Read Huli Abosolo 1 Bible Online

Abosolo 1 - Huli bible

Abosolo 1

¹Tiobilasa-o Yasu ibunaga biabe pigane teniyagoria howa ibu dahuliya andaga iraga holene tu helo howa ibugua biabe biyagobi bi mana lawai hayagobi bibahende i̱na i̱naga mbuga mbira ala gili birugoriani gilibu wiai harugoni. Yasu ibu iraga nahe howa ibugua Ngode Datagaliwabe Dinininaga hongome agali abosolo helo dabayaruhondo, Ogodagua bilimu ogodagua lalimu, laga bialu lalu lamiai hene.

³Yasu homalu mo heya howa horo pira mariani (40) halu dewaore ibuni walia hayagola tigua Yasu de handalu ibu heba haabo hene. Ibu heba halu tigua Yasu ibuniore heyu kagoni lowa manda biaiore hene. Yasu ti heba howa ibugua Ngode Datagaliwabehanda Handame Ho Kagonaga mana lamialu hene.

⁴Ibugua tihondo hongo howa lalu, I̱ Abahanda mbirali ngulebero lalu lo ngago ngulebira lalu abale langirudagua ogoni ngilo Yarusaleme wahalu napilimu.

⁵Yonehanda wali agali ibame baboraya binigo horo marudaru mbira howa Ngode Datagaliwabehanda ibu Dininime tí baboraya bia holebira, lene.

⁶Abosolo biaru Yasu heba mandagi ngoai ho biruwa tigua Yasuhondo lalu, Anduane Homogo-o Isaraele wali agali inaneme handame ho holoma̱ya í̱na handame holene inahondo ngia dai bulenengi áyu ogonibe, lene.

⁷Ani layagola Yasuhanda tihondo lalu, Maha tara tara bulenenaga horo i̱ Aba ibuni hangume ala manda manda buwa pongo bo wini ngago tínaga biabe ndo.

⁸Ngode Datagaliwabe Dinini ibu tí kamigoha ibiragola ibunaga hongo holene tíha to̱lai holebira. Ani biragola tí Yarusalemehabi Yudia bibahendehabi Samariahabi dindi timbuni ogo gibuni gibunihabi Yasuhanda agua laya agua biya lalu i̱ mo walia hagane tí holeberami, lene.

⁹Yasuhanda bi ogoni lai hayagola tigua handaya ho hearia ibu dahuliya andaga yaraga hayagola beralibame ibu ge hayagome ti Yasu lone handabe nahe hene.

¹⁰Ibu piyagola tigua hari daligaha handa daga ho hearia aguabe tobane buwa agali kira aga peleorebi ogobi labolabo ti heagoria abale ha pani hene.

¹¹Ani ha pani howa agali biago labome lalu, Galilialiru-o tí hari daligaha handa daga ho kamigo aginagabe. Yasu tí heba mandagi hemira howa Ngode Datagaliwabehanda ibu dahuliya andaga helo mo yaraga hayago de handarimigo Yasu o piyagonidaguaore dai bulebira, lene.

¹²Ani laya handala abosolo biaru Hari Olibe heagoria howa Yarusaleme dai bini. Hari Olibe weagoria heagoria howa Yarusaleme polene emene kaware dege wini.

¹³Ti Yarusaleme anda puwa tamu hobane daligani tini hagaha iraga halu anda pene. Pidabi Yonebi Yamesebi Andurubi Pilibibi Tomasabi Badolomiubi Madiubi Alibiasa igini Yamesebi Saimono ka̱i̱ mini mende Paidoro ibubi Yamese igini Yudasabi

¹⁴agali urunime Ngode Datagaliwabehondo bi lole mandagi ngoai haga hene. Wali marubi Yasu ai̱ya Meribi Yasu hamenerubi abosolo biaru heba ngoai howa Ngode Datagaliwabehondo bi laga hene.

¹⁵Horo maru howa Yasu mana yu tiga biaga hearu bibahende lamaga howa handari mbirani pira kira (120) agima ngoai ho heagola Pidahanda heyuwa tihondo lalu,

¹⁶Hamene mbaliniru-o Ngode Datagaliwabe Dinini ibugua Debidiha howa lalu Yudasahanda bulebiragonaga mbiwia ho wini. Ani binigo agali hearume Yasu minilo Yudasahanda walia hayagola Anduane Homogonaga mbugani lo winidagua lola haya.

¹⁷Ina heba biabe mandagi buluma̱ya Yasuhanda Yudasa dabayagola ibu ina aria hene, lalu Pidahanda lene.

¹⁸Yudasa ibu ko biyagonaga muni yolo miyagome dindi mbira tu wini. Ani buwa dindi ogoriani ibuni homo ibira howa tombe tula lowa tini tagira ibiyagola tongo lene.

¹⁹Wali agali Yarusalemeni hearu bibahendeme ogonidagua biya layago hale howa tigua tininaga bi lalu dindi ogoni mini Ageledama wini. Inanaga bi lalu Darama Dindi.

²⁰Pidahanda lalu, Iba Gana mbugani bi mbira lo ngago ogo, Ibunaga anda tabuanda helobi ibu anda ogoniha mbirali napalelobi, lalu gilibu nga. Bi mendebi lo ngago ogo, Biabe ibugua biaga wiyago mendealime bilo aribia holene nga, lalu gilibu nga, lene.

²¹Bi ogoni gilibu ngago mitangi bialu agali mbira ogobi dabami̱ya. Ngode Datagaliwabehanda Yasu mo heya hayago de hendenego helolene nga. Agali ogoni ibu Anduane Homogo Yasu heba ibaga bialu mandagi harimangi howa henegobi Yonehanda baboraya bialu hayangi howa Yasu hari daligaha Ngode Datagaliwabehanda mo yaraga hayangi howa henegobi bibahende biyago handai henego agali ogonibi mbira ina heba helo dabami̱ya, lene.

²³Pidahanda ani layagola tigua agali kiranaga mini mo wini. Agali mendego mini Yosebe maru hearume ibu mini Basabasa lalu marume Yasadasa laga hene. Mendego ibu mini Madaiasa.

²⁴Ani mo wuwa ti Ngode Datagaliwabehondo bi lene. Tigua lalu, Anduane Homogo-o wali agali bibahendenaga bu habaneha í̱ handai ho kegoni. Agali ogo labo dabarimago mendealigome Yudasahanda abosolo biabe biala ho ngelayago bu yolo mialu helo í̱na mbira dabarigo ina walia habe. Yudasa ibuni pole heneyagoha pole abosolo biabe ogoni wahalu piyago, lene.

²⁶Ngode Datagaliwabehondo bi lowa tigua o biago labonaga mini gilibu gambiruwa mo ema biyagola Madaiasa mini ala tagira ibiyagola ibu helene. Ani bialu abosolo beriali (11) biaruha ibu hombeane (12) ha tago hene.