Read Huli Lomo 11 Bible Online

Lomo 11 - Huli bible

Lomo 11

¹Anigo au laro. Ngode Datagaliwabehanda ibuninaga Isaraele wali agali yu wahayabe. Yu wa naheore. I̱nibi Isaraeleali howa Abarahamanaga aguanene Beniyamini hameigini aria mbirago i̱ kogoni.

²Ngode Datagaliwabehanda ibuninaga wali agali piganengi dabeneru mbira yu wa nahe henego ka. Isaraele wali agalime mbira nakarulape biyangi Elayahanda genda howa Ngode Datagaliwabehondo bi lamini lalu Anduane Homogonaga mbugani lo ngago tí manda bidamigo ogo.

³Anduane Homogo-o tigua í̱naga bi mana latagi haga hearu bo wahaya. Í̱naga loma binigo bo ngiagane dabu winiru gialo wahaya. Homane mbira i̱ dege ba nabi kogo tigua i̱bi bo wahole manda bialu ka, lenego gilibu nga.

⁴Ani layagola Ngode Datagaliwabehanda ibuhondo bi agi ladai binibe. Ibugua ladai bialu lalu, Mbirale tara gime wabini mini Balahondo bi pupu wule ge duli hanga nahene agali daosini karia (7,000) i̱ninaga heledo, lalu ladai bini.

⁵Anigo ina kamangibi ogonidagua dege nga. Ngode Datagaliwabehanda dara halu biamogo bia henegome Isaraele wali agali dabo heleneru aria mbira mbira ka.

⁶Ngode Datagaliwabehanda wali agali dabeneru tigua biyagonaga dabene ndo ibugua ti dara halu biamogo bia henegome dabene ka. Wali agali tigua biyago hondowa Ngode Datagaliwabehanda ti dabenedale nde ibunaga dara halu biamogo bia holene ngago henene ndo ngaleda.

⁷Ani binidago agi manda bibehe kamabe. Isaraele wali agalime mbira hai binigo handa walia nahe hene. Wali agali mbira mbira Ngode Datagaliwabehanda dabeneru ti hangume handa walia hene. Maru ti Ngode Datagaliwabehanda olenego hale nahe hale paihe hene.

⁸Anduane Homogonaga mbugani lo ngadagua ogo, Ngode Datagaliwabehanda tinaga mini mo palia hondo helene. Ani hama ibinigo áyu ogoni tigua deme nahandabehebi haleme hale nahabehebi ka, lalu gilibu nga.

⁹Ogonidagua dege Debidihanda bi lene ngago ogo, Ti ngoai howa tomo timbuni nagimbu bialu bedaria gono wedagoha tini delo. Ti pilo ngaria pani milo.

¹⁰Ti de nahendelonaga tinaga de ndibu lelo. Ti tandaga naabo halu kagome tini mo gangu lelo, lenego gilibu nga.

¹¹Anigo ogo laro. Yu wali agali ti pilenego pilo wiaabo henebe. Ani nabi. Tigua ko binigome Yu wali agali ndo tara tara karu pele mulene henge wini. Ani pele miyago hondowa Yu wali agalime henge lolene mini wilo ani bini.

¹²Yu wali agali tigua ko binigome wali agali dindi bibahendeni hearuha turu holene bayaleoreru yu anda ibini. Tigua Ngode Datagaliwabe mitangi bulene emeneore wialu yagibano ale henegome Yu wali agali ndo tara tara hearuha Ngode Datagaliwabenaga turu holene bayaleoreru yu anda ibini. Anigo Yu wali agali Ngode Datagaliwabe karia dai bule karu dai biragola wali agali bibahendeore heba turu holene timbuniorene timbu tinaga wulebira.

¹³Áyu i̱na Yu wali agali ndo tara tara kamiru tíhondo larogo. Ina tínaga abosolo kogoni howa biabe galone bialu kogoni turu howa bialu ko.

¹⁴Ani bialu kogo i̱na wali agali i̱ni aria karume tí turu holene yu kamigoni hondowa ti henge lolene mini wilo mo wia habehe kogoni. Ani wiraria Ngode Datagaliwabehanda ti maru pele mibehe holebira.

¹⁵Ngode Datagaliwabehanda Yu wali agali yu wahayangi wali agali dindi bibahendeni karu ti Ngode Datagaliwabenaga waitigi ho hearia ibugua ti mo ibu damene helene. Anigo Ngode Datagaliwabehanda Yu wali agali lone ibuni karia haru dai birangi ti homaliha hora henego mo heya haradagua bu holebira.

¹⁶Mberedi pigane hirinigo mbira podowa Ngode Datagaliwabehondo loma bia ho miniyagua nde mberedi podoha hene biagobi ibunaga dege nga. Ira mbiranaga pini Ngode Datagaliwabehondo loma bia ho miniyagua nde maganerubi ibunaga dege ka.

¹⁷Ira olibenaga magane maru podo wahowa ira olibe dege mende tagiraha minalu anda hene kagonaga magane podowa ogonime magane ala podo wahayagoria gimbu bini. Yu wali agali ndo tara tara kamiru tí ira olibe tagiraha minalu anda hene ogoni ale kami. Ai áyu tí Yu wali agalinaga holene bayaleore ngagoha ho gimbu bu kami.

¹⁸Ani kamigo tígua wali agali ira magane podo wahene karu mitangi bialu mine ho holene nawi. Tí mine aginaga holebe. Tí bame ira magane dege kamigodago tígua pini mo tiaga ho kami ndo ira pinime tí mo tiaga ho daga kagola kamigoni.

¹⁹Bi ani larogo hale howa tígua ogodagua ladai bialu lalu, Nde agi. Ira magane uruni podo wahenedago irane i̱ ho aribia holiyanaga henge mo wialu ani binida, loleberami.

²⁰Ogoni heneneda. Ti mini mbiraore nawiyagola podo wahenego tí mini mbiraore wialu kamigome ho gimbu bu kamigoni. Ogoninaga tí mine holene henge nawigo mogolo holene nga.

²¹Yu wali agali ti ira magane ogoni aria henego Ngode Datagaliwabehanda ti podo wahenego ibugua tí kamiru poda waha nabi helolebira manda bidamibe.

²²Bi ogo bayuwa manda bilimu. Ngode Datagaliwabe ibu bayale biagabi hongo howa godi lagabi kagoni manda bilimu. Ibugua ko biaga karuhondo hongo howa godi laga kago howa tí kamiruhondo bayale dege bialu kagoni. Ibugua nde tíhondo bayale bilo henge miaabo harimiyagua ani bulebira. Ani henge nami haabo harimiyagua tíbi ibugua podo waholebira.

²³Yu wali agali mini mbiraore nawi henedagua haabo nahe lone mini mbiraore wiyagua nde Ngode Datagaliwabehanda ti ira tene biago ibuniha helo hela dai bulebira. Ibugua ti ani hela dai bilabeheore kagoni.

²⁴Yu wali agali ndo tara tara kamiru tí olibe ira tagiraha minalu anda henegonaga magane podowa olibe ira mende hengenegoha ho gimbu bini ale kami. Yu wali agali ti olibe ira hengenego ale kago Ngode Datagaliwabehanda ti ala tini henegoha gimbu bia halu hela dai bulene taibi ndoore nga.

²⁵I̱ hamene mbaliniru-o bi galone mbira ala tí nahalehe harimigo áyu tí manda bilimulo hameledo. Galone mbira ogoni manda birimiyagua tígua mine howa, Ina mini timbuniwi kamalo, mitangi nabuleberami. Bi ogoni galone ogo. Isaraele wali agalime Ngode Datagaliwabehondo mini mbiraore wulene manga ho kago ogonidagua haabo naholebira. Yu wali agali ndo tara tara karume Ngode Datagaliwabehondo mini mbiraore wule heneru ti mini mbiraore wialu anda ibai helo hondo ka.

²⁶Ti ogonidagua anda ibai haragola Ngode Datagaliwabehanda Isaraele wali agali pele mulebira. Anduane Homogonaga mbugani lo ngadagua ogo, Pele Miaga ibu Saiono howa ibulebira. Ibiragola ibugua Yagaba aguanenerume ko bibahende bialu heneru domo waholebira.

²⁷I̱na tinaga ko domo wahowa tihondo habo nalolene bi ogo lo wulebero, lalu gilibu nga.

²⁸Yu wali agalime Bi Mana Debene hame nalenegome ti Ngode Datagaliwabela waitigi ho ka. Ani biyagola Yu wali agali ndo tara tara kamiru tí Ngode Datagaliwabenaga pele mulene mana ala hale harimi. Anigo Ngode Datagaliwabehanda Yu wali agalinaga mamali agali mini leneore heneruhondo habo nalolene bi lo wialu ibugua ti dabenego ti mo ibu damene ho heleneru ka.

²⁹Anigo Ngode Datagaliwabehanda wali agali dabeneru ibunaga turu holene tara tara winigo minirubi mani mini mende nawiaga tihondo miyaru mo yu dai nabiagabi ka.

³⁰Yu wali agali ndo tara tara tí kamigome ala Ngode Datagaliwabenaga bi mo wahalu harimi. Ai Yu wali agali tigua Ngode Datagaliwabenaga bi hale halu bia nabi wahaabo hayagola ibugua ibunaga dara halu biamogo bulene tíhondo ngiyago yu kamigoni.

³¹Ogonidagua dege Ngode Datagaliwabehanda tíhondo dara halu biamogo biyago Yu wali agalime áyu ibunaga bi mo wahalu ka. Ibugua tibi dara halu biamogo bilo lowa tigua ani bialu ka.

³²Wali agali bibahendeme Ngode Datagaliwabenaga bi mo wahayagola ibugua ti garabaya ale helo helene. Ani helenego irane ibugua tihondo ibunaga dara halu biamogo bulene walia holenaga ani bini.

³³Ngode Datagaliwabe ibugua bibahendeore mitangi bialu baya gibiore biaga kagoni. Ibu mini gigabiwibi manda timbuniorebi kagoni. Ibugua bule manda biagago tene mbiralime nalabeheore ka. Ibunaga biagane mana mbiralime manda nabibeheore ka.

³⁴Anduane Homogonaga mbugani lo ngadagua ogo, Anduane Homogonaga mini aiwa manda bidabe. Ibuhondo, Agua bibe agua nabibe, lalu mbirali aiwa labehe kabe.

³⁵Ibugua pani ngia dai bilonaga ibuhondo mbirale mbira minigo mbirali ai kabe, lalu gilibu nga.

³⁶Mbirale bibahende karubi ngarubi wabiaiore henego ibu ka. Ani howa ibugua mbirale karubi ngarubi bibahendeore haru hai halu uruninaga anduaneore ibuni ka. Ngode Datagaliwabenaga mini yaraga haaboboore helo hamelo ko. Aniore bilo laro.