Read Huli Ebesa 2 Bible Online

Ebesa 2 - Huli bible

Ebesa 2

¹Ala tígua Ngode Datagaliwabehondo manga harimigonagabi ko birimigonagabi tí dinini homene ale harimigoni.

²Ani bialu harimingi dindini mana ko wiaru hamelo harimigoni. Hari daligaha damanaga hongo holene haru haga kagome bia layadagua tígua bialu harimigoni. Haru haga ogonime áyu wali agali Ngode Datagaliwabe mana wahaga karu ti haru haga ka.

³Ina bibahende kamarumebi tigua bialu henedagua dege harimagoni. Iname inanaga mini kome dimagoli holene wiadagua dimagoli halu inanaga tinginimebi minimebi hame layadagua bialu harimagoni. Wali agali bibahende hearubi dege hemaria Ngode Datagaliwabenaga lembo holene tibi inabi nolene wini.

⁴Ani winigoyu Ngode Datagaliwabehanda inahondo gubalini timbuniore howa ibunaga dara halu biamogo bulene daliga gibiore nga.

⁵Ani ngago iname Ngode Datagaliwabehondo manga ho howa dinini homene ale hemaria ibugua ina Keriso heba holoma̱ya hela dai bia hene. Ani biyago Ngode Datagaliwabenaga biamogo bia holeneme tí pele mulene yu kamigoni.

⁶Ina Keriso Yasu heba ho gimbu bu howa dahuliya tawenaga iname Keriso heba haru holoma̱ya Ngode Datagaliwabehanda ina Keriso heba mo heyamaga ho helene.

⁷Ibugua ani binigo irane ogo. Ibugua ina Keriso Yasuha howa inahondo gubalini holene walia hayagome ibunaga biamogo bia holene daliga gibiore ngago walia ho wiaabo helo ani bini.

⁸Ngode Datagaliwabehanda biamogo bia henegome tí ibuhondo mini mbiraore wuwa pele mulene yu kami. Tíni bayale birimigome ndo Ngode Datagaliwabehanda turu halu bame ngini.

⁹Tíni biabe birimigonaga yolo ndogo tí mine holene henge nawi.

¹⁰Ngode Datagaliwabehanda ina áyu kamagobi holoma̱ya wabini. Ina Keriso Yasu heba ho gimbu bu howa iname biabe bayale ibugua manda manda bu winigo ngaru bialu holoma̱ya Ngode Datagaliwabehanda ina wabini.

¹¹Yu wali agali ndo tara tara kamiru tí hondowa Yu wali agalime, Tí dongone podo mabu biagane mana nabiaga kamigo ina biaga kama, laga kago agalime tinaga dongoneni biaganaga larago. Tí kamiruhondo larogo tí ala howa bialu harimigo mitangi bu dai bilimu.

¹²O biagoningi tí Kerisola mbiraore ndo dala hangu ho harimigoni. Ngode Datagaliwabenaga wali agali ibugua dabeneru aria ndo tí tara harimigoni. Ngode Datagaliwabehanda ibunaga wali agalihondo, Ngulebero, lalubi, Bulebero, lalubi lowinigo mo tene howa habo nalolene bi lowiniru tíhondo ndo lowini. Tí dindi ogoria howa Ngode Datagaliwabe kagobi pele mulene yulenaga bi manabi manda nabi howa mini dunu bia ho holene irane nawi howa tíni hanguore harimigoni.

¹³Tí ala kaundiaha harimigoyu Yasunaga darama pelayagome áyu tí Keriso ibu heba ho gimbu bu howa tí kaware mo helenego kamigoni.

¹⁴Keriso ibunime Yu wali agalibi wali agali tara tarabi mo mbiraore hayagome mo palia holene ina nginigo nga. Tí ala hangu hangu howa waitigi ho harimigome tu winigo ibugua tinginime gialo wahene.

¹⁵Yu wali agalibi Yu wali agali ndo tara tarabi howa wali agali mbiraore ibu heba ho gimbu bu helo tiga bialu mo mbiraore hole ibugua Yu wali agalinaga Mana lowinigome bia laradagua bulenebi mana mbira mbira bulenebi nabulenebi mo wahene. Ani bialu ibugua mo palia hene.

¹⁶Keriso ibu ira bangani homayagome wali agalinaga handabe manga holenebi keba holenebi bibahende winiru mo wahai hene. Ibugua ani biyagome Yu wali agalibi wali agali tara tara bibahenderubi hameigini mo mbiraore howa Ngode Datagaliwabe karia haru dai bini.

¹⁷Ani haru dai buwa Keriso ibugua tí wali agali ala Ngode Datagaliwabe kagoria kaundia hene kamiruhondobi wali agali Ngode Datagaliwabe kagoria kaware heneruhondobi mo palia holenenaga Bi Mana Debene langule ibini.

¹⁸Kerisoni howa ina Yu wali agalibi wali agali tara tarabi bibahende kamaru Ngode Datagaliwabe Dinini mbiraore ibuha howa ina Aba karia ibabehe kama.

¹⁹Anigo Yu wali agali ndo tara tara kamiru tí hameigini tarabi dindi taralibi ala harimigobi ndo kami. Áyu tí Ngode Datagaliwabenaga wali agali heba ho mbiraore howa ibunaga waneiginiore kamigoni.

²⁰Abosolobi Ngode Datagaliwabe mana latagi haga henerubi tigua anda gumuni mo winigoria anda genedane Keriso Yasu ibuni howa tíbi anda bu gimbu bini kami.

²¹Anda ogoni Keriso ibugua yani ho howa anda Anduane Homogohondo loma bia ho helo mo anda halu ka.

²²Ibu heba ho gimbu bu howa tíbi wali agali marubi anda mbiraore ale bu gimbu bima iraga halu biala kami. Ngode Datagaliwabe ibunaga Dinini anda ogoniha ho kagoni.