Read Huli 1 Tesalonaiga 4 Bible Online

1 Tesalonaiga 4 - Huli bible

1 Tesalonaiga 4

¹Ina hamene mbaliniru-o lamaro bialu bi mbira langeramago ogo. Tígua Ngode Datagaliwabe turu helonaga agua bialu holene nga lalu abale langirimago mandabu kami. Ogoni manda buwaore bialu harimigoni. Áyu iname Anduane Homogo Yasunaga minini howa tíhondo hongo howa lalu tígua bialu harimidagua dege bia tagoore halu bialu halimu larama.

²Anigo irane Anduane Homogo Yasunaga hongoni howa iname tíhondo agua bialu holene nga lalu langirimago mandabu kamigoni.

³Ani manda bialu Ngode Datagaliwabehanda tí mitangi bialu ibunaga loma bia hene howa wali agali kayu bulene tíha para nahe halimulo hame ledago ogoni.

⁴Agali tí hangu hangu howa tínaga one bedagohondo tigabi dege bialu wali agali Ngode Datagaliwabe manda nabi karume dimagoli halu biagadagua ndo tigabi bulene ngadagua hangu bialu haru halimu.

⁶Anigo mana ogoni mitangi bialu pugua nabi Keriso hameigini maruhondo mo hondo halu ko nabi halimu. Bi ogoni iname ala hongoore howa tí langialu harimagoni irane mana ko urunibi bialu karuhondo Anduane Homogohanda pani mulebira.

⁷Iname wali agali kayu bigibigi bialu holoma̱ya ndo Ngode Datagaliwabehanda ibunaga loma bia hene howa bayale bialu holoma̱ya ina olo helenego kama.

⁸Ani bulene ngago mbiralime mana áyu lawai halu kamagoni puguayagua ogoni ibu agalinaga bi ndo pugualu ka. Ngode Datagaliwabe ibu Dinini tíhondo ngiaga kago ogoni ibunaga bi pugualu kagoni.

⁹Keriso hameigini kamiru tíni gubalini hagahaga bulene ngago agua halimu lalu gilibu wia holene nawi. Irane tíni agua bialu gubalini hagahaga bialu holene nga lalu Ngode Datagaliwabehanda tínihondo lawai hayago manda bidamigoni.

¹⁰Gubalini holene ogoni yuwa Keriso hamewaneigini Masedonia dindini hearu bibahendehondo biamogo bialu harimi. Hamene mbaliniru-o ani bialu harimigodagua hangu ndo bia tagoore halu haabo halimu.

¹¹Ani bialu howa iname tíhondo ala langirimadagua miniha hogorale bu halu marunaga biabe birago hondowa hangu ndo tíninaga biabe beremigo mitangi bialu tínaga gime tomo nalu holenego biabe bialu hole harudalo manda buwaore halimu.

¹²Ani bialu harimiyagua wali agali Yasu mana yu tiga nabi tagira karume tí hondowa bayaleore bialu kami lelobi tíni mbirale buru pale kamigo wali agalime ngilo mini mo hana holene hangu nawilobi halimu.

¹³Ina hamene mbaliniru-o wali agali Yasuhondo mini mbiraore nawi howa mini dunu bia holene nayi karume mbirali homaragola ti yi lalu dara timbuniore hagadagua tí nahalimulo iname wali agali homeneru biagane mana henene manda bilimulo hame ledama.

¹⁴Ani manda bidamagome Yasu ibu homowa lone heyu hayago yu tiga bidamagodagua Ngode Datagaliwabe ibugua wali agali Yasuhondo mini mbiraore wu howa homayaru ti Yasu heba haru dai bulebiragonaga yu tiga bu kamagoni.

¹⁵Mana ogo Anduane Homogo ibugua lawai hayago langerama. Anduane Homogo dai birangi ina nahome dindini kamarume wali agali ala homayaru helalu ina abale napoleberama.

¹⁶Horo ogoningi haragola Ngode Datagaliwabehanda bi dalimu lolebiragobi dahuliyali haguane mbira kagome bi lolebiragobi Ngode Datagaliwabenaga mbelo biguli lolebiragobi uruni ledagola Anduane Homogo ibuni dahuliya andaga howa dalipe holebira. Ani biragola wali agali Kerisohondo mini mbiraore wu howa homayaru ti ala heyulebira.

¹⁷Ani bidagola ogoningi ina nahome dindini kamaru ibugua mo ngoai halu ti ala homene heyiyaru heba mandagi hari beralibaha Anduane Homogo lola hole poleberama. Ani bialu ina Anduane Homogo heba mandagi haabo holeberama.

¹⁸Ani holeberamago bi ogoni lalu tíni miniha mo hongo hagahaga bialu halimu.