Read Huli Yosua 5 Bible Online

Yosua 5 - Huli bible

Yosua 5

¹Amoroalinaga kini Iba Yodana ni paliragohayagi henerubi Kenanalinaga kini iba solowara mini Medidereniana hapara ho henerubi tigua Anduane Homogohanda Isaraele wali agali Iba Yodana domalu pelonaga iba biago mo hundia haya layago hale howabi Isaraele wali agali hondowabi tinaga gubaliniha gi timbuni halu mogo lowa durulalu hene.

²Ogoningi Anduane Homogohanda Yosuahondo lalu, Í̱na are neheme Isaraele agalinaga dongone podo mabu bule manda bibe, lene.

³Ani layagola Yosuahanda are neheme Isaraele agali bibahende dongone podo mabu bini. Hari odago mini Hari Dongone Podene lalu wini.

⁴Yosua ibugua agali biarunaga dongone podo mabu binidaruni irane manda ogobi buwa bini. Iyibi dindi yu wahalu ibiyaru agali igiribi bibahende dongone podo mabu biai hene. Ani binigo mani Isaraele wali agali biaru ti dalu emene hangu ibagane wiagoria ibaga bu hearia mali pira maria (40) henego ogoningi igiri hono wiyaru bibahende dongone podo mabu nabi hene. Mali uruni piai heangi agali wai bibehe hayaru Anduane Homogohanda layadagua nabiyagola homai hene. Anduane Homogo ibugua bi ala lowinigo ogo, Tí dindi bayaore gibi ngulebero larugo nahendedemiore homoleberemi, lo winidagua ani bini.

⁷Anigo agali homayaru igini ho aribia hayaruni ti dongone podo mabu nabiyagola bi lo winidagua hendelo lowa igini o biaru podo mabu bini.

⁸Isaraele hameigini biaru dongone podo mabu biai howa helayaru dere biyaru dabi helo lowa balai anda bu hayagoria hadai bialu hondo hene.

⁹Ani biaria Anduane Homogohanda Yosuahondo lalu, Tí Iyibi dindi howa garabaya biabe ale bia halu howa tagaho harimigo horo áyu ogoni i̱na mo waharogoni, lalu lene. Dindi o binidagoni mini Giligala wini. Mini ogoni áyubi wiaabo ka.

¹⁰Isaraele wali agali Giligala dindi palepale wiagoria balai anda bu hayagoni Yarigo dindi hapara hearia Bolangua Halu Penego Horo mitangi bialu ogonaga tomo ege o biagoninaga horo denengi (14) nelayagola howa nene.

¹¹Egerebalene tigua tomo Kenana dindini wini pigane ogoningi ladi ale mini widi hirinibi mberedi yidi nahe howa hirinibi nene.

¹²Horo ogoningi howa tomo mini mena hariha howa ala ibira haabo hayago ibira nahe Isaraele wali agali tigua tomo Kenana dindini wiaru nene.

¹³Yosua ibugua Yarigo hapara howa handalu hearia agali mbira wai biagane ayu tibu gime yu howa ibu denguini ha daga hearia de hendene. Ani hondowa Yosua ibugua agali biago hearia hapara howa lalu, Í̱ inanaga wai biaga amiali biaru aria mbira kebe be waitigi agali kebe, lene.

¹⁴Ani layagola agali biago ibugua ladai bialu lalu, Hale harigoni kirabali ndo labolabo. Anduane Homogonaga ami karunaga haru bamba hagane agali i̱ ko, lene. Ani layago hale howa Yosua ibugua dindini bulu palu ibira howa agali biagohondo lotu lalu howa lalu, Anduane-o i̱ í̱naga biabe bia hagane agali kogo i̱na agi buliya hameledebe, lene.

¹⁵Ani layagola Anduane Homogonaga ami karunaga haru hagane biago ibugua Yosuahondo lalu, Dindi o kegoni Anduane Homogo ibunaga dindi loma bia ho winini kego ge su golo ngela, lene. Ani layagola Yosua ibugua layadagua bini.