Read Huli Ebesa 3 Bible Online

Ebesa 3 - Huli bible

Ebesa 3

¹Irane ogoninaga i̱ Polo tí Yu wali agali ndo tara tara kamirunaga koyane Keriso Yasunaga garabaya agali kogoni howa i̱na Ngode Datagaliwabehondo tínaga bi la haruli.

²Tí bayale halimulonaga Ngode Datagaliwabehanda ibunaga biamogo bia holene nginigome biabe ogoni i̱na berogo bia holiya nginigo tí hale harimigoni.

³Ngode Datagaliwabehanda manda manda bu winidagua mana ala pani nahe ngelenego i̱hondo mo pani haya. Ogoninaga tene nemandi tongolo baga buwa abale gili birugoni.

⁴Tígua ogoni daga larimiyagua mana ala pani nahe Kerisoha do henego i̱ manda bu kodagua tí manda buleberami.

⁵Ngode Datagaliwabehanda mana ala pani nahe ngelenego ogoni wali agali ala heneru ti nalamini. Áyu ibugua ibu Dininime ibunaga abosolo loma bia hene karubi Ngode Datagaliwabe mana latagi haga karubi tihondo mo pani ho nga.

⁶Ibugua mana ala pani nahe ngelenego ogo. Bi mana debene ngagome wali agali tara tarabi Yu wali agali heba Ngode Datagaliwabenaga turu holene ngaru tihondobi miaga ka. Tibi inabi homane mbiraore kamago Ngode Datagaliwabehanda Keriso Yasuha howa, Ngulebero, lalu lowinigo tibi mo yu ka.

⁷Ngode Datagaliwabehanda i̱hondo biamogo bia holene turu halu bame ngialu i̱ bi mana debenenaga biabe biaga holiya mo helene. I̱na ibunaga biabe bia holiya ibunaga hongome i̱ mo hongo haya.

⁸Ngode Datagaliwabenaga wali agali maru karubi ndo i̱ dindihaore kogoni. I̱ ogonibi kogoni howa Kerisonaga baya burugule wiaabo hagane ngarunaga Bi Mana Debene wali agali tara tara karu hale helo i̱na lamule poliyanaga Ngode Datagaliwabehanda ngiya.

⁹Ngode Datagaliwabehanda manda manda bu winidagua wali agali bibahende karume ibunaga mana ala pani nahe ngelenego galone hendelo i̱na latagi holiyabi ibugua biabe ogoni i̱hondo ngiya. Ngode Datagaliwabe ibu bibahendeore wabiaga howa ibugua galone ogoni bambaore howa pani nahe ngelaabo henego irane ogo.

¹⁰Áyu o kamangi Keriso hameigini kamarume hariha haru haga karubi hongo tara tara karubi Ngode Datagaliwabehanda ibu mini gigabinaga manda bulene tara tara ngaru manda bilo ibugua ibunaga mana ala pani nahe ngelaabo hene.

¹¹Ngode Datagaliwabehanda manda manda bu wiaabo henedagua ogoni binigo ina Anduane Homogo Keriso Yasu ibuha howa bumaro bini.

¹²Ina Keriso heba ho gimbu bu howa ibuhondo mini mbiraore wirimarume ina Ngode Datagaliwabe deni gi nahe hada payabu howa pu holene henge nga.

¹³I̱na tínaga tandaga na harogo mitangi bialu tí genda nahalimulo hame ledogo ogoni. Tandaga ogoni narogo tí bayale halimulonaga nalu ko.

¹⁴Ai bi ala lala harugo aria laro. Irane ogoninaga Aba deni i̱na ge duli hangu ho biruwa ibuhondo bi lalu ko.

¹⁵Wali agali hameigini tara tara dahuliya andagani karubi dindini karubi bibahendenaga Aba ibu howa tinaga mini henene mo yu ka.

¹⁶Ngode Datagaliwabenaga hongo taraore holene timbuniore ngago tíninaga bu habaneha hongo halimulo hongo ogoni ibu Dininime ngilonaga i̱na ibuhondo mia lalu bi la halu kogoni.

¹⁷Tígua ibuhondo mini mbiraore wu kamigome Keriso ibugua tínaga bu habaneha íbu helobi tínaga pinibi tenebi gubalini holeneha wiaabo helonaga bi la halu kogoni.

¹⁸Tíbi Ngode Datagaliwabenaga wali agali bibahende karubi tígua Kerisonaga gubalini holene magi lirahayagibi nirahayagibi lunagabi aranenagabi nguini maro nabi ngago tí manda bilimulonaga hongo ngilo i̱na Ngode Datagaliwabehondo mia lalu bi la halu kogoni.

¹⁹Kerisonaga gubalini holene ogoni tígua manda biai nahabeheorego lowa ibunaga gubalini holene manda bu halimulo hame ledo. Ani manda beramigola Ngode Datagaliwabenaga mbirale baya burugule tara tara ibuniha ngaru tíha wu to̱lai holebira.

²⁰Iname ngi laramadaguabi mitangi bidamadaguabi ndo ibugua ibunaga hongo inaha biabe bialu kagome ngia tago ha bia tago ha bigi bialu kago

²¹Keriso hameigini karuha howabi Keriso Yasuha howabi Ngode Datagaliwabenaga mini mo yaraga haabobo bilo lalu aniore bilo hamelo ko.