Read Huli Yone 18 Bible Online

Yone 18 - Huli bible

Yone 18

¹Yasuhanda Ngode Datagaliwabehondo bi ogoni lai howa ibunaga talima piagaru heba tagira pialu iba Kidirono doma ede halu puwa mabu mbira winigoria ubanda hene.

²Mabu ogoriani Yasu ibunaga talima piagaru heba halu dewa ngoai haabo haga henego Yudasa ndelaga biago ibu manda bu hene.

³Ani manda buwa Yudasa ibu Anduane Homogonaga anda mamage haga marubi Lomo ami agali marubi ti Perisi agalirubi loma binigo mo miaga haguane biarume pudaba laya handala ti haru lamu halebi agali bagane alebi yalu mabu biagoria haru pene.

⁴Ibiyagola Yasu tigua ibuhondo bulebirago bibahende manda biai howa tihondo lalu, Tí ái hai bima eberamibe, lene.

⁵Tigua ibuhondo ladai bialu lalu, Nasareteali Yasu hai berama, lene. Yasuhanda tihondo lalu, I̱ o kogoni, lene. Ndelagane Yudasa ibu ti mandagi hearia lamini.

⁶Yasuhanda tihondo, I̱ o kogoni, layago hale howa ti bibahende tiga bebege dai bialu hearia dindini pindipandulo pilo ibira hai hene.

⁷Yasuhanda tihondo halu mende lalu, Tí ái hai bima eberamibe, lene. Ani layagola tigua lalu, Nasareteali Yasu hai berama, lene.

⁸Ani layagola Yasuhanda tihondo ladai bialu lalu, I̱ o kogoni lalu abale langirugoni. Tígua i̱ hai beramiyagua agali o karu purogo lelo pudaba ladaba, lene.

⁹Ibugua ala, Aba-o agali í̱na i̱ ngiriru mbirali pu ereba naholebira, lalu layadagua lola helo ani lene.

¹⁰Saimono Pida ibu wai biagane ayu tibu yu henego ogoni yamuwa loma binigo mo miaga haguane timbuninaga garabaya biabe ale bia haga mbira mini Malagasa heagonaga hale tiga bo bagada pe hene.

¹¹Ani biyagola Yasuhanda Pidahondo lalu, Í̱naga wai biagane ayu tibu andaneha da dai bia. I̱ Abahanda i̱hondo ibabe nginigo ogoniha tandaga nolene bedago nolebero ndobe, lene.

¹²Ani layago hale howa Lomo ami agali biaru tinaga haru haga heba Yuali mamage haga biarubi tigua Yasu minuwa gi huba bialu

¹³mali ogoninaga loma binigo mo miaga haguane timbuni Kaiabasa henego ibunaga imane Anasa hearia ala Yasu haru pene.

¹⁴Kaiabasa ogoni ala ibugua Yu wali agalinaga haru hagahondo lalu, Wali agali bibahende homoligo mbiralime homa holene nga, lalu lene.

¹⁵Tigua Yasu minu yalu piyadagua Saimono Pidabi Yasunaga talima piaga mendebi libu haru mama haruru pene. Talima piaga mende biago ibu loma binigo mo miaga haguane timbunime mandabi henego ti Yasu minu yalu piyadagua pialu ibu loma binigo mo miaga haguane timbuninaga andaga anda pene.

¹⁶Pida ibu pabe tagirahayagi hene. Talima piaga mende loma binigo mo miaga haguane timbunime mandabi biago ibugua dai buwa panga mamage haga wandari heagohondo bi lamuwa Pida haru anda ibini.

¹⁷Haru ibiyago hondowa panga haru hagane wandari biagome Pidahondo lalu, Agali o haru poragonaga talima piaga mbira í̱ ndobe, lene. Ani layagola Pidahanda ladai bialu lalu, I̱ ndo, lene.

¹⁸Dagare biyagola biabe bia hagane agalibi mamage haga agalibi tigua ira delowa dagare dogo bialu hearia hondowa Pida ibu puwa ti heba mandagi howa dagare dogo bialu hene.

¹⁹Loma binigo mo miaga haguane timbuni biagome Yasuhondo hale halu lalu, Í̱naga talima ibaga agali ai kabe. Í̱na mana agi lalu lawai harilibe, lene.

²⁰Ani layagola Yasuhanda ladai bialu lalu, Wali agali karu bibahende ti hale hai helo panigiore howa lamialu haruli. Yu wali agali ngoai hagane andaha howabi Anduane Homogonaga andaha howabi i̱na mana lawai haruli. Mbira do howa nalaruli.

²¹I̱hondo aginaga hale harebe. I̱na mana lamirugo hale hene karu ti manda biai kago tihondo hale habe, lene.

²²Ani layagola mamage haga agali mbira heagome hale howa ibunaga gi habeme Yasu bowa lalu, Loma binigo mo miaga haguane timbunihondo ogonidagua ladai birilibe, lene.

²³Ani layagola Yasuhanda ladai bialu lalu, Kagua ago larugonaga baribe. Kagua mbira laruyagua ogo larigonaga baru lalu o karu hale helo lamia, lene.

²⁴Ani bialu Anasahanda, Loma binigo mo miaga haguane timbuni Kaiabasa karia haru pudaba, layagola Yasu gi huba biaabo heaore haru pene.

²⁵Pida ibu ira deagoria dagare dogo bu hearia tigua ibuhondo lalu, Agali o haru poragonaga talima piaga mbira í̱ kegoni ndobe, lene. Ani layagola ibugua lalu, I̱ ndo, lene.

²⁶Pidahanda agali hale bagadape hayagonaga damene mbira loma binigo mo miaga haguane timbuni biagonaga garabaya biabe ale bia haga dege heagome Pidahondo lalu, Mabuni ibu heba heria handarugo í̱ ndoyagoda, lene.

²⁷Ani layagola Pidahanda lone lalu, I̱ ndoore, lene. Ogoni lope heagolaore ega gogologome bi lene.

²⁸Ani bialu tigua Yasu Kaiabasanaga andaga howa gabumanenaga haru haga andaga haru pene. Egerebagiore haru penego Yu agali ti áyu Bolangua Halu Penegonaga Horo nga manda buwa Anduane Homogonaga deni dodo nahe helo mana pugule ndoyagola ti anda biagoha anda nape tagirani hene.

²⁹Tagirani hearia Pailate ibu tagira puwa tihondo lalu, Agali ogonime agi biyagola godi lole haru ibirimibe, lene.

³⁰Ani layagola tigua ladai bialu lalu, Ibugua ko mbira nabidale iname naharu ibidamale, lene.

³¹Pailatehanda tihondo lalu, Tínaga mana lo ngadagua godi lole ibu haru dai bidaba, lene. Ani layagola Yu agali biarume ibuhondo lalu, Inane hangume godi lowa agali mbira bo waholene nawi lo ngago, lene.

³²Tigua bi ogoni bame ndo lene. Yasuhanda bi ala lalu, Ogodagua biragola homolebero, lenego henemane lola helonaga lene.

³³Pailate ibu gabumanenaga andaga dai buwa Yasu olowa lalu, Yu wali agalinaga Handame Haga Kini í̱ kebe, lene.

³⁴Yasuhanda ladai bialu lalu, Í̱ni manda buwa laribe be marume i̱ ogoni ka layago hale howa laribe, lene.

³⁵Pailatehanda ladai bialu lalu, I̱ Yu agali kobe. Í̱ ariarumebi í̱naga loma binigo mo miaga haguane hearumebi i̱na godi loliya í̱ haru ibiyago í̱na agi birigola haru ibiyabe, lene.

³⁶Ani layagola Yasuhanda ladai bialu lalu, I̱ handame ho kogo dindi ogoali ndome handame ho ko. Dindi ogoalime handame ho kole Yu haru haga agalime i̱ bolilono i̱naga haruru ibaganerume wai bidale. I̱ handame ho kogo dindi ogoali ndome handame ho ko, lene.

³⁷Pailatehanda ibuhondo lalu, Aniyagua í̱ handame haga kini mbira kebe, lene. Ani layagola Yasuhanda ladai bialu lalu, Í̱na handame haga kini kebe larigoniore ko. Henene lolene lamiai hole i̱ dindi ogoria dalirugola taba henenego ko. Wali agali henene lolene aria karu bibahendeme i̱naga bi hale hai haga ka, lene.

³⁸Ani layagola Pailatehanda ibuhondo lalu, Henene lolene agilebe, lene. Ani lalu Pailate ibu Yu wali agali hearia tagira puwa tihondo lalu, Ibugua ko bini mbira nawidago

³⁹tínaga manani Bolangua Halu Penegonaga Horo harangi garabaya agali mbira golope holiya langeramiligo áyu Yu wali agalinaga handame haga kini golope holiya manda bidamibe, lene.

⁴⁰Ani layagola tigua hongo howa ladai bialu lalu, Agali ogoni ndo. Barabasa ibu golope habe, lene. Barabasa ibu page bia agali ba biagane hene.