Read Huli 2 Korindi 6 Bible Online

2 Korindi 6 - Huli bible

2 Korindi 6

¹Iname Ngode Datagaliwabe heba biabe mandagi bialu howa tíhondo bi laramago ogo. Ibunaga biamogo bia holene yu kamigo mohole bialu yu wa nahalimu larama.

²Ngode Datagaliwabehanda bi mbira larago hale hadaba. Biamogo bia holene tu winingi bi larigo hale haru. Pele ngulene horo winingi pele ngiru, lenego lalu gilibu nga. Ai hale hadaba. Ngode Datagaliwabenaga biamogo bia holene yu holene tu áyu ngagoni. Pele mulene horo áyu ngagoni.

³Inanaga biabe bialu kamago mbiralime hondowa nakarulape bialu kamane nahendelo iname beramagome ti mo pila holigo lowa bayuwaore bialu haramali.

⁴Ani bialu iname bibahende beremaligo bialu howa tandaga nalubi genda halubi tai bigi bialubi harugo lowa ema nabiore howa iname Ngode Datagaliwabenaga biabe biagaore kamagoni lalu walia haramali.

⁵Marume ina kangome ba garabaya andaha haru puwa hela dewalime ina ho mabu buwa ba bia bigi bini. Iname ha̱lo nahe biabe biaabo halu ubi napale tomobi nane haabo harima.

⁶Ani bialu mini gahengeore wuwabi Ngode Datagaliwabe mana bayuwa yani howabi ema nabi howa hibu lalubi maruhondo biamogo bialubi gubalini henene halubi uruni bibahende birimagomebi mana henene lameramagomebi Ngode Datagaliwabe Dininimebi Ngode Datagaliwabenaga hongomebi ina ibunaga biabe biagaore kamago lalu walia harimagoni. Iname mini tigabi wulenenaga wai biagane ale yu howa waitigi karia puwa balubi ti ina kamaria ibiragola ba dai bialubi haramali.

⁸Marume ina mitangi bialu tigabi ka lalu haga marume ina guraga marume inahondo mege biaga marume inahondo ka̱i̱ laga. Iname bi henene lalu kamagola marume. Tí ke̱ haga kami, laga.

⁹Agali bibahendeoreme ina manda biai haga howa marume ina nahendenehondo biradagua biaga. Ina homabeheore winigo nahome harimago dehendedemi. Ina mo tandaga dege henego homole ba nabi helene.

¹⁰Marume ina mo genda haragola iname turu dege haabo haramali. Iname yagibano howa wali agali dewanaga bu mini mo homogo haramali. Ina mbirale mbira nayiore kamagoni howa bu mininaga ngagoni yu hai kama, laramali.

¹¹Inanaga nenege turubiore Korindini kamiru-o iname inanaga bu miniha tí gubalini timbuniore halu tíhondo tiga tigaore langialu harimagoni.

¹²Iname inanaga bu mini tíhondo hangai nahe harimago tígua tíninaga bu mini inahondo hangai harimi.

¹³I̱na i̱ waneiginihondo bi lamiradagua bialu tíhondo bi langerogo. Iname tíhondo gubalini haramadagua tígua nde inahondo aniore bilimu. Tínaga bu mini hada ho halimu.

¹⁴Ngode Datagaliwabehondo mini mbiraore nawi karu heba galone mandagi bule mini mbiraore nahalimu. Ani nabibeheore nga. Kagua biagala tigabi biagala mbiraore agua habehebe. Wá holenebi aruma holenebi mandagi agua ho habehebe.

¹⁵Keriso dama Heyolabela libu mini mbiraore agua habehe kabe. Ngode Datagaliwabehondo mini mbiraorewi kagobi mini mbiraore nawi kagobi libu hame mbiraore agua hagabe.

¹⁶Ngode Datagaliwabenaga andala bi pupu wule gime wabu ngagola mo mbiraore agua habehebe. Ngode Datagaliwabe holenehe kagonaga anda ina kamagoni. Ngode Datagaliwabe ibunime bi lenego ogo, I̱naga wali agali heba mandagi hole i̱na ti kagoria i̱naga anda bu holebero. Tinaga Ngode Datagaliwabe i̱ holebero. Ti nde i̱naga wali agali holebira, lalu lene.

¹⁷Ani lowa Anduane Homogo ibugua lalu, Tígua Ngode Datagaliwabe mitangi nabiaga karu helalu tíni hangu ha bagi howa halimu. Tígua Ngode Datagaliwabe deni ko ngago nabilimu. Ogoni nabirimiyagua nde i̱na tíhondo hami̱ya lolebero.

¹⁸Tínaga aba i̱ holebero. I̱ waneiginiru tí holeberami, lalu Anduane Homogo Hongo Haiheore kagome ani lenego, lalu gilibu ngagoni.