Read Huli Yone 17 Bible Online

Yone 17 - Huli bible

Yone 17

¹Yasuhanda bi uruni lamiai howa ibu dahuliya andagaha handa daga howa lalu, Aba-o horo biago tagira ibiyago í̱ igini ibugua í̱hondo mini daliga taraore lolene ngilonaga í̱na í̱ iginihondo mini daliga taraore lolene ngibe.

²Í̱na wali agali i̱hondo ngiriru tihondo i̱na haabobo holene muliya wali agali bibahende hondo hai holiyanaga hongo i̱hondo ngiri.

³Ngode Datagaliwabe henene í̱ hangu ke manda bia Yasu Keriso i̱ í̱na pu larigola ibinida manda bia ani bialu kagome haabobo holene yu ka.

⁴Í̱na bibe lalu langirigo biai haru. Ani bialu harugome i̱na í̱naga hongo holene taraore walia haru.

⁵Aba-o bamba dindi wa nabingi í̱ heba howa mini daliga taraorewi harugo ogoni áyu i̱ í̱naga deni howa mini daliga taraore ogoni lone ngibe.

⁶Dindini hene agali maru í̱na i̱hondo ngiriru urunime í̱ manda bilo walia halu haru. Ti í̱naga henego í̱na i̱hondo ngirigoni. Tigua í̱naga bi hale halu laridagua biya.

⁷Mbirale bibahende ngirigo í̱na i̱hondo minida ti manda biai kagoni.

⁸Í̱na i̱hondo bi mana langirigo i̱na tihondo lamiai harugola tigua hale howa yu tiga bu ka. Yu tiga buwa i̱ í̱ kegoria howa henene ibinidalo ti manda biai ho ka. Í̱na i̱ pu larigola ibini ka manda buwa yu tiga bu ka.

⁹Ti mitangi bialu i̱na tinaga la haro. Dindi mana hangu biagaru mitangi bialu ndo í̱na i̱hondo ngiriru ti í̱naga kago mitangi bialu tinaga la haro.

¹⁰I̱naga karu bibahende í̱nagabi ka. Í̱naga karu bibahende i̱nagabi ka. Tigua bialu kagome i̱naga hongo taraore holene walia haragoni.

¹¹Áyu ogoni i̱ í̱ kegoria ibule ko. I̱ dindini naholebero. Ti dege dindini holebira. Aba Baya Buruguleore-o í̱na í̱naga mini i̱hondo ngirigonaga hongome ti haru halu mamage ho habe. Iya mbiraore kabadagua tibi mbiraore helo.

¹²I̱na dindini ti heba harungi í̱naga mini i̱hondo ngirigonaga hongome ti haru halu mamage ho haru. I̱na ti mamage howa mbirali pu ereba nahe ka. Agali mbira pu ereba hole henego ibu hangu pu ereba haya. Ani biyagome Anduane Homogonaga mbugani bi gilibu ngadagua lola haragoni.

¹³Áyu ogoni i̱ í̱ kegoria ebero. I̱naga turu holene ti gubaliniha to̱lai helo i̱ dindi ogoria howa bi ogoni tihondo lamiru.

¹⁴I̱na tihondo í̱naga bi mana lamialu haru. I̱ dindi mana hangu biaga aria ndo kodagua tibi dindi mana hangu biaga aria ndo kago hondowa dindi mana hangu biagarume tihondo handabe manga ho hene.

¹⁵Dindi ogoria howa í̱na ti haru pobelonaga ndo laro. Ko Bulene Anduane ibugua ti ko mo bia holigo mamage halu haru habelonaga langero.

¹⁶I̱ dindi mana biaga aria ndo kodagua tibi dindi mana biaga aria ndo ka.

¹⁷Ti í̱ninaga helo henene loleneme ti loma bia ho helabe. Henene lolenego í̱naga bi nga.

¹⁸Í̱na i̱ wali agali dindi bibahendeni kagoha pu laridagua i̱nabi tihondo wali agali dindi bibahendeha pugupugu bidaba laru.

¹⁹I̱na ti mitangi bialu ti í̱ninagaore loma bia hene helo i̱nibi í̱ninagaore loma bia ho ko.

²⁰I̱na agali uruni tinaga hangu mitangi bialu ndo la haro. Tigua bi mana lamiragola hale howa i̱hondo mini mbiraore wu holebirarunagabi heba la haro.

²¹Ti bibahende mbiraore helonaga i̱na la haro. Aba-o i̱ha í̱ kedaguabi í̱ha i̱ kodaguabi iyaha ti helo hameledo. Wali agali dindi bibahendeni karume í̱na i̱ pu larigola ibinida manda buwa mini mbiraore wilo í̱na ti mo mbiraore helabe.

²²Iya mbiraore kabadagua tibi mbiraore helonaga í̱na i̱ hongo holene taraore ngirigo i̱na tihondo miru.

²³I̱ tiha kogobi í̱ i̱ha kegobi ti nde mbiraore helo mo mbiraore helabe. Ti mbiraore kago hondowa wali agali dindi bibahendeni karume í̱na i̱ pu larigola ibinida manda bilo. Ani manda buwa í̱na i̱ gubalini ho kedagua tibi gubalini ho ke manda bilobi ti mo mbiraore helabe.

²⁴Aba-o dindi bibahende wa nabi howa í̱na i̱ gubalini timbuni ho harigoni. Ani howa í̱na agali i̱hondo ngirirume i̱ mini daliga taraore ngirigo hendelo i̱ kogoria tibi helo hameledo.

²⁵Tigabi Holene Aba-o dindi mana hangu biaga karume í̱ manda nabi ka. I̱na í̱ manda bu ko. Agali o karumebi í̱na i̱ pu larigola ibinida manda biai ka.

²⁶Í̱na i̱ gubalini ho kego gubalini holene ogoni tiha wilobi i̱bi tiha holiyabi tigua í̱ manda bilo i̱na tihondo walia harugo mahabi ani walia haabo holebero, Yasuhanda lene.