume bole manda biyagua ayu tibume dege ibuni nde homelo bolebira.

⁵³I̱na i̱ Abahondo biamogo bia laruyagua ibugua dahuliyali ami ale dewaore ibilabehe kagoni manda nabi kamibe.

⁵⁴Ani biruyagua Anduane Homogonaga mbugani ogonidagua bulebira lo ngago agua bialu lola holobadabe, lene.

⁵⁵Ani lowa Yasuhanda agali dewa bu hearuhondo lalu, Pageali minaramilidagua tágua wai biagane ayu tibu kangoru yalu i̱ minule ibirimibe. Horo bibahendengi i̱ Abanaga andaha mana lawai halu haabo haruligo tágua i̱ mina nabirimi.

⁵⁶Anigo uruni bibahende beramigo Ngode Datagaliwabe mana latagi haga henerume Anduane Homogonaga mbugani bi lo ngadagua lola hai haragoni, lene. Ani layagola ibunaga talima piaga bibahende biaruni Yasu wahalu ibida purogo lai hene.

⁵⁷Mana lowini lawai haga hearubi agali ala hene miniwi hearubi ti loma binigo mo miaga haguane timbuni mini Kaiabasa andagaha mo ngoai ho heagoria Yasu minu yalu pene.

⁵⁸Ani minu yalu piyagola Pida ibu emene kaundia howa loma binigo mo miaga haguane timbuni heago andaga pabe tagirahayagi mayu̱lo handaga bima pene. Ibu pabe tamuha anda puwa agi birabe hondole lowa maru mamage ho hearu heba mandagi berene.

⁵⁹Loma binigo mo miaga haguane hearubi Ganisolo agali bibahende bu hearubi tigua Yasu homelo bole ibugua bini lenebi mbira agidabe handalu hearia

⁶⁰mbira nahendeore hene. Wali agali marume ke̱ howa Yasuhanda agua biya lama ibiyaru hale howabi mbira handa walia naheore hene. Mahaore agali kirame heyuwa

⁶¹lalu, Agali o kagome Anduane Homogonaga anda gialowa horo tebiru hanguni lone bia dai bulebero laya, lene.

⁶²Ani layagola loma binigo mo miaga haguane timbuni biagome heyuwa Yasuhondo lalu, Í̱hondo bi laragoni ladai bulene mbira nayi kebe, lene.

⁶³Ani layagola Yasu ibu bi nale hene. Ani hearia hondowa loma binigo mo miaga haguane timbuni biagome Yasuhondo lone lamialu lalu, Í̱hondo langerogo Ngode Datagaliwabe haabo kagonaga minini howa Mbirali Dabo Helenego ibulebira lowinigo Ngode Datagaliwabe Igini í̱yagua langi, lene.

⁶⁴Ani layagola Yasuhanda ladai bialu lalu, Í̱ ani larigoni. Anigo i̱na tá bibahendehondo laro. áyu ogoni howa be lirahayagi Agali Hole Ibiyago ibu Hongo Haiheore Kagonaga gi tigahayagi biruwa hari beralibani biralu daliraria de hondoleberami, lene.

⁶⁵Ani layagola loma binigo mo miaga haguane timbuni biagome ibuninaga aga lerelowa lalu, Ibugua Ngode Datagaliwabe mege bialu layago hale harimigo ai marume ina lamogo bia holene irane nawi.

⁶⁶Tá agi manda bu kamibe, lene. Tigua ladai bialu lalu, Ibuni ko biyagonaga homoleneore nga, lene.

⁶⁷Ani lowa tigua Yasu denguini hamiaga tolo ba halu gi habeme balu howa

⁶⁸lalu, Mbirali Dabo Helenego ibulebira lowinigo í̱oreyagua ina kamagoni manda bu ade halu í̱ bayagoni ogome baya la, lene.

⁶⁹Pida ibu andaga pabe tamuhayagi berearia loma binigo mo miaga haguane timbuni biagonaga biabe bia haga wandari mbirame ibuwa lalu, Í̱bi Galiliali Yasula mandagi hariligo, lene.

⁷⁰Ani layagola Pidahanda o bu hearuni hale hai heaore ladai bialu lalu, Í̱na o laregoni agi larebe i̱ manda nabido, lene.

⁷¹Ani lalu bialu pabe harabani puwa hearia biabe bia haga wandari mende heagome Pida hondowa agali hearuhondo lalu, Ibu Nasareteali Yasula mandagi haga, lene.

⁷²Ani layagola Pidahanda wanakui ela howa halu mende lalu, Agali ogoni i̱ manda nabido, lene.

⁷³Emeneore howa agali hayarume Pida heagoria ibuwa lalu, E̱ mbira í̱ anioreda. Í̱ni bi laregome í̱ni mo walia haragoni, lene.

⁷⁴Ani layagola Pidahanda wanakui ela howa lalu, Heneneore laro. I̱ ke̱ haruyagua Ngode Datagaliwabe ibugua i̱ pani ngilo, lalu, Agali odagoni i̱ manda nabido laro, lene. Bi ogoni layaore ega gogologome bi layagola

⁷⁵ala Yasuhanda, Ega gogologome bi naledaore halu tebo í̱na i̱ manda nabido lolebere, layago Pida ibuni mitangi bu dai bini. Ani mitangi buwa Pida ibu tagira pialu dugu emene ndoore yi lalu dugu timbuni bialu hene.