Read Huli Pilibai 2 Bible Online

Pilibai 2 - Huli bible

Pilibai 2

¹Tí Kerisoha kamigome tí mo hongo hagabe. Ibunaga gubalini holeneme tínaga miniha mo turu hagabe. Tí Ngode Datagaliwabe Dininila mini mo mbiraore ho haramilibe. Tíni dara howa biamogo bia hagahaga beramilibe.

²Turu holene i̱ha to̱lai helonaga tínaga mitangi ogobi degedege wia gubalini hagahaga bia mini mbiraore ha mini mo mbiraore howa bi mbiraore la bigi bialu halimu.

³Tígua tíninaga mini mo yaraga holenagabi mine holenagabi mbira bulene nawi. Tíni mo dindiha halu wali agali maru karu mitangi bialu halimu. Ina daliga kamagobi ndo ti dindiha ka manda nabilimu.

⁴Mbirale tíni hangunaga bule manda nabi howa wali agali maru karu mitangi bialu biamogo bule manda bilimu.

⁵Tígua Keriso Yasu ibugua mini wiyadagua wilimu.

⁶Ibugua piganengi howa mini wiyago Ngode Datagaliwabeore hene. Ibu Ngode Datagaliwabela ogobi labolabo haabo hole lowa yania ho wiaabo hole manda nabi hene.

⁷Ani nabi ibuni ala hayago yupe halu ibu biabe bia haga ho dalini. Ina kamaru taba henenedagua ibubi taba hanalu mo agali hene. Ibu agali ibuniore halu ha pani hene.

⁸Ibugua bulene winigo biaore halu ibuni mo dindiha halu nde homolenebi karulape lalu ira bangani homole pene.

⁹Irane ogoninaga Ngode Datagaliwabehanda ibu mo heya halu daligaore helo helenego ka. Ani bu helowa ibugua marunaga mini bibahende bolangua hai halu ibuhondo mini timbuni gibiore mini.

¹⁰Ani bidago hari daligaha karubi dindini kamarubi dindi andaneha karubi bibahendeme Yasunaga mini laragola hale howa ge duli hanga ho birai holebira.

¹¹Ani bu biruwa tigua latagi halu lalu, Yasu Keriso ibu Anduane Homogoore ka, lalu Aba Ngode Datagaliwabenaga mini yaraga halu lolebira.

¹²Ani bidago i̱naga nenege turubiru-o i̱ tí heba harimangi i̱na bia larudagua hale halu tígua birimigoni. Áyu tíni hangu kamigoni howabi ina bia larodagua buleneore ngagoni. I̱na bi larogo haleore halu beramine. Tígua biabe bialu howa Ngode Datagaliwabehondo gi halubi inane hangu nakarulape kama mitangi bialubi tíninaga pele mulene Yasuhanda ngiyago ya maro bule ani bilimu.

¹³Irane Ngode Datagaliwabe ibuni tínaga miniha howa biabe biaabo halu ka. Ibu turu helo biabe bulene tígua hame lalu bilimulo ibugua tí mo hamela halu biamogo bialu ka.

¹⁴Wali agali marume tígua beramigo hondowa, Tí kagua bialu kami, nalelo tígua mbira beramigo bibahende bialu howa manga halu lai lalu howa nabilimu.

¹⁵Ani birimiyagua wali agali mini kowibi mana ko biagabi karu ti heba howa tí Ngode Datagaliwabenaga waneigini baya burugule holeberami. Holenenaga bi mana lamialu kamiru yakundi harini dedagobi howa tígua mo wá halu holeberami. Ani bialu harimiyagua Kerisonaga Horo harangi i̱na harigani puabo halu harugobi biabe biaabo halu harugobi bame bu wahole ndo bialu harudagola tíhondo turu holebero.

¹⁷Tígua Ngode Datagaliwabehondo mini mbiraore wirimigo ibuhondo mbirale bo lomabu miagadagua mirimigoni. Ogoni Ngode Datagaliwabehondo mialu howa waini iba odo tago hagadagua i̱naga darama pela tago holene wiagua nde i̱ turu holebero. I̱ turu ho kodagua tíbi turu hamaga holene nga.

¹⁸Ogonidagua dege tí turu ho kamigoha i̱bi nde turu hamaga holebero.

¹⁹I̱ turu holiya tígua bialu kamigo te hale hoa howa Anduane Homogohanda Timodi tí kamiria ibilolene nga layagua nde i̱na abale ibilagua.

²⁰I̱na mitangi birulidagua marume mitangi nabiaga Timodihanda hangu mitangi biaga kago tíbi mitangi bialuore ka.

²¹Wali agali bibahendeme Yasu Kerisonaga biabe bulene mitangi nabi tininaga biabe bulene hangu mitangi bialu ka.

²²Timodi ibu bayaleore kago tí manda bidami. Igiri mbirame ibu aba biamogo biagadagua Timodi ibu i̱ heba bi mana debenenaga biabe bialu haribagoni tí manda bidami.

²³I̱ garabaya kogoni tigua agi birabe handamaro buwa nde Timodi tí kamiria abale ibilole manda bu ko.

²⁴Anduane Homogo ibugua hame ledadagua i̱hondo walia hayagua nde i̱bi abale ibule manda bido.

²⁵Ina hamene Ebaborodaidasa ibubi tí kamiria dai bilo pu lolene nga manda bido. I̱ buru pale hewaria tígua ibu, Pu, larimigome i̱ biamogo bule ibiya. Ibalu ibugua i̱la Yasunaga biabebi waibi mandagi bialu hariba.

²⁶Tígua ibu warago bo wiyago hale harimigo ibuni hale halu mini tumutumu wu howa tí kamiria ibule hamelo ka.

²⁷Ibu warago timbuniore balu homolene kaware winigo ani wiaria Ngode Datagaliwabehanda ibu dara halu biamogo biya. Ani biyadagoni ibu hangu ndo i̱hondobi dara halu biamogo biyago irane genda timbuni i̱ha wia tago ho winigo ibugua i̱ dara halu biamogo biya.

²⁸Anigo tígua ibu lone de hondowa turu halimulobi i̱naga dara holene ereba helobi ibu tí kamiria ibilo pu lolene karulape manda bu ko.

²⁹Ibu ibiragola tíbi ibubi Kerisoha howa tígua turu halu, Hama, lalimu. Agali ogonibihondo mitangi timbuniore bu holene nga.

³⁰Tígua i̱ biamogo bua ho hemigo tínime bibe naheyagola Ebaborodaidasa ibugua bia aribia haya. Ani biyagola nde Keriso mitangi bialu biabe bialu hearia homolene kaware wini.