Read Huli Mana Loyane 32 Bible Online

Mana Loyane 32 - Huli bible

Mana Loyane 32

¹Hari mindini dindila-o i̱naga bi hale hadaba. I̱na bi larogo bayuwa hale hadaba.

²I̱naga bi lawai harogome dalu ibilagadagua ibilalu datani bayale anda helo dindini dadimba ale mo mindibia hagadagua tí bayale halimulo mo bayale holebira. I̱naga bi dalu ibira hagadagua ibalu dalume mbirale dindini anda ho karunaga mane bayale helo mo tiga biagadagua bulebira.

³I̱na Anduane Homogonaga mini yaraga holebero. Tígua ibu mini leneore ka loleberemi.

⁴Anduane Homogo ibu haabo hagaore ka. Ibu ege to̱le̱ timbuni mo ema bibe nahe wiraligobi ka. Ibunaga mana baya buruguleore tigabi dege nga. Tínaga Ngode Datagaliwabe ibugua bi leneru mbira mbiralime mo iriari bibe nahe bibahende ibuninaga bi lowiyago ke̱ hole nalaga. Ibugua mana tigabi bayale bulene ngadaguaore biaga ka.

⁵Tí ogonibi ndo kamigoni. Wali agali ke̱ haga howa tígua buleore lalu lowirimiru wahalu piaga kami. Wali agali mana ko hangu bialu haga kamigome tí Anduane Homogonaga wali agali habe nahe kamigoni.

⁶Anduane Homogo ibu tínaga aba howa tí bibahende Wabiaga ka. Ibugua tí damene timbuni hodame bileda. Anidagua binidago manda bialu tígua ibuhondo mana ko uruni irane aginaga bialu kamibe. Tí wali agali lulu howa mini nawiore kamigoni.

⁷Tígua abaleore howa biniru mitangibu dai bidaba. Tí abaruhondo agua binibe lalu hale hadaba. Agali daguahe ala hene karuhondo agua dege binibe lalu hale hadaba.

⁸Daligaorene Daliga kago ibunimeore wali agali tara tarahondo dindi tu wu tahene. Tahalu ti ogoriaore halimu lalu lamigi bini. Ibugua Isaraele wali agali hameigini headagua dindi karulapeore tu wini. Wali agali tara hearu ti helobi tu wu ngelaga bini.[3]

⁹Ibugua Yagaba aguaneru ibunime handayaho hole dabo helayagoni.

¹⁰Isaraele wali agaliru luluyu yalu dindi ko yobi pupe hayagoni. Dindi koore puyabu hongohe pu laga wiagoha pupe ho hayagoni. Anduane Homogohanda ibuni handayaho hagadagua ti handaya halu biamogo biya.

¹¹Ega bodo hariawe bedarume tinaga iginiru yaga lalu pelo yupe howa mo ko halu ibira hole tiga biragola ibunime dindiha pialu babagane yangalalu iginiru mo yaraga hagadagua Anduane Homogohanda Isaraele wali agaliru tiha mo ko holene mbira anda ibuligo baya hangu handayaho hene.

¹²Dindi taranaga dama karume haru hamaga nahe Anduane Homogo ibuni hanguoreme Isaraele wali agaliru haru halu hariga mo walia hene.

¹³Anduane Homogohanda ti dindi hari barebare wiaruni handaya ho helalu tigua mabuni tomo andaho hearu bialu naya. Ege to̱le̱ timbuni hearuha mone ibane wiaru mo nalu ege to̱le̱ dindini wiaruha tinaga ira oliberu bayale taraore anda haya.

¹⁴Tinaga bulumaga memeru hearunaga andu ibane tini nolene karulape hambiya. Tigua bulumagaru sibiru memeru bayale habanehe hinaya. Tinaga widiru bayale anda halu waini iba bayale berelo gerebi liniru bayale ibiralu do ndigindugu laya.

¹⁵Anduane Homogonaga wali agali heneru ti mbirale dewaore wu howa tinime ibu erembira mialu mine haga hene. Tigua tomo dewa naabo howa tini timbuni pudu ho hene. Tigua Ngode Datagaliwabe ti wabinigo yu wahowa tinaga pele miaga timbuni kagohondo erembira mialu hene.

¹⁶Tigua dama mitangi bialu gime wabini wiaruhondo bi pupu wiyagome Anduane Homogo mo tandaga hene. Tigua ko ogoni biyagome ibu mo keba hene.

¹⁷Tigua Ngode Datagaliwabehondo ndo dama tara tarahondo mbirale bo lomabu miaga hene. Dama uruni bamba tinaga mamalirume manda nabini. Isaraele wali agali bamba henerume dama uruninaga andaneha nahene.

¹⁸Tinaga Ngode Datagaliwabe ibu hongo gibihe tini pele miaga timbuni henego embeda ho hene. Tihondo bayale holene tene miaga kago ti embeda hai ho wahene.

¹⁹Tigua mana ko uruni biyago hondowa Anduane Homogohanda tihondo keba timbuni hene. Keba ogonibi howa ibugua ibuni waneigini biaru erembira mini.

²⁰Ibugua lalu, I̱na wali agali uruni biamogo nabulebero. Tiha genda tara tara anda ibiyaguabi ibilo wahalu biamogo nabulebero, lene. Ti mine gibi hagabi i̱hondo mini mbiraore nawi hagabi ka.

²¹Tigua Ngode Datagaliwabe ndo nagalone wiaru talima pialu kagoni. Anidagua biyagome i̱naga bu mini mo tandaga halu tihondo keba haru. Ko uruni biyagonaga i̱na hameigini mbira mini lene ndo tara karume ti mo keba helo helalu wali agali hameigini tara mini nawi karu urunime Isaraele wali agali mo tandaga helo helolebero.

²²Horo ogoningi i̱naga keba holeneme timbuniore ira hungu ale daradagua bialu dindi bibahendeni karu ngarubi bo dai holebira. Irame humbirini dindiha pialu dindi hari pini karubi daiore holebira.

²³Agalime timu dewa gime yu howa waitigiru bagadagua balu i̱na tiha mo ko holene dewaore ibilolebero.

²⁴I̱na ti tomo nolene mo garibila halu tiha warago tara tara mo wia halu ti mo homa haga bulebero. I̱na mbirale tara tara gabua karunime ti hayilobi nogombi ko ngarumebi ti hayule pudaba laga bulebero.

²⁵Wai timbuni bialu kagola waitigirume ti harigani howa homelo bolebira. Tini andagaha bira do kamiria gi timbuni holeneme tini ibira holebira. Tinaga waitigirume ibalu wandari igiri daliahe bu karubi bo homelalu waneigini galibi wali agali wahe bu karubi yu wanahe bibahende bo wahaiore holebira.

²⁶Mbiralime ti mitangi bialu abogo ogoria hene nalelo i̱na ti mbira yu wa nahe bo wahai hole manda biru.

²⁷Ani manda birugoyu i̱na ti bo wahai kole nde waitigi bu karume mine halu lalu, Iname Ngode Datagaliwabenaga wali agali biaruni bope harimagoni ndobe, lalu kalego. Ani nalelo i̱na i̱naga hongoore holeneme ti bope harugoni ndobe. Anigo i̱na waitigi bu karume bi ogonidagua loligo i̱nime ti bo wahai nahene, lene.

²⁸Isaraele wali agali mini nawiore kagoni tinaga mini gigabi nawi emene tubagiore ka.

²⁹Ti wali agali miniwi henedale nde tiha mo ko holene anda ibiyago agilemedabe handalu manda bidale.

³⁰Isaraeleali daosini mbira (1,000) hearu waitigi mbiraore hangu baba wai bialu dari hayago agibe. Isaraeleali daosini pira (10,000) waitigi kirali hangu baba wai bialu dari hayagonaga irane agibe. Anidagua biyagoni irane ogo. Anduane Homogo tinaga Ngode Datagaliwabe ibugua ti yu wahalu ti handabe manga timbuniore howa hongo haihe kagome ti erembira mini.

³¹Waitigi karume tininaga dama gime wabini bu karunaga hongo naheoreyane handaya. Isaraele wali agalirunaga Ngode Datagaliwabe kagonaga hongo ege to̱le̱ timbuni ema bibe nahe ngaligobi hongo timbuniore ka.

³²Isaraelenaga waitigi bu karu tinaga mana ko ngubiore biagago Sodomo Gomorala wali agalirume binigobi biaga ka. Tinaga waitigi biaru ti pu mbira lini daga mini gerebi kome lini kaubiore dagagobi ka.

³³Tinaga mana koorene ko waini iba puya ko homaganaga ibaneme wabini ale ka.

³⁴Anduane Homogo ibugua Isaraelerunaga waitigi bu hearume biyago manda biaiho ka. Ibugua ti ko biyagonaga pani mulene henge mbira tagira ibilo hondo ka.

³⁵Horo ogoni tagira ibiragola ibugua ti ko biyagonaga badai bialu pani mialu howa bo wahai holebira. Tigua ko biyagonaga mo dindiha helolene íbu nga. Ti mo ko holene horo kaware hapara haragoni.

³⁶Anduane Homogohanda ibunaga wali agaliru hongo biba halu kago handalu ibugua ti pele mulebira. Ibugua ibunaga biabe biahaga uruni tini hangu howa mbira mbira yu wahene handalu ibugua ti dara halu biamogo bulebira.

³⁷Anduane Homogohanda ibunaga wali agaliruhondo ogodagua hale halu, Abale tígua dama mitangi bialu gime wabini hongohe urunime tí biamogo bulebira manda bialu pirimigo ai odaruni agoha kabe, lolebira.

³⁸Tígua urunihondo nogo habanerubi waini ibanerubi ti nelo lomabu mirimigo. Ai odarunime áyu tí biamogo bule ibilo. Tigua tí ko ngagoria howa haru dai bilo.

³⁹I̱ni mbiraore hangu Ngode Datagaliwabeore kogoni manda bilimu. I̱ ale mendeali mbira naheore. Holene ngiagabi bo wahagabi i̱ni hanguore kogoni. I̱na mbirali mo tandaga holenebi mbirali mo dabi holenebi i̱ni hangu kogoni. I̱na buleberogo mbiralime hapai habe nahe.

⁴⁰Heneneore Ngode Datagaliwabe i̱ni hanguore haluhe henego kogoni. Ani kogonigo i̱na buleore lalu mbira ogobi lo wiruli.

⁴¹Mana tigua bialu karu baya hangu tale bulebero. I̱na i̱naga wai biaga ayu tibu ne̱ halu mo ngiringara lelolebero. I̱naga ayu tibu ogonime maru i̱naga waitigi karu bo wahai halu maru i̱ handabe manga haga karu mo ko holebero. Maru i̱ baba wai bule karu ina tini homelo bo wahai holebero. Tinaga darama timu togo togo pora bialu holebira. Agali maru wai hamaha nahomayagua nde i̱nime ti bo wahai holebero, lene.

⁴²

⁴³Dindi tara tara wali agali kamiru-o tígua Anduane Homogo ibuninaga wali agali bu karunaga mini yaraga holene nga. Ibunaga wali agaliru bo wahaga karu ibunime tinibi mo ko haga ka. Ibugua waitigirume ko birago biadai biaga ka. Ibunaga wali agalirume ko biyaru ibugua domo wahaga ka, lalu Mosesehanda lai hene.

⁴⁴Mosesela Nunu igini Yosualame iba gana lalu bi ogoniha gilibu wiaruni Isaraele wali agali bu hearume hale hai helo daga latagi halu hene.

⁴⁵Mosese ibugua Ngode Datagaliwabenaga bi mana wali agali bu hearuhondo lawai hai howa

⁴⁶mani ibugua tihondo lamialu lalu, I̱na bi mana áyu o langiruruni baya hangu de handalu talialu bialu halimu. Tínaga waneiginiru tiguabi nde Ngode Datagaliwabenaga bi mana ogoni talialu horo bibahendengi bialu helo lamilimu.

⁴⁷Ibunaga bi mana lawai holene uruni bi damene ndo uruni bi kuniore tíni bayale holenenaga ngagoni. Bi mana uruni bibahendeore mo dunubia howa hale halu bialu halimu. Anidagua bialu harimiyagua áyu tí Iba Yodana doma ede halu pole kamigoria pu howa dindi edegoriani luore haho wuleberemigo ani bilimu, lene.

⁴⁸Horo ogoningi dege Anduane Homogo ibugua Mosesehondo lalu,

⁴⁹Moaba dindiha hari mini Abariminaga Hari karuha pobe. Hari uruni Iba Yodana angeha halu Yarigo tano ederayagi ngelowa ngago. Hari uruni bibahende bolangua hai howa Hari Nebo nene kagoria irigi howa Kenana dindi i̱na Isaraele wali agali tíhondo nguleberogoni ederayagi ngago handaede habe.

⁵⁰Í̱ hamene Arono ibu Hari Ho nene wiagoha ala homayadagua í̱bi nde Hari Nebo nene ogoniha howa homolebere. Í̱naga dinini í̱ damene homayarunaga dinini pu karu heba mandagi hole pobe.

⁵¹Ala Arono homayadagua í̱bi nde homolebere larogoni irane libugua i̱naga bi larugo mo wahowa Kadese tano kaware dege ngelowa dindi ko iba dalu naibaga Meriba wiagoria howa Isaraele wali agali bu hearunaga deni i̱naga mini mo dindiha haribigonaga ibu homayadagua í̱bi homolebere laro.

⁵²Ani birigodago ai í̱na dindi ogoni ngagoria kaware hapara halu napoleberego handa amu hangu hole pu. Dindi ogoni i̱na Isaraele wali agaliruhondo muleberogoha í̱ napolebere, lene.