Read Huli Madiu 3 Bible Online

Madiu 3 - Huli bible

Madiu 3

¹Ani binidangi baboraya biaga Yonehanda Yudiani dindi ko yobi wali agali nahaga wiagoria howa ibalu mana lamialu hene.

²Ibugua lamialu lalu, Ngode Datagaliwabenaga Handame Holene kaware ngagonigo tágua ko birimigonaga mini beregedalimu.

³Ngode Datagaliwabe mana latagi haga Aisaiahanda ala mbiwia halu lalu, Dindi ko yobi wali agali nahaga ngagoria howa mbiralime ga̱lalu, Anduane Homogo ibilo hariga ba hole manda bialu halimu. Hariga ogoni tigabiore ba halimu, lenego lalu bi ogoni Yone mitangi bialu lenego gilibu nga.

⁴Yone ibu nogo kamele irinime aga wabinigo karulowa nogo dongoneme mandibu wuwa hene. Ibugua pagayabi mone taranaga ibanebi naga hene.

⁵Wali agali Yarusaleme howabi Yudia dindi bibahende winigo uruniha howabi Iba Yodana peagoria dindi bibahende wiagoha howabi Yone hearia ábu ngoai haga bini.

⁶Ibuwa tigua ko biyaru la pani hayagola Yonehanda Iba Yodanaha ti baboraya bini.

⁷Perisi agalirubi Sadiusi agalirubi dewali Yonehanda ti baboraya bilo ibalu hearia de hondowa Yone ibugua tihondo lalu, Tá ko nogombi ale kamigo Ngode Datagaliwabehanda pani áyuore wia holebirago nane yo poleberami lalu tá aiwa langiyabe.

⁸Tágua ko bialu harimigo wahalu mini beregedai kamigonaga irane walia hole lowa mana bayale bialu halimu.

⁹Tágua, Inanaga mamali Abarahama hene, laramiligome pani nolene ngagoria nane yo pialu poleberama, lo mitangi nabilimu. I̱na bi mbira langerogo hale hadaba. Ngode Datagaliwabehanda ege to̱le̱ o ngaruni mo yuwa Abarahamanaga aguanene bu hinu helabehe kagoni laro.

¹⁰Ira karu teneha dibule ayu mo yu ábu nga. Ira lini bayale nadaga karu bibahende dibai howa ira dedagoria dolebira.

¹¹Tágua ko birimigonaga mini beregedarimigo walia hole i̱na tá ibame baboraya biruli. Maha mbirali ibulebirago ibugua Ngode Datagaliwabe Dininimebi ira hungu ale biragomebi tá baboraya bia holebira. Ibu i̱ emene ko̱ kogobi ndo ibu daliga timbuniore kago i̱na ibunaga ge habe gamu mo ya holene nakarulape kogoni.

¹²Ibugua ladi ale mini widinaga lini aeanela dambialu mo tale bilo mbirale baraga hagane nama taboli ale yu ka. Tale biai howa ibugua widi lini do hagane andaha do hole wuwa aeane biaru ira hundia nabiaga daabo kagoria delolebira, lalu Yonehanda lamini.

¹³Horo uruningi Yasu ibu Galili howa Iba Yodana peagoha ibalu ibu Yonehanda baboraya bilo lowa Yone hearia ibini.

¹⁴Ibiyagola Yonehanda Yasu mini wia dai buwa baboraya nabule lelo ibuhondo lalu, Í̱na i̱ baboraya bia holene ngago áyu ani ndo i̱na í̱ baboraya bia holiya i̱ kogoria ibirida, lene.

¹⁵Ani layagola Yasuhanda ladai bialu lalu, áyu aniore bibelo. Mana ogoni bialu howa Ngode Datagaliwabehanda ani bulene nga ledago biaiore holeberaba, lene. Ani layagola Yonehanda, Anidago baboraya bia haro, lene.

¹⁶Yonehanda Yasu baboraya bia hayagola Yasu ibaha howa heyiyagola hari daliga buduwa Ngode Datagaliwabe Dinini ega malibu ale dalipe halu Yasuni ábu birayagola de hendene.

¹⁷Ani biyagola dahuliya andagaha howa bi mbira ladali halu lalu, I̱ Igini i̱ gubaliniore ho kogo ogoni. Ibuhondo turu timbuni ho kogoni, lene.