Read Huli Yone 5 Bible Online

Yone 5 - Huli bible

Yone 5

¹Ani bialu howa Yasu ibu Yarusalemeni Yu wali agali ti bibahende lotu lolebi tomo nolebi ngoai hagane horongi ngoai hayagoria pene.

²Yarusalemeni wai pabe haraba timbuni mbira mini Nogo Sibi Panga laga heago kawareni iba emene mbira berene. Hiburu bi lalu iba ogoni mini Bedeseda laga wini. Anda mbira haraba duria wi heagoria wali agali de koheru ge koheru kuduguheru dewaore iba ogoni angeni biru wini. [Mbiruore uliningi Anduane Homogonaga dahuliyalime daluwa iba ogoni mo lumulumu bigi bia haga berene. Lumulumu bialu kagoha ala pora birago ibu mo dabi haga wini. Ani biagago manda buwa wali agali urunime abale pora bule lowa nende bia ho biraga biaga wini.]

⁵Agali mbira ibu warago bo wiane dege mali pira tebirani halira (38) pene wiago

⁶Yasu ibu de handalu ibu bambaore howa warago bo wiaabo heneda manda buwa ibuhondo lalu, Í̱ dabi holene hamelo bedebe, lene.

⁷Ani layagola ibugua ladai bialu lalu, Agali-o iba lumulumu bialu kaore i̱ mo yalu puwa ibira holene mbira nahedagola wene pialu koore dege maru ti abale pora biaga, lene.

⁸Ani layago hale howa Yasuhanda ibuhondo lalu, Heyalu í̱naga tamunguru mo yalu pu, lene.

⁹Ani layangiore agali warago bo wiraligo mo dabi haya handala ibunaga tamunguru mo yalu pene. Agali ogoni mo dabi hayadago Sabada horongi mo dabi hene.

¹⁰Agali dabi hayagome ibunaga tamunguru mo yalu piyadago Yu wali agalinaga haguane hearume hondowa ibuhondo lalu, Áyu Sabadangidago inanaga Mana lowini ngagome mbirale mbira yalu polene nawi longago í̱naga tamunguru yalu porego agibe, lene.

¹¹Ibugua ladai bialu, I̱ mo dabi hayadago ibugua í̱naga tamunguru mo yalu pu laya handala yalu porogoni, lene.

¹²Ani layagola tigua lalu, Í̱naga tamunguru mo yalu pu layadagoni agali aiwa layabe, lene.

¹³Agali dabi hene biagome lalu, I̱ aiwa mo dabi hayabe manda nabido, lene. Yasuhanda agali biago mo dabi halu ibu wali agali dewa bu heagoha piyiyagola agali biagome agohayagi piyabe toba howa ani lene.

¹⁴Maha Yasu ibu Anduane Homogonaga anda tamuha pialu hearia ibugua agali biago hearia de hondowa ibuhondo lalu, Áyu í̱ dabi ho kegonigo mani mo ko holene mbira í̱ha wuligo mana ko nabi bayale hangu bialu habe, lene.

¹⁵Ani layago hale halu agali biagome puwa Yu agali haguane hearuhondo lalu, I̱ mo dabi haya larugo Yasuhandaya, lene.

¹⁶Ani layago hale howa Yu agali biarume, Sabada horongi nabulene winigo birida, lowa Yasu mo tandaga halu hene.

¹⁷Ani bialu heagola Yasuhanda ladai bialu lalu, I̱ Abahanda biabe biaabo halu kadagua i̱nabi bialu kogoni, lene.

¹⁸Yasuhanda bi ani layagome Yu wali agalinaga haguane biaru ti mo kebaore hene. Keba henego Yasu ibugua Sabada horongi puguayagonaga hangu ndo. Ngode Datagaliwabe i̱ Aba layago mine halu Ngode Datagaliwabela iya ogobi labolabo kaba lalu laya manda buwa tigua ibu homelo bo wahole manda bialu hene.

¹⁹Ani bu heagola Yasuhanda tihondo lalu, I̱na tíhondo heneneore langerogo. Igini ibuni hangume manda bialu mbira nabiaga. Ibu Abahanda birago hondowa ibugua biradagua hangu bulebira.

²⁰Abahanda ibu Igini gubalini timbuniore howa ibugua birago bibahende ibu Igini walia haga. Ibu Iginime biabe hongohe taraore áyu birane handarimigobi ndo timbuniorebi bilo walia holebira. Anidagua birago hondowa tí mogo loleberami.

²¹Abahanda wali agali homenego mo heya halu holene gahenge miagadagua ibu Iginimebi ani dege bialu holene gahenge ibuni mua biragohondo mulebira.

²²Aba ibunime wali agalime biragonaga daba ki nabulebira. Ibu Igini hangume bibahende daba ki bilo heleda.

²³Ani heledago irane wali agali bibahendeme Abanaga mini mo yaraga hagadagua ibu Igininaga minibi mo yaraga helo heleda. Mbirali Igininaga mini mo yaraga nahe kagome Aba ibugua i̱ pu layagonaga minibi mo yaraga nahaga dege ka, lene.

²⁴Tíhondo heneneore laro. Wali agalime i̱naga bi larogo hale halu bialu kagobi i̱ pu layagohondo mini mbiraore wialu kagobi ogoni ibu haabobo holene yu halu ibugua biyagonaga dabolene nawulebira. Ogoni ibu ala homaganehayagi henego áyu haabobo holenehayagi porabu ede ho ka, lene.

²⁵Yasuhanda laabo halu lalu, Tíhondo heneneore laro. Horo mbira tagira ibulebira lowinigo áyu tagira ibiragonigo ibiragola homene homaliha padarume Ngode Datagaliwabe Igininaga bi hale holebira. Hale hararume heyulebira.

²⁶Aba ibuniha holene tene ngagobi Igini ibuhabi holene tene ngeleda.

²⁷Ani buwa Ngode Datagaliwabehanda wali agali biraligonaga dabolene ibu Igini ibu Agali Hole Ibiyago ka lowa ibugua ibuhondo hongo mini.

²⁸Áyu o larogo hale howa mini mogo nalalimu. Horo tara tagira ibulene kaware ngago tagira ibirangi homaliha hora heneru bibahendeme ibunaga bi hale halu

²⁹heyalu tagira ibai holebira. Bayale bialu haga heneru heyalu ti haabobo holenehayagi pu hadaba lolebira. Ko bialu haga heneru heyalu ti baba godi lowa pani nolenehayagi pu hadaba lolebira, lene.

³⁰I̱ni manda bialu agua labehedago lowa mbira nalaruli. I̱ Abahanda, Agua lolene nga, lalu langirago hale howa hangu laruli. Dabolene ngadaguaore lo tiga biruli. I̱ni hameme mbira bupe halu nabiruli. I̱ pu layagome hame ledadagua hangu biruli.

³¹I̱na agua biruli lalubi i̱ ogobi ko lalubi koyagua nde henene ndo lare lolene nga.

³²Mbirale i̱na biaganego agua biaga lalu mbiralime lamialu kago henene biruligobi tiga tiga lamialu ka manda bu ko.

³³Tínaga bi lamule piagarume Yone hearia piyagola ibugua tihondo bi lamiyagoni henene hangu lamiya.

³⁴I̱na agalime i̱ kogobi henene ka lelo manda buwa ndo tí pele ngulenaga manda buwa laro.

³⁵Yone ibu lamu hale ale dalu howa wá timbuni hagadagua ibuni wá ho heago handarimingi turu ho harimi.

³⁶Yonehanda i̱ tíhondo emene walia haya. I̱ Aba ibunime mo hongo haragola biabe buliya ngiyago bialu kogome i̱ tíhondo timbuniore ogonime walia haragoni. Ogoni hondowa i̱ Abahanda i̱ pu layagola ibinida manda bibehe kami.

³⁷I̱ Aba i̱ pu layago ibunime bi i̱ henene kogobi lalu ka. Tígua ibunaga bi hale nahene halu ibunaga denguibi nahendene kami.

³⁸Ibugua pu layagola ibiyagohondo mini mbiraore nawi kamigome ibunaga bi mana tí bu miniha yu tiga nabi kami.

³⁹Anduane Homogonaga mbugaha haabobo holene handa walia hole manda buwa daga laabo haramiligo nde Anduane Homogonaga mbugani lo ngagome i̱ tíhondo walia haga nga.

⁴⁰Ani bidago áyu i̱na tíhondo holene gahenge nguliya i̱ kogoria ibulene manga halu kami.

⁴¹Agalime i̱naga mini mo yaraga helo hame lowanaga ndo laro.

⁴²Anigo i̱na tínaga bu miniha kamigobi manda bidogo tígua Ngode Datagaliwabehondo gubalini holene tíha nawiore kamilo manda bido.

⁴³I̱ Abanaga minini howa íbu kogo tígua i̱hondo turu halu ina hami̱ya ibinida lowa i̱naga bi yamia nabi kami. Agali tara mbira ibuninaga minini howa ibiyagua tígua ogoni ibunaga bi larago turu halu ina hami̱ya lowa abale yamuleberami.

⁴⁴Ngode Datagaliwabe mbiraore hangu kago ibugua tínaga mini mo yaraga helo ha nabi howa tínime tíninaga mini mo yaraga haga haga bialu kami. Ani bialu haabo howa i̱hondo mini mbiraore agua wuleberamibe.

⁴⁵Tígua bialu kamigoni agua biya lalu manani dabelo i̱na i̱ Aba lamulebiralo manda nabilimu. Mosesehondo tígua mini dunubia ho harimigo ogoni ibugua tígua bialu harimidagoni agua biya lalu manani dabelo i̱ Aba lamulebira.

⁴⁶Iname Mosesenaga bi hale howa mini mbiraore wu kama, lalu kamigo ibuhondo mini mbiraore heneneore ngamile nde i̱naga bi hale howa i̱hondobi mini mbiraore ngamile. Ibugua i̱ lalu bi te gilibu wini ngagoni.

⁴⁷Ibugua i̱ lalu gilibu wini ngago hondowa mini mbiraore nawi kamigoria i̱naga bi hale halu mini mbiraore agua wuleberamibe, lene.