Read Huli Yone 4 Bible Online

Yone 4 - Huli bible

Yone 4

¹Yonehanda wali agali baboraya biyaru emene lowa Yasuhanda dewaore bialu ka, lalu marume layane Perisi agalirume hale hene.

²Yasu ibunime mbirali baboraya nabi ibunaga talima piagarume dege ani bini.

³Ogonidagua layago hale howa Yasu ibu Yudia wahalu Galili dai bini.

⁴Galili pole Samariani pialu polene wini.

⁵Ani pialu Samariaha Saiga tano anda pene. Tano ogoni bamba Yagabahanda Yosebehondo dindi tu wa minigo ogoriani kaware wini.

⁶Dindi ogoriani pialu howa horombe hanuni hayagola Yasu ibu bamba Yagabahanda iba hambiagane uli wene wiagoria pialu ibunaga ge hi howa ogoriani ha̱lo berene.

⁷Ani berearia Samaria wali mbira iba hambule ibiyagola Yasuhanda ibuhondo lalu, Iba noliya hambu ngi, lene.

⁸Ibunaga talima piaga biaru ti tanoha tomo mo piyagola ibu berene.

⁹Ani layagola Samaria wali biagome ladai bialu lalu, Í̱ Yu agali ndobe. I̱ Samaria wali bedogo iba noliya hambu ngi larigo agibe, lene. Yu wali agalime Samaria wali agali heba mandagi nahaga hene.

¹⁰Ani layagola Yasuhanda ibuhondo ladai bialu lalu, Ngode Datagaliwabehanda ngiagagobi agali í̱hondo iba noliya hambu ngi lalu kagonibi manda bidele nde í̱na ibuhondo iba ngi ledele. Ani ledele nde ibugua iba haabo holene ngiaganego ngidale, lene.

¹¹Ani layagola wali biagome ibuhondo lalu, Agali-o í̱ iba hambiagane be nayi kego iba ogo uli unuraha bedago haabo holene iba agoha hambuleberebe.

¹²Iba hambiagane uli ogoni bamba ina mamali Yagabahanda ina ngini. Ibunibi ibu iginirubi ibunaga nogo sibirubi ti iba uli ogoniha bedago naga hene. Ibu agali timbuni henego í̱ ibu ale ndo agali daligaore kebe, lene.

¹³Yasuhanda ladai bialu lalu, Wali agali iba uli ogoha bedago narago lone noa holebira.

¹⁴Mbirali iba i̱na miagane yidogo narago ibu lone noa naholebira. I̱naga iba ibuha duguaho wiaabo haragola ibu iba noa nahe howa haabobo holene yulebira, lene.

¹⁵Ani layagola wali biagome Yasuhondo lalu, Agali-o i̱ iba lone noa naholiyabi iba uli ogoha lone hambu dai nabuliyabi iba ogoni ngi, lene.

¹⁶Yasuhanda ibuhondo lalu, Í̱ agalini damu puwa libu haru ogoria dai bilibu, lene.

¹⁷Wali biagome ladai bialu, I̱ agalini nahe, lene. Yasuhanda ladai bialu lalu, I̱ agalini nahe larigo tiga tiga langiri.

¹⁸Í̱ agali duria pirigo mbira áyu pu bedegonibi í̱ agaliniore ndola bedego heneneore langiri, lene.

¹⁹Ani layagola wali biagome ibuhondo lalu, Agali-o í̱ Ngode Datagaliwabe mana latagi hagaoredane hendedo.

²⁰Ina mamalime hari ogoria howa Ngode Datagaliwabe mitangi bialu lotu laga henego. Áyu tí Yu wali agalime Yarusalemeni howa hangu Ngode Datagaliwabe mitangi bialu lotu lolene nga laramili, lene.

²¹Yasuhanda ibuhondo lalu, Wali-o bi mbira larogo manda bialu yu tiga bibe. Emene howa wali agalime hari ogoriani howabi Yarusalemeni howabi Aba Ngode Datagaliwabe mitangi bialu lotu nalolebira.

²²Tí Samaria wali agalime mbirali ai mitangi bialu lotu laramiligo tí manda naberamili. Ina Yu wali agalime Ngode Datagaliwabe kago manda buwa ibu mitangi bialu lotu laramaligo irane pele mulene Yualiha howa ibaga.

²³Wali agalime Ngode Datagaliwabe Dinininaga hongome Aba henene ka lalu ibugua hame ledadagua tigua ibu mini yaraga holebira. Nde ani bulene tu áyu haragoni.

²⁴Ngode Datagaliwabe ibuni Dinini kago wali agalime Ngode Datagaliwabe mini yaraga holene nga manda biyagua nde tigua ibu Dinininaga hongome Ngode Datagaliwabe henene kagobi ibu mitangi bialu lotu lolene nga, lene.

²⁵Ani layagola wali biagome ibuhondo lalu, Mbirali Dabo Helenego ibulebira lowinigo ibiragola ibugua galone bibahende ngago langiai holebiralo manda bido, lene.

²⁶Yasuhanda ladai bialu lalu, Áyu í̱ heba te lalu kagoni i̱ ogoni kogoni, lene.

²⁷Bi ogoni lalu heaore ibunaga talima piaga biaru dai bialu hearia Yasu ibu wali heba te lalu heago hondowa ti mogo lo hendene. Mogo lowa tigua wali biagohondo, Í̱ agi mo ibiribe, lolenebi Yasuhondo, Í̱ wali heba te lalu kego agibe, lolenebi ogoni latagi nahe hene.

²⁸Wali biagome ibunaga iba be o biagoriani ngelalu tanoha dai buwa wali agali hearuhondo lalu,

²⁹Agali mbira kago ibugua i̱na biniru bibahende langiai hayago ibu Mbirali Dabo Helenego ibulebira lowinigo mbauleyago hondo ma, lene.

³⁰Ani layagola tigua tano biagoha howa Yasu hondole ibini.

³¹Wali biago peaha talima piaga biarume Yasuhondo lalu, Lawai haga-o tomo na, lene.

³²Ibugua ladai bialu, I̱ tomo nolene ngogo tí manda nabi kami, lene.

³³Ani layagola talima piaga biarume tini degedege lagalaga bialu lalu, Ibunaga tomo mbiralime yu íbu miyadago aiwadabe, lene.

³⁴Yasu ibugua tihondo lalu, Mbirali i̱ pu layago ibugua bibe layadagua bulenebi biabe buliya ngiyago bu maro biai holenebi i̱naga tomo ogoni, lene.

³⁵Ibugua lalu, Tígua, Ege maria howa widi lini gandu lolene tu holebira, laramiligo i̱na tíhondo au laro. Áyu mabu bayuwa handawa bidaba. Widi lini bogabidago gandu lolene tu hayada, lene.

³⁶Mbirali áyu widi gandu lalu kago ibu yolo mialu haabobo holenaga gandu lalu ka. Anigo mbirali egene polalu kagobi mendeali gandu lalu kagobi libu mandagi howa turu holebira.

³⁷Bi henene mbira laganego ogo, Mbiralime egene polaga mendealime gandu laga.

³⁸Tígua egene polene ndo wiagoria i̱na tíhondo gandu lole pudaba laro. Maru ti biabe bu wiagoha tí karulo harimi, lene.

³⁹Wali biagome, I̱na bibahende biniru damene langiai haya, layago hale howa Samaria wali agali dewame Yasuhondo mini mbiraore wini.

⁴⁰Tigua Yasu hearia ibuwa ibuhondo lalu, Í̱ ina hebaore hami̱ya hame ledama, layagola Yasu ibu ti heba horo kiru hene.

⁴¹Wali agali dewaoreme Yasuhanda bi layago hale howa ibuhondo mini mbiraore wini.

⁴²Ani wuwa tigua wali biagohondo lalu, Í̱na bi larigo dege hale howa ndo ibuninaga bi layago hale harimagome ibuhondo mini mbiraore wu kama. Ibu wali agali bibahendenaga Pele Miagaore ka mandabu kama, lene.

⁴³Yasu ibu horo kiru Samaria wali agali heba halu Galili pene.

⁴⁴Ala Yasuhanda lalu, Ngode Datagaliwabe mana latagi haga agaligo ibu damene ibuni daluni karume ibu mitangi nabiaga ka, lene.

⁴⁵Yasu ibu Galilini anda pialu hearia wali agali hearume turu howa íbu ngoai hene. Irane ala Bolangua Halu Penegonaga horo timbuni tagira ibiyangi wali agali urunime lotu lolebi tomo nolebi Yarusaleme puwa Yasuhanda biyago bibahende ti de handai henegonaga turu ho hene.

⁴⁶Ala Yasuhanda Galiliha tano mbira mini Kainani howa iba mo waini iba hayagoha ibu lone pene. Dindi ogoriani gabumane agali mbira heago ibu igini Kabaniama tanoni warago bo wini.

⁴⁷Ibugua Yasu Yudia howa Galilini íbu ka layago hale howa Yasu hearia ibini. Ibuwa ibugua Yasuhondo lalu, I̱ igini áyu ogoni tongolo mibeheore ngago ibu nahome dabi helo Kabaniama mba, lene.

⁴⁸Yasuhanda ibuhondo lalu, Tígua agalime nabiagane alebi nahendene alebi nahende howa i̱hondo mini mbiraore nawuleberami, lene.

⁴⁹Gabumane agali biagome ibuhondo lalu, Agali-o i̱ igini homoligo abale mba, lene.

⁵⁰Yasuhanda ibuhondo lalu, Í̱ igini dabi holebirago pamia, lene. Ani layagola hale howa agali biagome Yasuhanda bi layago yu tiga bialu pene.

⁵¹Andaga dai bialu hearia ibunaga garabaya biabe ale bia haga hearume ha obeneni lola howa lalu, Í̱ igini dabi ho ka, lene.

⁵²Agali biagome lalu, Angi dabi hayabe, lene. Tigua ladai bialu, Abe ni ande layagola warago dabi haya, lene.

⁵³Igiri aba biagome mitangi bialu Yasuhanda, Í̱ igini dabi holebira, layangiore dabi hayadalo manda bini. Ani manda buwa agali biago ibunibi ibu damenebi ti bibahendeme Yasuhondo mini mbiraore wiai hene.

⁵⁴Yasu ibu Yudia howa Galili ibuwa ibugua agalime nabiagane ale halu mende ogoni bini.