Read Huli Yone 9 Bible Online

Yone 9 - Huli bible

Yone 9

¹Yasu pialu hearia agali mbira ibu ai̱yahanda de kohe ogonibi taba henenego de kohe haabo heago de hendene.

²Ibunaga talima piaga biarume ibuhondo lalu, Lawai haga-o agali ogoni de kohe henedago ibuni ko biyagonaga pani nalu de ko henedabe be ibu aba ai̱yalame ko biyagonaga pani nalu de ko henedabe, lene.

³Ani layagola Yasuhanda ladai bialu lalu, Ibuni ko biyagonagabi ibu aba ai̱yalame ko biyagonagabi pani ndo. Ngode Datagaliwabenaga hongo ibuni howa walia helonaga de ko hene.

⁴Áyu wá kangi i̱ pu layagonaga biabe bialu hami̱ya. Aruma holene tagira ibirangi biabe bulene henge nawulebira.

⁵I̱ dindini kongi dindi bibahendeni karunaga wá holene i̱ ko, lene.

⁶Ani lowa Yasu ibu hamiaga dindini tolope howa dindi wiago gime mo waru howa agali de kohe biagonaga deni yiyu lalu howa ibuhondo lalu

⁷Sailoama Iba bedagoria í̱naga de domole pu, lene. Sailoama inanaga bi lalu, Pu lene. Ibugua layadagua domo pialu dai bialu dengala ho yalu dai bini.

⁸Dai biyagola ibula handa a̱i̱ na̱i̱ paliagarubi ibu tomo muniru ngi laabo halu berearia de hendene wali agali hearubi tigua lalu, Agali de kohe tomo muniru ngi laabo halu biraraligo agali ogoni ndoyagodabe, lene.

⁹Marume, O biagonioreda, lene. Marume, O biagoni aleda, lene. Ani layagola agali biago ibunime lalu, I̱ agali o biagoniore kogoni, lene.

¹⁰Tigua ibuhondo lalu, Í̱naga de agua buwa bayale hayabe, lene.

¹¹Ani layagola ibugua ladai bialu lalu, Agali mbira mini Yasu ibugua dindi mo waru howa i̱naga deni yiyu lowa lalu, Í̱naga de Sailoama Iba bedagoria domole pu, layagola domo pirugola dengalalu bayale haya, lene.

¹²Tigua ibuhondo lalu, Áyu agali ogoni ibu agoha kabe, lene. Ani layagola ibugua lalu, Ibu agoha piyabe i̱ manda nabido, lene.

¹³Wali agali biarume agali de mo baya hayago Perisi agaliru hearia haru pene.

¹⁴Yasuhanda mo waru howa ibunaga de mo baya hayago Sabada horongi mo baya hene.

¹⁵Perisi agali tigua ibuhondo lalu, Í̱naga de agua buwa bayale hayabe, layagola ibugua tihondo lalu, Agali mbirame i̱naga deni warume yiyu laya ogoni domarugola dengala henego bayale handalu ko, lene.

¹⁶Ani layago hale howa Perisi agali marume lalu, Agali ogoni Ngode Datagaliwabe howa ibini ndoda. Sabada horo mitangi nabi howa puguayada, lene. Marume lalu, Ibu ko biaga kale ibugua agalime nabiagane ale gibi o biyadagonidagua bibehe kalebe, lene. Ani layagola ti talebu ki hene.

¹⁷Ani bialu howa Perisi agalirume agali de ko hene biagohondo lone lalu, Í̱naga de mo ngala hayadago manda buwa ibu agi biaga agali ka manda bu kebe, lene. Ani layagola ibugua ladai bialu lalu, Ibu Ngode Datagaliwabe mana latagi haga ka manda bido, lene.

¹⁸Ibu ai̱yahanda de kohe ogonibi taba henenego ayure mo dabi haya layago Yu wali agali haru haga biarume hale howa ke̱ harabe toba howa ibu ai̱ya abala ibilo olene.

¹⁹Ibiyagola tigua libuhondo lalu, Libu igini de kohe taba henene larabiligo ogonibe. Ibuyagua de bayale howa handalu kago agua hendenebe, lene.

²⁰Ani layagola ibu ai̱ya abalame ladai bialu lalu, Iyanaga igini ogoni de koheore taba henenego manda bu kaba.

²¹Ibu áyu de bayale howa handalu kago agua buwa bayale halu handayabe aiwa mo ngala hayabe iya manda nabi kaba. Ibu miniwi kago ibuni tí langulebirago ibunihondo hale hadaba, lene.

²²Ibu ai̱ya abalame Yu agali hondowa gi ho howa ani lene. Yu wali agali haru haga tigua ala lalu, Mbiralime Yasu ibu Mbirali Dabo Helenego íbu ka lalu latagi hayagua iname agali ogoni ngoai hagane andaha howa bo ba tagi halu puabo heloleberama, lene.

²³Ani lenego manda buwa ibu ai̱ya abalame gi howa lalu, Ibu miniwi kago ibuni langulebirago ibunihondo hale hadaba, lene.

²⁴Yu agali tigua agali de kohe hene biago halu mende olowa lalu, Í̱ Ngode Datagaliwabe deni howa bi henene lolebero labe. Ina agali ogoni ko biaga ka manda bidamago, lene.

²⁵Ibugua ladai bialu lalu, Ibu ko biaga kabe nabiaga kabe i̱ bayuwa manda nabido. I̱ mbira dege manda bidogo langero. I̱ de ko haabo henego ibugua mo dabi hayagome áyu de handalu kogoni, lene.

²⁶Tigua ibuhondo lalu, Ibugua í̱hondo agi biyabe. Í̱naga de ko henego agua mo ngala hayabe, lene.

²⁷Ibugua ladai bialu lalu, Tíhondo abale langirugo hale naharimibe. Lone gonana bialu haabo kamigo agi. Tíbi ibunaga talima piaga dege holenaga lalu kamibe, lene.

²⁸Ani layagola tigua ibu mege bialu lalu, Ibunaga talima piaga í̱ kego ina Mosesenaga talima piaga kamago.

²⁹Ngode Datagaliwabehanda Mosesehondo bi laminigo ina manda biai kamago. Agali ogoni ibu ani howa ibinibe ina manda nabi kama, lene.

³⁰Ani layagola ibugua ladai bialu lalu, Aya. Ibugua i̱naga de mo ngala haya hondowa ibu ani howa ibiyabe tí manda nabi kamigoni.

³¹Ko biaganaga bi Ngode Datagaliwabehanda hale nahagane manda bidama. Mbiralime Ngode Datagaliwabehanda hame ledadagua bialu ibu mini yaraga hayagua ogoninaga bi ibugua hale hagane manda biai kama.

³²Dindi ogo pigane wabiniyangi howa mbiralime mbiralinaga de ko henego mo ngala haya lalu mbira layaria hale nahe harimago.

³³Agali ogoni Ngode Datagaliwabe howa ibini ndo kale ibu mbira bibe nahe kale, lene.

³⁴Ani layagola tigua ibuhondo ladai bialu lalu, Í̱ ai̱yahanda í̱ koha howa taba hanayagola koha howa anda ho daga hene kego. Í̱ aleme ina lawai hole manda berebe, lene. Ani lowa tigua ibu ngoai hagane andaha howa bo ba tagi hene.

³⁵Ani bo ba tagi haya layago hale howa Yasu ibugua agali biago hearia puwa lalu, Agali Hole Ibiyagohondo mini mbiraore wu kebe, lene.

³⁶Ibugua ladai bialu lalu, Agali timbuni-o ibu ai kabe mini mbiraore wuliya langi, lene.

³⁷Yasuhanda ibuhondo lalu, Í̱na ibu de hendedegoni. Ibugua áyu í̱la bi laragoni, lene.

³⁸Ani layagola ibugua lalu, Anduane-o i̱na í̱hondo mini mbiraore wero, lowa Yasu buhayagi ibu ge duli hanga ho berene.

³⁹Yasuhanda lalu, I̱na wali agali daba ki bule dindini íbu kogoni. De kohe karu de hendelo de handaga karu de ko helo ogoninaga íbu ko, lene.

⁴⁰Ani layago Perisi agali maru hale ho hearume ibuhondo lalu, Inabi de kohe dege kamane hondowa laribe, lene.

⁴¹Yasuhanda tihondo lalu, Tí de kohe kamile tínaga ko nangalego tígua lalu, Ina de handaga kama, lalu kamigome tínaga ko wiaabo kagoni, lene.