Read Huli Lugu 1 Bible Online

Lugu 1 - Huli bible

Lugu 1

¹Agali homogo Tiobilasa-o mbirale tara tara dewa ina hemagoria biyagonaga te agali dewalime gilibule manda bialu hene.

²O biyadagoni tigua de handayarubi bi mana lawai hayarubi piganengi tenialu inahondo langiyadagua bebani gilibu wini.

³Anigo i̱na o biyadagoni pigane tenialu biyadagua bayuwa manda buwa í̱ de handalu daga labelonaga gilibu wia hole manda biru.

⁴I̱na ogoni birudagoni ala agali maru hearume bi ogoni í̱hondo lawai hayago heneneore biyagoni í̱na bayuwa manda bibelo i̱na te ogoninaga gilibu wia haro.

⁵Yudia dindini wali agali hearu Herodo handame haga kini heangi loma binigo mo miaga agali mbira mini Segaraia hene. Ibu Abaya loma binigo mo miaga henego aria hene. Ibu one mini Ilisabede ibu Arononaga aguanene berene.

⁶Ani buwa libugua Ngode Datagaliwabenaga deni howa bayale dege bialu Anduane Homogonaga bi mana lo wiago bulene wiadaguaore biai halu hene.

⁷Ilisabede ibu waneigini taba hanabe nahe wali tabua berene. Libu waneigini nahe waheore labolabo hene.

⁸Horo mbirungi Segaraia ibu loma binigo mo miaga agali howa loma binigo mo miaga marume biabe bia aribia hagadagua buwa ibugua bulene winingi Anduane Homogonaga andaha howa biabe bialu hene.

⁹Delolenenaga dagia wiagoriani mbirale mini inisenesi Ngode Datagaliwabehondo nga bilo delolene winigo aiwa delolebadabe hondole loma binigo mo miaga hearume dabo handalu hearia Segaraiahanda bulene wini. Ani biya handala ibu Anduane Homogonaga andaha anda pene.

¹⁰Anda puwa ibugua mbirale mini inisenesi hagua ngabiore bilo lowa delalu hea tambu wali agali dewa tagirani bu hearume Ngode Datagaliwabehondo bi lalu hene.

¹¹Segaraia ibu ani bialu hearia mbirale mini inisenesi hagua ngabiore bilo delolenenaga dagia wiagoriani gi tigahayagi Anduane Homogonaga dahuliyali mbira ibalu ha pani ho hene.

¹²Ha pani ho hearia de hondowa Segaraia ibu minime mogo lowa gi hene.

¹³Gi hayago hondowa dahuliyali biagome ibuhondo lalu, Segaraia-o gi nahabe. Í̱na Ngode Datagaliwabehondo bi larigonaga Ngode Datagaliwabe ibu hale hayago í̱ one Ilisabede ibugua igiri mbira taba honolebira. Taba hanaragola í̱na ibu mini Yone wibe, lalu lamini.

¹⁴Ani lamialu, Igiri ogoni taba hanaragola í̱bi wali agali maru dewa bu karu tibi turu hai ho holeberami.

¹⁵Taba hanaragola howa ibu Anduane Homogonaga deni howa agali timbuniore holebira. Ani bu howa ibugua waini ibabi lulu yagane iba marubi nolene nawi holebira. Ibu ai̱yahanda ibu taba hanarangiore howa Ngode Datagaliwabe Dinini ibuha ho to̱laihe holebira.

¹⁶Ho to̱laihe howa ibugua Isaraele wali agali dewa Anduane Homogo tinaga Ngode Datagaliwabe kagoria haru dai biai holebira.

¹⁷Ngode Datagaliwabe bi mana latagi haga Elaya timbuni hongohe henedagua ibubi ogonibi dege howa Anduane Homogo maha ibilo ibu ala bamba halu pialu holebira. Bamba halu pialu howa ibugua aba ai̱yabi waneiginibi mo mbiraore halu mandagi helalu wali agali Ngode Datagaliwabe bi mana wahalu piaga karu mini mo beregedai halu mini tigabiwi karume manda biagadagua ti manda bilo ibugua mo manda bia holebira. Anduane Homogo ibilo tagi ibugua Anduane Homogonaga wali agali mo tiga bialu manda manda bu helolebira, lalu dahuliyali biagome lamini.

¹⁸Ani layagola Segaraiahanda dahuliyali biagohondo ladai bialu lalu, I̱bi i̱ onebi iya wali agali tabua labolabo kabagodago í̱na bi larigoni henene lari lalu i̱na agua manda buabe, lene.

¹⁹Ani layagola dahuliyali biagome ladai bialu lalu, I̱ mini Gaberelo Ngode Datagaliwabe karia haabo haruli. I̱na bi bayale áyu í̱ langirugoni langule Ngode Datagaliwabehanda, Bi ogoni lama pu, layadagoria howa íbu kogoni.

²⁰Anigo i̱na bi larogo lola holene tu haragola lola holebiraore. Í̱na bi ogoni mo henene nahe mini kira wu harigo ogoni bulebira langirugo lola holene horo helo nde í̱ bi nalabehe holebere, lalu lamini.

²¹Segaraia ani bialu hea tambu ibu tagira ibilo wali agali tagirani hayaru ti hondo haabo hene. Segaraia ibu Anduane Homogonaga anda tamuha hondo haabo hayagola tigua ibu agi bialu haabo kabe toba howa minime tai bialu hene.

²²Segaraia ibu tagira ibuwa bi labe naheyagola wali agali biarume ibu tara mbira de gandeba ale Anduane Homogonaga andaha handayadago manda bini. Ibugua tihondo bi nalabehe howa bi loa hayago ibuni gime walia halu hene.

²³Emene halu ibunaga biabe bulene winigo biai halu Segaraia ibu andaga dai bini.

²⁴Mani howa Ilisabede ibu tombeha gali birayagola ibu ege duria andaga biraabo hene.

²⁵Biraabo howa lalu, Anduane Homogohanda i̱hondo bayale ogoni biamogo biyada. Ibugua i̱ hondowa dara hayagome ai wali agali marume i̱hondo, Wali tabua bedego, nalolebira, lene.

²⁶Ilisabede ibu tombeha gali bere berenego ege waraganengi Ngode Datagaliwabehanda dahuliyali mbira mini Gaberelohondo lalu, Í̱ Galilinaga tano mini Nasarete pobe, lene.

²⁷Wandari mbira mini Meri Yosebe ibu dabu bule lo berelenego berearia dahuliyali biagome ibuhondo bi lamule pene. Yosebe ibu Isaraele wali agalinaga Kini Debidinaga aguanene hene.

²⁸Ani bu berearia dahuliyali biagome puwa lalu, Meri-o mo palia holene í̱ha wiaabo helo laro. Anduane Homogo ibu í̱ heba mandagi howa turu timbuni habelo mo turu haya, lene.

²⁹Dahuliyalime bi layago hale howa Meri ibu bi ogoni aginaga larabe toba howa mini burugu lowa tai timbuni bialu berene.

³⁰Ani bialu berearia dahuliyali biagome ibuhondo lalu, Ngode Datagaliwabehanda í̱ mitangi bialu í̱hondo turu ho kago gi nahabe.

³¹Í̱ tombeha gali bere birulebere. Í̱ igiri gali ogoni taba honowa ibu mini Yasu wibe, lalu lamini.

³²Ani lamialu lalu, Igiri ogoni ibu agali mini lene holebira. Wali agali bibahendeme lalu, Ibu Ngode Datagaliwabe Daligaorene Daliga Kagonaga Igini kagoni, lolebira. Anduane Homogo Ngode Datagaliwabehanda Yasu ibunaga mamali Debidi kini henedagua ibubi ho aribia ho helolebira.

³³Ibugua Yagaba aguanene karunaga kini haabobo bu holebira. Ibunaga handame ho holene wiaabobo bu wulebira, lalu lamini.

³⁴Ogonidagua lamiyagola Merihanda dahuliyali biagohondo lalu, I̱ wandari mabuage agalila nahene bedagodago bi áyu lariruni agua bialu bulubadabe, lene.

³⁵Ani layagola dahuliyali biagome ladai bialu lalu, Ngode Datagaliwabe Dinini í̱ha daluwa Ngode Datagaliwabenaga hongome í̱ karula holebira. Ani bulebirago manda buwa igiri taraore ogoni ibu Ngode Datagaliwabe Igini ka lalu lolebira, lene.

³⁶Dahuliyali biagome ani lamialu lalu, Í̱naga damene Ilisabede bedago mitangi bibe. Tigua ibu waneigini hono wibe nahe lenego áyu ibu wali waheore biruwa ibunaga tombeha gali bere beda. Gali biru bereane ege waragaria pene.

³⁷Ngode Datagaliwabehanda mbirale mbira nabibehe nawi, lalu lamini.

³⁸Ani lamiyagola Merihanda lalu, I̱ Anduane Homogonaga biabe bia hagane wandari bedogo í̱na áyu langiridagua i̱hondo biai helo, lene. Ani laya handala dahuliyali biagome Meri berea handala pene.

³⁹Dahuliyali biago ibu piya handala Meri ibu heyalu abale pialu Yudiani bare wiaru iri dali bigi bima pialu tano mbira wiagoria anda pene.

⁴⁰Tano ogoriani anda pialu Segaraianaga andaga Ilisabede bereria puwa Merihanda ibuhondo, Hagibuni-o í̱ bederia nenege ibirugo, lene.

⁴¹Merihanda Ilisabedehondo bi layago hale howa Ilisabedenaga tombeha gali birayagome ema bini. Ani bereria Ngode Datagaliwabe Dinini Ilisabede ibuha ho to̱layagola

⁴²Ilisabedehanda bi dalimu lalu, Meri-o í̱ wali maru bedarubi ndo Ngode Datagaliwabehanda í̱ore mo turu timbuniore hayada. Í̱na gali taba honoleberego ibubi mo turu holebira, lene.

⁴³Ani lowa lalu, I̱na bayale agi birugonaga i̱naga Anduane Homogo kagonaga ai̱ya í̱ i̱ berewaria ibiribe.

⁴⁴Í̱na lalu, Í̱ bederia nenege ibiru, larigo hale harugola i̱naga tombeha gali bedago ibu turu howa ema biya, lene.

⁴⁵Ilisabedehanda ogonidagua lamialu lalu, Anduane Homogohanda, Bulebero, layadagua henemane lola holebiragoni í̱na mini mbiraore wu bedegome í̱ turu timbuni ho birulebere, lalu lamini.

⁴⁶Lamiyagola Merihanda lalu, I̱naga gubalinime Anduane Homogonaga mini yaraga harogoni.

⁴⁷Ngode Datagaliwabe ibu i̱naga Pele Ngiaga kago i̱naga miniha turu ho bedogo.

⁴⁸Ibunaga biabe bia haga wandari i̱ habane nabulene berewaria Ngode Datagaliwabe ibugua i̱ dara howa mitangi bini. Ngode Datagaliwabe Hongo Gibihe kago ibugua galone dunini timbuni ogoni i̱hondo biyago mitangi bialu áyu wali agali marumebi mani holebirarumebi, Meri ibu turu timbuni ho birulene nga, lolebira. Ngode Datagaliwabenaga mini bayale honani ale ka.

⁴⁹

⁵⁰Wali agali dabane áyu hama pedarubi mani ho aribia holebirarubi ti bibahendeme Ngode Datagaliwabenaga mini mo yaraga halu karu Ngode Datagaliwabehanda tihondo dara howa biamogo bialu ka.

⁵¹Wali agalime mine howa tini hangume bule lowa manda manda bu wu hearia ibugua ibunaga gi hongo timbunihegome dogola a̱i̱ na̱i̱ biyagola ti wahalu kilikala lalu purogo lai hene.

⁵²Kini hongohe hearu handame ho hearia ibugua ti mo dindiha helalu wali agali dindiha hearu mo yaraga ho helene.

⁵³Wali agalime tinaga miniha garibilo hearu bayale mbirale mbirale ibugua ti mo to̱la hai halu wali agali mbirale mbirale dewawi hearu ibugua tini giha mbira nayi, Pudaba, lene.

⁵⁴Ibugua inanaga mamalihondo, Bulebero, lowinidagua buwa ibunaga biabe bia haga Isaraele biamogo bule ibini.

⁵⁵Ibugua Abarahamabi Abarahamanaga aguanene ala henerubi mani holebirarubi tihondo dara howa biamogo bulene mitangi bia ho wiaabo ka, lalu Merihanda bi ogonidagua lamaro bini.

⁵⁶Meri ibu Ilisabedela ege tebira agima biralu nde ibuni andaga dai bini.

⁵⁷Ilisabedehanda gali taba honolene tu hayagola ibugua igiri gali mbira taba henene.

⁵⁸Taba hanayagola wali agali mandagi haga hearubi ibunaga damene hearubi ti ibu berearia ibuwa tigua Anduane Homogohanda Ilisabedehondo bayale gibiore biyagola hale howa ti ibu heba mandagi turu haga bu hene.

⁵⁹Horo halini bolangua hayagola tigua igiri gali biagonaga dongone podo mabu bia hole pene. Puwa tigua igiri biago aba mini Segaraia winigo igiri biagonaga minibi Segaraia dege wule biyaria

⁶⁰ibu ai̱yahanda lalu, Ogoni ndo ibu mini Yone wimi̱ya, lene.

⁶¹Ani layagola tigua ibuhondo lalu, Í̱naga damene bibahende karu mbirali mini ogoni lalehe mbira nahe, lene.

⁶²Ani lowa tigua ibu abahondo, Í̱ igini mini ai wule hamelo kebe, lalu gime walia hene.

⁶³Ani biyagola Segaraiahanda beba gili buliya ngi la nabi gime dege walia hene. Ani walia hayagola tigua ibuhondo beba mini. Miyagola ibugua bebani gili bialu, Ibu mini Yone, gili bini. Ani gili biyago de hondowa tigua handaya hene.

⁶⁴Ani gili biyaore Segaraia ibu bi lone labehe hearia ibugua Ngode Datagaliwabe mini yaraga halu hene.

⁶⁵Ani biyagola wali agali ti ibu heba mandagi haga hearume mogo timbuni lene. Yudia dindini bare bibahende wiaruniha tara ogoni biyiyagonaga te loyogo lalu hene.

⁶⁶Bibahendeme te ogoni layago hale hayaru tigua mitangi bialu, Anduane Homogonaga hongo holene ibu heba haore biaruago igiri ogoni ibugua agi bulenaga holobadabe, lalu hene.

⁶⁷Yone aba Segaraia ibuha Ngode Datagaliwabe Dinini ho to̱laihe howa ibugua mbiwia halu bi ogodagua latagi halu lalu,

⁶⁸Iname Anduane Homogo Isaraele wali agalinaga Ngode Datagaliwabe kagonaga mini yaraga hama. Ibugua ibunaga wali agali biamogo bulene wiagoria ibalu ti golope hole hayada.

⁶⁹Ibunaga biabe bia haga Debidinaga aguanene mbirali ogoni ibu inanaga Pele Ngiaga hongohe helo ibugua dabo helayada.

⁷⁰Ibugua ibunaga mana latagi haga lomo bia ho heleneruha howa bambaore ani bulebero lalu lowinigo ogo.

⁷¹Inanaga waitigi karume ina dariba nahelobi inahondo handabe manga ho karunaga hongo kagoha kamaria howabi ibugua, I̱na pele ngulebero, lalu lowini.

⁷²Ibugua inanaga mamalihondo dara howa, Biamogo bulebero, lalu, Habo nalolene bi baya taraore mbira ala lowinigo mitangi bulebero, lalu lowini.

⁷³Ibugua inanaga mamali Abarahamahondo bi galone duniniore lowinigo ogo, Iname gi nahe horo bibahende howa ibunaga biabe bia halu holoma̱ya inanaga waitigi karume ina dariba ho ngagoria howa ibugua ina pele ngialu haru dai bulebero, lalu lowini.

⁷⁴

⁷⁵Ani lenego irane ina dindini kamagola howa ibu deni iname bayalebi tigabibi howa ibunaga biabe bialu holoma̱yanaga lowini.

⁷⁶I̱ igini-o tigua nde, Í̱ Ngode Datagaliwabe Daligaorene Daliga Kagonaga mana latagi haga kegoni, lolebira. Anduane Homogo ibilo í̱na bamba halu ibunaga hariga ba halu mo tiga bima polebere.

⁷⁷Í̱na ibunaga wali agali lamialu, Tígua ko birimigo ibugua domo wahai halu pele ngulebira, lamulebere.

⁷⁸Inanaga Ngode Datagaliwabe ibu hendore howa dara halu biamogo biaga ka. Ibugua ina haabo holoma̱ya pele mulene wá timbuniore holene aleme tagira ibalu

⁷⁹wali agali homolenenaga aruma holene ngagoria karu ibugua hari daligaha howa wá hadali helolebira. Ina mo palia holene ngagoria pole pialu holoma̱yanaga ibugua bayuwaore haru holebira, lalu bi ogoni Segaraiahanda mbiwia halu latagi hene.

⁸⁰Ibu igini biago mini tinginibi boga bialu hongo halu anda hene. Ani buwa ibugua Isaraele wali agali hearume ibu de hendelo hamani ha pani holene tu wilo lowa ibu dindi ko wali agali nahaga wiagoha haabo hene.