Read Huli Abosolo 24 Bible Online

Abosolo 24 - Huli bible

Abosolo 24

¹Horo duria howa loma binigo mo miaga haguane timbuni mini Ananaiasa heago ibugua agali ala hene miniwi maru hearubi Lomo mana lo winidagua la haga mbira mini Tedalasa heago tinaga la helo tigua ibubi Sisaria haru pene. Puwa tigua gabumane haru haga Peligisi hearia pialu ibu hale helo Polohanda ko ogo biya lalu lamini.

²Ani lamiyagola godi lalu howa tigua Tedalasa olayagola ibugua Polohanda ko ogo biya lalu bi layago ogo, Peligisi í̱ timbuniore kego. Í̱ mini gigabiwi howa ina haru haabo harigome ina kamagoria mo palia holene wiaabo kagoni. Ina kamaru bayale holoma̱ya mo tiga bulene dewa bialu kego karulapeda.

³Ogonibi bulene ngadagua biame halu kego hondowa ina turu timbuni halu í̱hondo ka̱i̱ laabo haramali.

⁴Í̱naga hale holene henge emene ngago manda buwa i̱na bi nemandi mbira hangu la harogo í̱na ina dara howa bayuwa hale habelo.

⁵Ko bulene tene agali ogonimeyane handa walia kama. Ibugua Yu agali dindi bibahendeni karu mo gungu bia hagabi Nasareteali aria karunaga haru hagabi ibu dege ka.

⁶Ibugua Ngode Datagaliwabenaga anda mo ko holebiyaria minarima. [Inanaga Mana lo winigo ngagome godi lolene lo ngadagua lolene manda bu harima. Ani manda bu hemaria

⁷ami haru haga haguane Lisiasa ibuwa ibugua hongo timbuniore howa ibu haru piya.

⁸Ani buwa Lisiasahanda, Agali ogonihondo ko biri lalu kamiru tígua gabumane haru haga Peligisi ibu hale helo tí ibu karia lamule pudaba, laya.] Agali ogoni í̱na mo bila hariyagua iname ibu ko ogo biya laramago bibahende henene biyadane handa walia holebere, lalu Tedalasahanda lai hene.

⁹Yu agali hearu tiguabi Polohanda ko ogoni biya layago heneneore lara lalu lagimbu bini.

¹⁰Bi ogoni lai hayagola gabumane haru haga biagome Polo ibu bi lelo ibuhondo, Ai í̱ la, lene. Ani layagola Polo ibugua lalu, Dindi ogoria wali agali karunaga godi hale hagane mali dewaoreni í̱ haabo hene kego manda bido. Ani manda bidogo tigua i̱hondo ko ogoni biri layagonaga í̱ hale habelo ladai bule i̱ turu ho ko.

¹¹Ala i̱na Ngode Datagaliwabe mitangi bialu lotu lole Yarusaleme pirungi howa horo áyu hombeane (12) kogo í̱ni manda bibehe ke.

¹²Yu agalime i̱ Anduane Homogonaga andaha mbirali heba lai lalu ndo hewaria de handaya. Wali agali hearu tinaga ngoai hagane andaruhabi tanohabi howa i̱na ti mo gungu bia nahe hewaria ti de handaya.

¹³Tigua áyu ogoni i̱hondo, Ko ogo biri, lalu kago henene larago tí manda bilimulo walia holene mbira nawi.

¹⁴I̱na biruligo la pani harogo ogo. Tigua Hariga i̱ pialu kogo ogoni mo hondo holenaga manada laga kago. I̱na Hariga ogoriani pialu howa ina mamalinaga Ngode Datagaliwabe kago mitangi bialu lotu laruli. Mosese heneyangi Mana lowinigo ngagobi Ngode Datagaliwabe mana latagi haga hearume mbugani bi gili bu winigo ngagobi bibahende i̱na yu tiga bido.

¹⁵Agali o karume wali agali bibahende bayale biagabi ko biagabi ta nabi homaragola howa Ngode Datagaliwabehanda ti mo heya holebiragonaga mini dunu bia ho kadagua i̱bi ani dege mini dunu bia ho ko.

¹⁶Anigo i̱na Ngode Datagaliwabebi agalirubi i̱naga miniha ko mbira do nahe hendelo manda biaabo haruli, lene.

¹⁷Polohanda laabo halu lalu, Ala i̱ Yarusaleme wahalu puwa mali dewa howa i̱na Yu wali agali yagibano hearu biamogo bialu tihondo muni mulebi Ngode Datagaliwabehondo mbirale bo mulebi i̱ Yarusaleme dai biru.

¹⁸Dai buwa i̱ Anduane Homogonaga andaha howa Ngode Datagaliwabe deni dodo nahe holenaga mana biai howa mbira bule ibirugo bialu hewaria tigua i̱ de handaya. I̱ heba wali agali ngoai nahe lai gungubi nabi.

¹⁹Yu agali maru Esia dindini howa íbu hearu ti dege hayagoni. Agali urunime i̱hondo, Í̱ ko biri, lalu kayagua nde í̱ hale habelo tinime bi ogoni lole oali ibulene nga.

²⁰I̱na Ganisolo agalihondo, I̱ mbira nabi, lalu ladai birugo hale hene agali o karume i̱na ko binigo manda bu kayagua nde áyu langilo.

²¹I̱ Ganisolo agali biaru heba howa bi mbira dege larugo ogo, Wali agali homeneru mo heya holebiragonaga i̱ yu tiga bidogo, o larugonaga tígua godi horo áyu ogoni larimi laru, lalu Polohanda lene.

²²Ani layagola Peligisihanda Anduane Homogonaga Harigani piagane mana manda timbuni binigo godi lalu heago lamaro bialu lalu, Ami haru haga haguane Lisiasa ibu ibiragola í̱naga godi lala kamago tigua, Í̱ ko biri, layago biridabe nabidabe manda bulebero, lene.

²³Ani lowa ibugua ami haru haga agali Polo handaya ho hayagohondo lalu, Polo mamage howa dege ibuni bua haradagua bilobi ibunaga nenege karume ibu biamogo bule ibilobi henge mibe, lene.

²⁴Horo maru howa Peligisi ibu one Durusila ibu Yu wali berenego libu haru ibini. Ibuwa Peligisi ibugua, Polo damu pu, layagola Polo haru ibini, Ibuwa ibugua Keriso Yasuhondo mini mbiraore wulene mana lamiyagola Peligisi ibu hale hene.

²⁵Hale ho berearia Polohanda tigabi holenebi mini haru holenebi ina bibahendeme ko birimagonaga Daba Ki Bulene Horo Ngode Datagaliwabehanda pongo bo winigo lola hole wene ibiragobi lalu lamiyagola Peligisi ibu gi howa lalu, Lone hale holene henge ngangi í̱ ibabelo ololiya ai pu, lene.

²⁶Peligisi ibugua Polo heba bi lole olalu wiaabo hayago irane ibuhondo Polohanda muni ngilo hale howa ani bini.

²⁷Mali kira howa Peligisinaga pani Posiasa Pesedasa ibu gabumane haru haga howa ha aribia hene. Peligisihanda Yu agali hearu mo turu hole hame lowa Polo garabaya andaha helaabo hene.