Read Huli Abosolo 22 Bible Online

Abosolo 22 - Huli bible

Abosolo 22

¹I̱ aba hameneru-o tígua i̱hondo, Biri, larimigonaga i̱na nabi lalu ladai berogo hale halimu laro, lene.

²Ani lalu hearia Yualinaga bi lowa layago hale howa agali hearume bi mbira nale nimulo hene. Nimulo heagola Polo ibugua lalu,

³I̱ Yualiore ko. Silisia dindinaga tano Tasasa i̱naga dalu ogoni. Oali Yarusalemeni íbu hewaria Gamelielehanda i̱ lawai haga hene. Ina mamali Mana lowinigo ngadagua bulene nga lo manda bialu haru. Áyu tí kamirume Ngode Datagaliwabehanda bia laradagua bialu kamidagua dege i̱bi ani bialu haru.

⁴Hariga áyu i̱ni pialu kogoriani ala marume pialu hearia i̱na mo tandaga halu maru homelo baru. I̱na wali agali minuwa garabaya andaha ba andanda biru.

⁵Loma binigo mo miaga haguane timbuni kagobi Ganisolo agali bibahende karubi tigua i̱na larogoni henene binigodagua laralo manda bulebira. Tigua Yu agali tí hamene Damasagasani karuhondo beba i̱ yalu puwa muliya gilibu ngiya. Ngiyagola Hariga áyu i̱ni pialu kogoriani piaga heneyaru ege pu senime dariba howa balu Yarusaleme haru dai bule minu piru, lene.

⁶Polohanda laabo halu lalu, I̱na Damasagasa kaware ngelowa harigani pialu hewaria horombe hanuni hayagola hari daligaha howa abaleore wá timbuni harali haya.

⁷Ani biyagola i̱ dindini odowa pilope ho wiwaria mbiralime lalu, Solo-o Solo-o í̱na i̱ aginaga mo tandaga harilibe, layuagola hale haru.

⁸Ani layuagola i̱na, Anduane Homogo-o í̱ ai kebe, ladai biru. Ani ladai birugola ibugua, Í̱na mo tandaga hariligo i̱ Nasareteali Yasu kogoni, laya.

⁹Agali i̱ heba pirimaru ti wá hayago dege de handaya. Mbiralime i̱hondo bi layuago ibunaga bi ti nahalehe.

¹⁰Ani biyagola i̱na lalu, Anduane Homogo-o i̱ agi buabe, laru. Ani larugola Anduane Homogo ibugua i̱hondo lalu, Í̱ heyalu Damasagasa pu. Anda pialu keria í̱na bulene ngago Ngode Datagaliwabehanda manda manda bu kago mbirali kagome langiai holebira, laya.

¹¹Wá timbuni hayagome i̱ de mo ko hayagola agali i̱ heba pirimaru tigua i̱ gini yalu haru pialu Damasagasa anda pirima.

¹²Agali mbira mini Ananaiasa ibu Damasagasani hene. Ibu Ngode Datagaliwabe mitangi biaga howa inanaga Mana lowinigo ngadagua biaga henego Yu wali agali Damasagasani hearu bibahendeme ibu agali bayale tigabiore ka laga hene.

¹³Agali ogoni ibugua i̱ hewaria ibuwa i̱hondo lalu, Hamene Solo-o í̱ de lone bayale handabe, laya. Ani layaore i̱ de lone bayale handabehe howa ibu de handaru.

¹⁴Ibugua lalu, Ina mamalinaga Ngode Datagaliwabe kago ibugua hame ledago í̱na manda buwa bibelobi ibunaga Biabe Bia haga bu mini tigabiwi kago í̱na de handabelobi ibunime bi larago hale habelobi í̱ dabaya.

¹⁵Í̱na de handarigobi hale harigobi wali agali bibahende lamule ibunaga walia hagane í̱ holebere, laya.

¹⁶Ani lowa ibugua i̱hondo lalu, Ai hondo holene nawi. Áyu ogoni í̱ heyalu baboraya bulene nga. Í̱na ko birigo domo wahai helo Anduane Homogohondo bi labe, lalu laya, Polohanda lene.

¹⁷Polohanda lamiaabo howa lalu, Ani biyagola i̱ Yarusaleme dai biru. Dai buwa Anduane Homogonaga andaha anda puwa Ngode Datagaliwabehondo bi lalu hewaria de gandeba mbira handaru.

¹⁸Handalu hewaria Anduane Homogo ibuni íbu heneyago ibugua i̱hondo lalu, Í̱na i̱naga bi mana lameregola wali agali ogoriani karume hale habe manga holebirago í̱ Yarusaleme abale wahalu polene nga, langiya.

¹⁹Ani langiyagola i̱na ladai bialu, Anduane Homogo-o i̱na ngoai hagane anda bu hearuha pume halu wali agali í̱hondo mini mbiraorewi hearu mini barugoni tini bayuwa manda biai ka.

²⁰Í̱naga walia hagane Sibeni bayangi i̱bi ti heba harugoni. Ibu homolene karulape lalu ibu homelo baga biarunaga labolabo daligani karulagane i̱na wu harugoni, laru.

²¹Ani larugola Anduane Homogo ibugua i̱hondo lalu, Í̱ wali agali taratara kaundia karuha pobelo pu larogoni, laya, Polohanda lene.

²²Polohanda bi layago wali agali bu hayarume bayuwa hale ho howa ibugua wali agali taratara karuha polene te layagola tigua keba halu bi dalimu lalu, Agali ogonibi nahabehedago homelo bo waha, lene.

²³Tigua bi dalimuore lalu tininaga labolabo lerelalu abalu taulo ba dagadaga bialu hene.

²⁴Ani biyagola Lomo ami haru haga haguane biagome ami agali biaruhondo lalu, Ami anda tamuha Polo haru puwa Yu agali karume ibuhondo keba halu bi dalimu larago irane langilo ibu tibume balimu, lene.

²⁵Ani layadagua bialu tigua Polo dariba howa tibume bole biyaria Polohanda ami haru haga mbira heagohondo lalu, Lomo ho tene hene kagome ko biyagonaga godi nale howa ibu tibume bolene karulape lowini ngabe, lene.

²⁶Ani layago hale howa ami haru haga biagome ami haru haga haguane hearia puwa ibuhondo lalu, Agi berebe. Agali biagoni ibu Lomo ho tene heneyago, lene.

²⁷Ani layagola ami haru haga haguane biagome Polo hearia puwa ibuhondo lalu, Í̱ Lomo ho tene hene kebe langi, lene. Ani layagola Polohanda ladai bialu lalu, E̱, lene.

²⁸Ani layagola ami haru haga haguane biagome lalu, I̱ Lomo ho tene holenaga muni timbuni mirugoni, lene. Ibu ani layagola Polo ibugua ladai bialu lalu, I̱ ai̱yahanda i̱ taba hanayangi howa i̱ni Lomoali henego kogoni, lene.

²⁹Ani layagola agali ibu mo bila hole hearume ibu hearia howa ha amu hene. Ami haru haga haguane biagome Polo ibu Lomo ho tene hene ka layago hale howa ege pu senime dariba harugoni mitangi bialu gi hene.

³⁰Yu agalime Polo ibugua ko ogoni biya lalu heago hale howa ami haru haga haguane biagome Polo ibu ko agi biyadabe hai bulebero lo manda bini. Ani lo manda buwa egerebalene ibugua, Ege pu seni Polo dariba hayago hadadaba, lowa loma binigo mo miaga haguane hearubi Yu wali agalinaga Ganisolo agali bibahenderubi mo ngoai hene. Mo ngoai ho heagoria ibugua Polo haru íbu helene.