Read Huli Abosolo 26 Bible Online

Abosolo 26 - Huli bible

Abosolo 26

¹Agiribahanda Polohondo lalu, Í̱nime lolene ngadagua labe, lene. Ani layagola Polohanda gi yaraga howa ibuni bialu hayadagua lalu laminigo ogo,

²Kini Agiriba-o Yu agalime i̱hondo, Í̱ ko biri, layagonaga áyu i̱na í̱hondo ladai bule turu timbuni ko.

³Turu timbuni ko larugo irane í̱na Yu wali agali kamarunaga manabi iname taratara manda beramaligobi í̱ manda biaiore kego. Áyu i̱na bi larogo bu ibira howa bayuwa hale habe.

⁴I̱ igiri emeneni howa i̱na bialu harugo Yu wali agali bibahendeme manda bu ka. Pigane i̱naga dindini howabi Yarusalemeni howabi i̱ haabo harugo ti manda bu ka.

⁵Pigane howa ina Ngode Datagaliwabe mitangi bulenenaga mana hongo howa yu karu aria mini Perisi karu ti baba haruligo Yu agali ti manda bu haabo ka. Ti ani manda bu kago tinime loa kayagua langibehe ka.

⁶Ala Ngode Datagaliwabehanda inanaga mamalihondo bi mbira lowinigo bilo i̱na mini dunu bia ho kogonaga áyu godi lalu kamagoni.

⁷Bi lowinigo ogoni hondole inanaga hameigini hombearia (12) karume mini dunu bia ho howa horombe mbiragabi Ngode Datagaliwabe mitangi bialu lotu lalu ibuhondo bi laabo halu ka. Kini-o bi lowinigo ogoni i̱na hondole mini dunu bia ho kogonaga Yu agali tigua, Í̱ ko biri, lalu ka.

⁸Ngode Datagaliwabehanda wali agali homeneru mo heya haga kago mana ogoni tí áyu ngoai ho kamirume yu tiga nabibehe kamigo irane agibe.

⁹Nasareteali Yasu mini mo ko hole i̱nime bulene nga ale biai hole i̱na mitangi bu harugoni.

¹⁰Ani mitangi buwa i̱na Yarusalemeni howa ani bule harugoni. Loma binigo mo miaga haguane hearume i̱ hongo ngiyagola i̱na Ngode Datagaliwabenaga wali agali dewa garabaya biru. Tigua wali agali uruni homelo bolene nga layagola i̱nabi, E̱, larugoni.

¹¹Tigua, Yasu mana waharama, lelo i̱na ti mo la hole manda bialu ngoai hagane anda bibahenderuha pume halu i̱na maru hearuhondo, Ti balimu, laru. Tihondo keba timbuniore halu de darama buwa i̱na dindi tara tara kaundiaha pume halu ti mo tandaga halu harugoni, lene.

¹²Polohanda lalu, I̱na ogonidagua buliya loma binigo mo miaga haguane hearume i̱ hongo ngialu bebanibi gilibu ngiyagola Damasagasa yalu pole pirugoni.

¹³Ai Kini-o ina pialu hemaria horombe hanuni hayagola i̱bi agali i̱ heba pirimarubi ina hemagoria ni ale ndo wá timbuni taraore hari daliga howa hadali ho mabu biyago de handaru.

¹⁴Ani biyagola ina bibahende dindini pilope howa odope ho wimaria mbiralime Yu wali agalinaga bi lowa lalu, Solo-o Solo-o í̱na i̱ aginaga mo tandaga harilibe. Ira dehe ngago hengedalu kego í̱nime í̱ni mo tandaga hare, laya.

¹⁵Ani layagola i̱na ladai bialu, Anduane Homogo-o í̱ ai kebe, laru. Ani larugola Anduane Homogo ibugua lalu, Í̱na mo tandaga hariligo i̱ Yasu kogoni.

¹⁶Í̱ni geme heyu habe. I̱naga biabe bia haga habelo i̱na í̱ dabo helole ha pani ho ko. Áyu í̱na i̱ kogo de handarigobi mani walia holeberogobi wali agali lamulebere.

¹⁷Yu wali agali karubi wali agali tara tara karubi ti karia í̱ pu loleberogo tigua í̱ bo waholilono i̱na pele ngulebero.

¹⁸Í̱na tinaga de mo ngala halu aruma kagoria howa wá kagoria haru polenebi dama Heyolabeme ti haru kagoria howa Ngode Datagaliwabehanda haru kagoria haru polenebi í̱na ani bulebere. Ani beregola tigua i̱hondo mini mbiraore wiragome i̱na tinaga ko biyago domo wahowa ti wali agali Ngode Datagaliwabehanda dabene karuhayagi helo helolebero, laya, Polohanda lene.

¹⁹Polohanda laabo halu lalu, Kini Agiriba-o mbiralime dahuliya andaga howa walia halu bi layago i̱na mo wa nahe haru.

²⁰Ala Damasagasahabi Yarusalemehabi ibaga bialu mani Yudia dindi bibahendehabi Yuali ndo wali agali dindi tara tara hearuha puwa i̱na wali agali bibahende hearuhondo, Tí ko birimigonaga mini beregedowa Ngode Datagaliwabehondo mini mbiraore wuwa ani birimigo walia hole biabe tigatiga bialu holene nga, lalu lamiru.

²¹Ani lamialu harugonaga Yu agali hearume i̱ Anduane Homogonaga andaha hewaria minuwa homelo bole manda biya.

²²Alabi áyubi horo bibahendeni Ngode Datagaliwabehanda i̱ biamogo biaabo hayagome i̱na oali howa wali agali emenebi timbunibi ta nabi karuhondo henene lolene lamialu ko. Ala Ngode Datagaliwabe mana latagi haga hearubi Mosesebi tigua ani bulebira lo winigodagua i̱na lalu ko.

²³Tigua lowinigo ogo, Mbirali Dabo Helenego ibuwa ibu homolebira. Homowa wali agali mani heyilo ibu ala heyu holebira, lenego gilibu nga. Irane ogonigo Yu wali agalibi wali agali tara tarabi ti wá holene hendelo ibugua haabobo holenaga pele ngulene mana lamule ibu ala heyu hene, Polohanda lene.

²⁴Polohanda ibu bialu hayagonaga te ani lamialu hearia Pesedasahanda ibuhondo dalimu lalu, Polo-o í̱ lulu yu ke. Mana taibi dewaore lo manda biaabo harigome í̱ mo lulu ya hayada, lene.

²⁵Ani layagola Polohanda ladai bialu lalu, Pesedasa í̱ timbuni kego. I̱ lulu ndo. I̱na bi o larogo palia hondo howa lulu bi ndo mini wuwa ogo ale larolo manda buwa heneneore lalu ko.

²⁶Kini Agiriba-o ogoni biyagoni í̱ manda bidego donge nahe i̱na langiai habehe kogoni. O biyagoni arumaha howa ndo biyago í̱ manda nabi ndo uruni bibahende manda biai kego manda bido.

²⁷Kini Agiriba-o Ngode Datagaliwabe mana latagi haga hearume bi mana lowinigo yu tiga bidebe. Yu tiga bidegoni manda bu ko, lene.

²⁸Ani layagola Agiribahanda Polohondo lalu, I̱ Keriso hameigini holiya áyu ogoni mo ha hole mitangi bu kebe, lene.

²⁹Ani layagola Polohanda ladai bialu lalu, Áyu ogonibi karulape awebi karulape degego í̱bi bibahende i̱na bi larogo hale ho kamirubi tí i̱ kogobi dege halimulo Ngode Datagaliwabehondo bi la halu kogoni. Ege pu seni urume i̱ dariba kagola kogobi dege tí nahalimulo hamelo ko, lene.

³⁰Ani layagola kini biagobi gabumane haru hagabi Benaisibi ti heba maru ngoai hayarubi bibahende biaru heyalu

³¹tagiraha puwa tigua lagalaga bialu, Agali ogoni homelo bolenegobi garabaya bulenegobi ibugua ko bini mbira nawida, lene.

³²Ani layagola Agiribahanda Pesedasahondo lalu, Agali ogonime Lomonaga Kini kagome i̱naga godi lo tiga bilo naledale ibu golope kele, lene.