Read Huli Madiu 5 Bible Online

Madiu 5 - Huli bible

Madiu 5

¹Yasuhanda wali agali dewaore bu hearu de hondowa bare hari mbira weago iraga howa berene. Ani berearia ibunaga talima piaga biaru ti ibu bereagoria ibalu bira mabu bini.

²Ogoriani berearia ibugua tihondo bi mana lawai halu berene.

³I̱ miniha nakarulape ko lo mitangi bu karu Ngode Datagaliwabehanda Handame Ho Kagoria tinagaore ngago ti turu ho holene nga.

⁴Dara ho karu Ngode Datagaliwabehanda ti mo turu holebiragonaga ti turu ho holene nga.

⁵Tini mo dindiha haga bu karu Ngode Datagaliwabehanda, Ngulebero, lowinigo tigua mo yulebiragonaga ti turu ho holene nga.

⁶Ngode Datagaliwabehanda hame ledadagua bua timbuni ho karu Ngode Datagaliwabehanda tini hame larago mo to̱lai holebiragonaga ti turu ho holene nga.

⁷Wali agali maruhondo dara howa biamogo biaga karu Ngode Datagaliwabehanda ti dara howa biamogo bulebiragonaga ti turu ho holene nga.

⁸Mini gahengewi ko bua nahaga karu tigua Ngode Datagaliwabe de hondolebiragonaga ti turu ho holene nga.

⁹Mo palia holenenaga biabe bialu karu Ngode Datagaliwabehanda tihondo, I̱ waneigini, lolebiragonaga ti turu ho holene nga.

¹⁰Ngode Datagaliwabehanda hame ledadagua bialu howa tandaga nalu karume Ngode Datagaliwabehanda Handame Ho Kagoria tinaga ngago ti turu ho holene nga.

¹¹Tágua i̱ porodagua talima ibalu kamigonaga wali agali marume tá mege biragolabi mo tandaga haragolabi ke̱ halu nde laragolabi mana urunibi biragola tá turu ho holene nga.

¹²Ngode Datagaliwabe mana latagi haga bamba henerume tandaga ogonidagua dege nalu hene. Dahuliya andagani tánaga emena timbuniore wia do kago turu timbuniore ho halimu.

¹³Wali agali tara tara bibahendenaga ibi ale tá kamigoni. Ibi ibuninaga dende ereba hayagua lone mo dende bia habe nahe nga. Ibi ko halu dindini waharagola wali agali geme hengedaga nga.

¹⁴Wali agali dindi bibahendeni tara tara karunaga wá holene ale tá kamigoni. Tano timbuni dindi bare hombeneni bu karu mo ge nahabehe ka.

¹⁵Mbiralime lamu delowa ndisi be timbuni ngago andaneha nawiaga. Ani biagadagua ndo anda ogoniha bedaru bibahende wá haame helo ibugua lamu dedago dagia daligani mo wiaga.

¹⁶Ogonidagua tánaga wá holene wali agalime de hendelo mo wá holene nga. Tágua mana bayale beramigo de hondowa wali agalime tá Aba dahuliya andaga kagonaga mini yaraga helonaga ani mo wá halu holene nga.

¹⁷Mosese heneyangi Mana lowinigobi Ngode Datagaliwabe mana latagi haga heneyarume mana lawai henegobi i̱na mo wahole ibiruda mitangi bidamibe. I̱na mo wahole ndo ibiru. Tigua bi lowinigo lola helonaga i̱ ábu kogoni.

¹⁸Hari daligabi dindibi wiaabo kadagua Mosese heneyangi Mana lowinigonaga bi emeneorebi mbira ereba nahe maha bibahende hamaro birangi hangu ereba holebirago manda bilimu.

¹⁹Anigo mbiralime mana uruni lowiniyaria dunini ndo emeneorerubi ngago ibuni nabi howa marumebi nabilo biawai hayagua o biago ibu Ngode Datagaliwabehanda Handame Ho Kagoria dunini maru karubi ndo ibu niraore holebira. Ani biradagua ndo mbiralime mana uruni lowiniyadagua bialu maru karumebi bilo biawai hayagua ogoni ibu Ngode Datagaliwabehanda Handame Ho Kagoria timbuni duniniore holebira.

²⁰Anidago i̱na bi mbira langero. Ngode Datagaliwabehanda mana tigabi tágua bilimulo hame ledago Mana lowinigo lawai haga karumebi Perisi agali karumebi biagadagua ndo tágua ti bolangua halu nabirimiyagua Ngode Datagaliwabehanda Handame Ho Kagoria anda napoleberami.

²¹Bambaore wali agali hearuhondo bi laminigo ogo, Wali agali homelo nababe. Mbiralime ogonidagua biyagua godi lolene wulebira, lalu bi ogoni leneyago tá hale harimigoni.

²²Anigo áyu i̱na táhondo agua laro. Mbiralime ibu hamenehondo keba hayagua ogoninaga godi lolene wulebira laro. Agali mbirame ibu hamenehondo, Í̱ habane nabulene kegoni, layagua ibubi o layagonaga ganisolo agali kagoria haru polebira. Agali mbirame ibu hamenehondo, Í̱ koore mini nawi ke, layagua o layagonaga heli dindini ira dedagoria polene henge ibunime mo wulebira.

²³Anigo í̱ mbirale Ngode Datagaliwabehondo mule bo lomabu miaga dagiani mule bereria í̱ hameneme í̱hondo mbirale mbiranaga keba ka lo mitangi biriyagua

²⁴nde mbirale mulene biago bo lomabu miaga dagia kawareni ngelalu í̱ hamene karia mo palia hole abale pobe. Mo palia halu dai buwa mbirale Ngode Datagaliwabehondo mule wirigo mibe.

²⁵Mbiralime í̱la godi lolenaga, I̱la godi labiya mba, layagua godi lagane andaha anda nape howa ibula abale mo tiga bulene manda bibe. Godi lole haru piyagua godi dabagane agali kagohondo í̱ minu mulebira. Minu miragola godi dabagane biagome í̱ dandayi gini ya haragola tigua í̱ garabaya andaha helolebira.

²⁶Ani biragola í̱na ko birigonaga yolo miaiore habelo garabaya andaha helaabo holebirago lalu langero.

²⁷Bambaore bi lowinigo ogo, Wali agali kayu nabibe, lalu bi ogoni leneyago tá hale harimi.

²⁸Anigo áyu i̱na tá langialu agali mbirame wali deme hondowa dimagoli hayagua ibugua miniha wali biagoni yaore biya laro.

²⁹Í̱naga de tigame í̱ ko mo bia hayagua halu wahabe. Í̱ tingininaga aria mbirago nahe howa holene bayale nga. Í̱naga tingini bibahende hai howa heli dindiha mo bape holenego nde koorego.

³⁰Í̱naga gi tigame í̱ ko mo bia hayagua gi ogoni gandulo wahabe. Í̱naga gi mende hangu howa holenego bayale nga. Í̱naga tingini bibahende hai howa heli dindiha polene nde koorego.

³¹Bambaore bi mende lowinigo ogo, Agali mbirame ibu one wahole manda biyagua ibugua bebani gili buwa ibu onehondo mulene nga, lalu leneya.

³²áyu i̱na tá langerogo agali mbirame ibu one agali mendela kayu biragola ndo bame wahayagua ibugua ibu one biagome agali kayu bilo mo bia hara. Agali mbiralime agali mende one wahenego dabu biyagua o ibugua wali biago kayu dege biragoni.

³³Bambaore wali agali hearuhondo bi laminiyago ogo, Bi mbira í̱na buleore lalu lo wirigo waholene nawi. Anduane Homogohondo mbirale mbira buleore bero lo wirigo bibe, lalu bi ogoni leneyagobi tá hale harimi.

³⁴Anigo i̱na áyu tá langerogo bi lo wialu howa mbirale mbiranaga mini lalu ndo wilimu. Dahuliya andaga Ngode Datagaliwabenaga handame ho biragane ngago tágua, Dahuliya andani ngadagua buleore bero, lalu nalo wilimu.

³⁵Dindini Ngode Datagaliwabehanda ibunaga ge dogolo wiaga ngago tágua, Dindi ngadagua buleore bero, lalu nalo wilimu. Yarusaleme handame haga kini timbuni kagonaga dindi ngago tágua, Yarusalemeni ngadagua buleore bero, lalu nalo wilimu.

³⁶Í̱ninaga haguani kadagua buleore bero, lalu nalo wibe. Irane ogo í̱nime mandari mbirago mo pela halubi mo mindi bia halubi nabibehe kegoni.

³⁷Tágua lalu, E̱bi ndobi dege lalu lalimu. Bi marubi larimiyagua bi o larimiruni tene dama Heyolabeha howa ibiragola larimi.

³⁸Bambaore bi lenego ogo, De mbira halu waharagonaga pani de mbira halu wahaga. Ne mbira hondo waharagonaga pani ne mbira hondo wahaga, lalu bi ogoni leneyago tá hale harimigoni.

³⁹Anigo áyu i̱na tá langerogo mbiralime táhondo ko biyagua tágua ko bia dai nabilimu. Mbiralime í̱naga pe tigahayagi bayagua pe lehayagibi belo beregedabe.

⁴⁰Mbiralime í̱ godi lole haru pialu howa í̱naga aga tingiliya ngulene nga layagua í̱naga dagare tingiliyabi tago bialu mibe.

⁴¹Ami agali tánaga dindini bu karu aria mbiragome, I̱naga togi nu mabu tu mbira poa nakeha hanalu pu layagua í̱na mabu tu ki hono bolangua habe.

⁴²Mbiralime, Mbirale ogoni i̱ ngi, layagua nde mibe. Mendealime, Ogoni ya dai buliya i̱ ngi, layaguabi nde ya dai bilo mibe.

⁴³Bambaore bi leneyago ogo, Í̱naga nenegeruhondo gubalini ho habe. Í̱naga waitigi karuhondo handabe manga ho habe, lalu bi ogoni leneyago tá hale harimigoni.

⁴⁴Ani anigo i̱na tá ogodagua langerogo tánaga waitigi ho karuhondo gubalini ho halimu. Tá mo tandaga halu karu bayale helonaga tágua Ngode Datagaliwabehondo bi la halimu.

⁴⁵Ani bulene ngago irane tá Aba dahuliya andaga kagonaga waneigini hole ani bilimu. Aba ibugua wali agali ko bayalebi ta nabi kagoria ibunaga ni daame helaga ka. Ibugua wali agali ko biaga karubi bayale biaga karubi ta nabi bibahendehondo ta halu miaga ka.

⁴⁶Tá gubalini hagaru hangu gubalini harimiyagua Ngode Datagaliwabehanda tánaga emena aginaga ngulene ngabe. Dagisi muni ngi laga karume ti nde ani dege biaga ka.

⁴⁷Tágua tánaga nenegeru hanguhondo bi turubi larimiyagua tá mana biagane winiyadagua ndo bayale taraore mbira birimibe. Wali agali Ngode Datagaliwabe mitangi nabiaga karume tibi ani dege biaga ka.

⁴⁸Tá Aba dahuliya andaga kago ibu mini baya buruguleorewi kadagua tábi mini baya buruguleorewi holene nga.