Read Huli Madiu 6 Bible Online

Madiu 6 - Huli bible

Madiu 6

¹Tágua Ngode Datagaliwabe mitangi bialu mana beramiligo wali agali karume tá de hendelonaga ndo ti kagoria howa nabilimu. Mana ogoni wali agalinaga deni howa birimiyagua tá Aba dahuliya andaga kagome táhondo emena ngulene nawulebira.

²Mbirali buru pale kagohondo mbirale mbira mirimiyagua mine halu marume de hendelo lowa namilimu. Wali agali maru tombene hondo kihe karume ngoai hagane andahabi hariganibi ani biaga ka. Tigua wali agali marume ti mini yaraga helonaga biaga ka. I̱na táhondo henene larogo o biarume tinaga emena mulene winigo áyu dege mo yai ka laro.

³Tágua mbirali buru pale kago biamogo bule lowa tánaga nenegeru tá heba mandagi hagago manda nabilo o halu bilimu.

⁴Ani birimiyagua táni hangu hangume manda bu holeberami. Tá Aba táni hangu hanguore howa beramiligo ibugua de handaya ho howa táhondo emena ngulebira.

⁵Tá kamiru hangu hangume Ngode Datagaliwabehondo bi lalu howa wali agali maru tombene hondo kihe karume biagadagua tágua nabilimu. Wali agali maru karume ti de hendelo lowa tigua ngoai hagane andahabi hariganibi heyu howa Ngode Datagaliwabehondo bi laga ka. I̱na táhondo henene larogo o biarume tinaga emena mani mulene winigo áyu dege mo yai ka.

⁶Ani biagadagua ndo tá hangu hangume Ngode Datagaliwabehondo bi lole howa táninaga anda hobane mbiraha anda puwa panga paya tagi howa tá Aba tánaga deme nahandabehe kamigo ibuhondo bi lalimu. Ani laramigola tá Aba ibugua táni hanguore howa beramigo de hondo kagome táhondo emena ngulebirago ani bilimu.

⁷Tágua Ngode Datagaliwabehondo bi lalu howa wali agali maru Ngode Datagaliwabe mitangi nabiaga karume bi dewa nagaloneru lagadagua nalalimu. O biarume bi lu laabo haragome hale holebira manda biaga kago

⁸tigua lagadagua nalalimu. Mbirale buru pale kamigonaga tágua Abahondo bi naledemiore ibugua ala manda biai ho ka.

⁹Ngode Datagaliwabehondo bi ogodagua lalu lolene nga. Ina Aba dahuliya andaga kegoni. Í̱ mini baya gibiore ngego mo yaraga helobi

¹⁰í̱naga Handame Ho Holene ibilobi hamelo ko. Í̱na hamelo kego dahuliya andagaha karume biagadagua ina dindini kamarumebi buluma̱ya biamogo bibe.

¹¹Tomo áyu nolene buru pale kamago noloma̱ya ngibe.

¹²Marume inahondo ko birago bia dai nabi waharamalidagua í̱na iname ko birimago domo wahabe.

¹³Ina kamagoria ba hondolene hongohe nangelabe. Dama Heyolabeme ina ko mo bia holigo í̱na haru habe.

¹⁴Wali agali marume táhondo ko biyaru bia dai nabi waharimiyagua tá Aba dahuliya andaga kagome tágua ko birimiru nde domo waholebira.

¹⁵Anigo wali agali marume táhondo ko biyaru mitangi bu wiaabo halu wa naharimiyagua nde tágua ko birimiru tá Abahanda domo wa naholebira.

¹⁶Tágua Ngode Datagaliwabe mitangi bialu tomo nane howa wali agali maru tombene hondo kihe karume dengui darabini ale howa hagadagua nahalimu. Wali agali o biarume tomo nane agua biagada lelo tigua tinaga tingini wayawaya nabi haga ka. I̱na táhondo henenore larogo tinaga emena mani mulene winigo áyu dege mo yai kagoni.

¹⁷Ani bidago tágua tomo nane howa tánaga dengui wayawaya bialu mandari perebi bialu halimu.

¹⁸Ani buleberamigo irane wali agali maru karume tá handalu tomo nane kamigo manda nabilonaga bilimu. Tá Aba tánaga deme nahandabehe kamigo ibu hangu manda bulebira. Ani manda bialu tá hanguore howa beramiligo ibugua de handaya ho howa táhondo emena ngulebira.

¹⁹Tágua dindini howa mbirale homogo holenenaga mo mogobu wia nabilimu. Dindi ogoriani bombome nalubi hagua bialubi pagealime ohalu anda ibuwa page bialu mo ko hagagoria do holene nawi.

²⁰Ani biagagoria ndo dahuliya andagani bombome nanaga ngagoriabi hagua nabiagagoriabi pagealime anda naibagagoriabi mbirale homogo holenenaga mo do halimu.

²¹Mbirale homogo holenenaga mo do ho ngagoria tánaga gubalini ábu haabo holebira.

²²De libu tingininaga lamu hale ale ka. Tánaga de bayale kayagua tánaga tinginiha wá haame holebira.

²³Anigo tánaga de ko hayagua tingini arumahe holebira. Tánaga tinginiha wá holene kago hundiyagua aruma taraorehe holebira.

²⁴Mbiralime anduane kiranaga garabaya biabe ale bia haga habe nahe ka. Ibugua anduane mendego handabe manga halu mendego gubalini holebira. Ani bialu howa anduane mendegome bi larago hale halu bialu mendegome larago hale halu mo waholebira. Tágua Ngode Datagaliwabenaga biabebi muninaga biabebi kirabali gi tale bu howa bibe naheore kamigoni.

²⁵Irane ogonigo i̱na tá langerogo tágua tomo ibabi nalu holenenagabi tingini aga bu holenenagabi burupadamigo agua buledabe lowa mini dege dindi ho nahalimu. Tomo bagi hene lowa wali agali holenego duniniore ndobe. Aga bagi hene lowa tingini duniniore ndobe.

²⁶Ega yagalo yu ibaga bialu poraru de handaramine. Ega uruni ti tomo egene nahangaga widi kago gandulowa do hagane andahabi nawiaga. Ani nabi kagola tá Aba dahuliya andaga kago ibugua egaru de handaya ho kagoni. Ega uruni emene niraore lowa wali agali tá duniniore kamigoni ndobe.

²⁷Tá kamigoni mbiralime dindini holenenaga mini dege dindi ho hayagua dindini haabo habehedabe.

²⁸Aga agi bu holedabe lalu mini dege dindi ho holene aginagabe. Palawaya aleru minana anda howa lini dedago agua anda halu haradabe mitangi bidaba. Tigua tini biabe nabiagabi tininaga yári bule lowa agabi nawabiaga ka.

²⁹Anigo i̱na tá langerogo Kini Solomono ibunaga mbirale dewaorewi howa aga baya bu haga henego palawayanaga yári baya gibiore bidagobi ndo bu haga hene.

³⁰Ngode Datagaliwabehanda datani minana anda halu karuni mo yári bia haga ka. Datani uruni áyu kago yawi agalime ganda lowa irani delolebira. Ngode Datagaliwabe ibugua o biaru mo yári bia hagadagua tá kamirubi aga bilimulo ngulebira ndobe. Tágua mini mbiraore emene wu kamigo agi bulenaga wu kamibe.

³¹Anigo tágua tomo iba nolenebi aga bulenebi agiha howa ibulubadabe lowa mini dege dindi ho nahalimu.

³²Mana urunibi wali agali Ngode Datagaliwabe mitangi nabiaga karume mini dege dindi ho ka. Tá Aba dahuliya andaga kago ibugua tá mbirale uru ale bibahende buru pale kamilo manda bu ka.

³³Ani mitangi bilimulo ndo Ngode Datagaliwabehanda Handame Ho Kagonagabi ibugua tá bilimulo hame ledagonagabi tágua duninida lowa mitangiore bialu haramigola ibugua uruni bibahende ngaru táhondo ngiai holebira.

³⁴Anigo tágua yawinagabi áyu mini dege dindi ho nahalimu. Horo yawi haragola ibuni mini dege dindi ho holenenaga karulape wulebirago áyunaga mini dege dindi ho holene ngagoria marubi mo wia tago bia holene nawi.