Read Huli Yosua 1 Bible Online

Yosua 1 - Huli bible

Yosua 1

¹Anduane Homogo ibunaga biabe biahaga Mosese homeagola ibugua Nunu igini Yosuahondo lalu,

²I̱naga biabe bia haga agali Mosese homayago. Ala i̱na dindi Isaraele wali agali tíhondo ngulebero larugoria áyu í̱bi wali agali urunibi tígua Iba Yodana domalu anda pole manda manda bilimu.

³I̱na abale Mosesehondo lo winigodagua dindi tígua ge hai holeberemigo i̱na tí ngido.

⁴Dindi tu au ngeledo. Dalu emene hangu ibagane wiagoha howa Hari Lebanononaga tu wulebira. Ni tagira ibiragoha iba timbuni mini Yuberedisi poragoria howa Hidialinaga dindibi ni paliragoria iba solowara Medidereniana tu wulebira.

⁵Yosua-o í̱ keangi agali bibahendeme í̱ bope halu ti wayali nahabehe holebira. I̱na Mosesela harudagua í̱labi obiagonidagua dege holebero. I̱na í̱ yu wa naholebero.

⁶Wali agali o karu ti mamaliruhondo dindi o ngago tí ngulebero lo wirugo í̱ha howa mo mulebero. Wali agali dindi ogoniha karu bu helo í̱na haru halu í̱ mini bilinahe howa miniha dungulo habe.

⁷I̱na mana lo wirugo i̱naga biabe biahaga Mosesehanda langiyagome lo wiadagua bibahende bialu maru pugulani hondowa habe. Ogoni hondowa nahende tingi howa gi tigahayagibi gi lehayagibi handa a̱i̱ na̱i̱ buleni. Ani bialu kegola í̱ kegohayagi bayale hangu hama polebere. Anigo í̱na mini bilinaheore howa miniha dungulo habe.

⁸Mana lo wirugonaga mbuga ogoria lo ngagoniore mitangitangi bialu mbiragabi horombebi lo manda biaabo habe. Ani buwa bibahende lo ngadagua biaiore hole bayuwa manda bibe. Anidagua biriyagua í̱na bule lowa mandabu keru biai halu bayaleore bima polebere.

⁹Nalangiruyabe. Í̱ mini bilinahe howa miniha dungulo habe langirugo ndobe. Anduane Homogo í̱naga Ngode Datagaliwabe i̱ kogo í̱ poregoria í̱ heba holeberogo gi nahe bu miniha au buledabe lo mandabi buleni, lalu lamini.

¹⁰Yosua ibugua wali agali haru haga haguane hearuhondo lamialu lalu, Wali agali kagoria purogo lowa lalu, Horo tebiru howa Anduane Homogo tínaga Ngode Datagaliwabe ibugua dindi ngule layago ngulebirago tígua Iba Yodana domole tomo manda manda buwa mali̱ya, lamilimu, lene.

¹²Ani lowa hameigini Lubenebi Gadabi hameigini Manase maru talebu howa tihondo Yosuahanda ogodagua lalu,

¹³Ngode Datagaliwabenaga biabe biahaga agali Mosesehanda bi langiyago ogo, Dindi ogoni tí biralimulo Anduane Homogo tíninaga Ngode Datagaliwabe ibugua ngiyadagoni, lenego bayuwa mitangi bilimu.

¹⁴Tí onebi waneiginirubi bulumagarubi iba ange ni ibirahayagi ogoria heloleberemi. Tínaga wai biagane agali biarume ti hamene Isaraele hameigini o poraru biamogo bule tigua Iba Yodana ala domalu bamba holebira.

¹⁵Tínaga Anduane Homogo Ngode Datagaliwabe ibugua ti dindi ni paliragohayagi biago mule layago milo. Mialu bayuwa ka handala tíbi tíni dindi Anduane Homogonaga biabe biahaga Mosese ibugua Iba Yodana ni tagira ibiragohayagi ngiyagoria hole dai bule, lalu Yosuahanda lene.

¹⁶Ani layagola tigua Yosuahondo ladai bialu lalu, Iname í̱na bia larego bibahendeore biai holeberema. Í̱na pu laregohabi piai holeberema.

¹⁷Mosesenaga bi hale harimadagua í̱naga bi laregobi hale holeberema. Anduane Homogo í̱naga Ngode Datagaliwabe ibugua Mosesela hayadagua í̱labi ogonidagua helo.

¹⁸Mbiralime í̱ kalo manda nabiyaguabi í̱naga bi larego hale nahayaguabi bia larego nabiyaguabi ogonibigo ibu homelo bolebira. Í̱ mini bilinahe howa miniha dungulo habe, lalu lamini.