Read Huli 1 Korindi 6 Bible Online

1 Korindi 6 - Huli bible

1 Korindi 6

¹Tí mbiralime Keriso hameigini mendela godi lolene ngagola Ngode Datagaliwabe mitangi nabiagane karume daba ki bilo haru poramiligo agibe. Ngode Datagaliwabenaga wali agali tínime mo tiga bulene nga ndobe.

²Ngode Datagaliwabenaga wali agali iname dindi bibahendeni karunaga daba ki bulene inanaga wulebirago manda nabi kamibe. Anigo tígua wali agali dindi bibahendeni karunaga daba ki bulene tínaga ngayagua tígua áyu emene ngaru daba ki nabibehe kamibe.

³Dahuliyalirume biraru iname dabolene wulebirago manda nabi kamibe. Anigo áyu dindini karume mbirale mbira biraru iname dababeheore kama ndobe.

⁴Mbirale mbira biraru mo tiga bulene ngayagua Keriso hameigini ndo karume mo tiga bilo ti karia haru poleberamibe.

⁵Tí taga habehe kamigoni. Tí kamigoria mbirale mbira biraru mo tiga bulene tíni aria mini gigabiwi mbira nahedabe.

⁶Ani nabi howa Keriso hameigini mbirali ibugua Keriso hameigini mendealigo heba godi lolenaga Ngode Datagaliwabe mitangi nabi karume mo tiga bilo ti karia haru poramili.

⁷Tígua ani bialu kamigome tí bibahende hongo ibira hai kamigo lalu walia haga. Marume tí mo hondo hayaguabi tínaga mbirale mo page yalu piyaguabi tígua la nabi waholenego bayale ndobe.

⁸Tí ani nabi howa tígua tíni Keriso hameigini degedege howa mo hondo hagahaga bialubi tíninaga mbirale page bigibigi bialubi kami.

⁹Ngode Datagaliwabe mana mo yo handagane karu tigua Ngode Datagaliwabehanda Handame Ho Kagoria ti holene henge nawulebiraorego manda nabi kamibe. Tínime tíni mo hondo nahalimu. Wali agali dabu nabi howa kayu biagabi gime wabiniruhondo bi pupu wiagabi wali agali dabu bu howa tara baba kayu biagabi agalime agali nenegene maru baba mana ko ngubi taraore biagabi

¹⁰mbirale page biagabi mbirale ngago dimagoli hagabi lulu yule lulu iba timbuni nagabi bi gungu biagabi mbirale page bule mo hondo hagabi uruni bibahende biaga karume Ngode Datagaliwabehanda Handame Ho Kagoria ti holene henge nawulebiraore.

¹¹Ala tí maru ogonibi bialu harimigoni. Ani bialu hemiria Ngode Datagaliwabehanda tígua ko birimigo domo wahai howa ibunaga wali agaliore helo tí dabo bagi henego kami. Ngode Datagaliwabehanda tíhondo, Tí mini tigabiwi kami, lenego Anduane Homogo Yasu Keriso minini howabi inanaga Ngode Datagaliwabe Dinini ibuguabi tí ani helene kami.

¹²Tí mbiralime lalu, I̱ mbirale bibahende ta nabi biai habehe kogoni, loleberami. E̱ ani bibehegoyu bibahende ta nabi ngagome tí mo bayale helonaga ndo nga. I̱na bibahende ta nabi ngaru biai habehe kogoni labehe howa mbirale urunime i̱ dariba habehe nga manda biruyagua nde nabulebero.

¹³Tí marume lalu, Tomo tombenaga ngago tombe nde tomonaga nga ndobe lolebira. E̱ anigoyu Ngode Datagaliwabehanda tomobi tombebi kiroba mo wiamaro bilolebira ndobe. Inanaga tingini wali agali kayu bilo helene ndo Anduane Homogonaga biabe bilo helene. Anduane Homogo ibu nde ina tingininaga holene ngiaga ka.

¹⁴Ngode Datagaliwabehanda ibunaga hongome Anduane Homogo mo heya henego inabi ibunaga hongome mo heya holebira.

¹⁵Tínaga tingini hangu hangu howa Kerisonaga tingini ho kamigo manda bu kami. I̱na Kerisonaga tingini ogoni howa bayanda wali kayu biaga bedarunaga tinginiha gimbu bulene ngabe. Nawiore ndobe.

¹⁶Agalime ibunaga tingini bayanda wali kayu biaga biago tinginiha gimbu biyagua libu tingini mo mbiraore hagago manda nabi kamibe. Anduane Homogonaga mbugani bi bayuwaore lo ngago ogo, Libu wali agali kira howa tingini mbiraore holebira, lalu gilibu nga.

¹⁷Anigo mbiralime Anduane Homogoha gimbu biyagua libu dininiha howa mbiraore haga ka.

¹⁸Wali agali kayu biaga kagoha nape ha bagi halimu. Wali agali mbirame ko maru birago ibunaga tingini tagirahayagi howa biaga. Wali agali kayu birago ibunime ibuninaga tingini mo ko haga.

¹⁹Tínaga tingini hangu hangu howa Ngode Datagaliwabe Dinininaga anda kamigo manda nabi kamibe. Ngode Datagaliwabehanda ibu Dinini ogoni turu halu bame ngiyago ibu tíha haabo kagoni. Ai tí tíninaga ndo tí Ngode Datagaliwabenaga kami.

²⁰Ngode Datagaliwabehanda tí ibuninaga halimulo lowa yolo binigo mitangi buwa tígua tíninaga tinginime Ngode Datagaliwabe mini mo yaraga haabo halu halimu.