Read Huli 1 Timodi 5 Bible Online

1 Timodi 5 - Huli bible

1 Timodi 5

¹Agali wahe karuhondo talialu nalabe. Í̱ abahondo larilidagua dege lalu lo tiga bibe. Agali daliahe karuhondo í̱ hamenehondo larilidagua dege labe.

²Wali wahe bedaruhondo í̱ ai̱yahondo birilidagua dege bibe. Wandari daliahe bedaruhondobi nde í̱ mbalinihondo mitangi tigabi birilidagua dege bialu habe.

³Wali dalo bedaru biamogo biaga mbirali nahe ibu hangu bereagua biamogo bulene nga.

⁴Wali dalo mendego ibunaga waneiginibi aguanebi kayagua tigua Ngode Datagaliwabe mana mitangi bialu wali dalo ogoni biamogo bulene nga. Irane ibugua ti ala emeneni biamogo biyago mitangi bialu biamogo bulene nga. Mana ogonidagua bialu karume Ngode Datagaliwabe mo turu haga ka.

⁵Anigo wali dalo ibuni hanguore bedagome ibu Ngode Datagaliwabehondo mini dunubia ho biruwa horombe mbiragabi ibuhondo bi lalu, Í̱na i̱ biamogo bia, laabo halu biraga.

⁶Wali dalo tebonego ibu ibuninaga tinginini bulenego hangu hame lalu mo tene haga bereagua ibunaga mini dininila kiroba homene beda.

⁷Wali agali marume wali dalo bedaru mana ko birago hondowa mege buligo í̱na wali dalo biarubi ibu damenebi tihondo bi ogodagua lamibe.

⁸Mbiralime ibu damenebi hameiginibi de handalu biamogo nabiyagua ibu Ngode Datagaliwabe mana lo ngago pugualu Ngode Datagaliwabe mitangi nabiaga karubi ndo ibu koorene ko ka.

⁹Wali dalorunaga mini bebani gilibu ngegoha wali dalo maru mali pira waragaria (60) nape bedaru tinaga mini gili biatago nahabe. Wali dalo ala agali mbira hangu penegobi

¹⁰biamogo biaga wali abogo beda lenegobi berene. Ibu waneigini bayuwa haru hagabi wali agali tara tara ibu andaga ibilo nenege hinagabi Keriso hameigininaga wali agali genda yu karu biamogo biagabi mana bayale tara tara biagabi berene. Wali dalo mana urunibi biaga berene bedaru tinaga mini hangu gili biatago holene nga.

¹¹Anigo wali dalo daliahe bedaru tinaga mini gili nabibe. Irane ogonaga larogo tigua agali maru polene hame lowa Kerisonaga biabe bialu biruliya lalu bi lowiyago pugualu Keriso erembira mialu polebira.

¹³Ani bialu tigua tinaga horo pongo bo wiyago mohole bialu wali agali andaga ngaruha ge hai halu ko marubi bia tago halu bi diburibu loyu ibaga bialu wali agali mini lowa ndelalu bi nalene ngago lama ibaga bu haga.

¹⁴Inahondo handabe manga ho karume ina mege bulene henge nawilo i̱na hame ledogo ogo. Wali dalo wahe ndo daliahe bedarume agali mende puwa waneigini taba hanalu tinaga andagani biabe bayuwa bialu birulene nga laro.

¹⁵Wali dalo marume hariga tigabi ngago wahalu dama Heyolabe talima piaga beda.

¹⁶Keriso hamewane mbira bedago ibu damene maru wali dalo bedayagua Keriso hameigini karu ti genda nahelo damene tinime biamogo bulene nga. Ani bialu Keriso hameigini karume wali dalo tini hanguore bedaru biamogo bibeheore wulebira.

¹⁷Agali ala hene miniwi karume wali agali bayuwa haru howa mana lamialubi lawai halubi biabe erekuibi uruni bialu howa ti yolo karulape nolene nga.

¹⁸Anduane Homogonaga mbugani bi lo ngago ogo, Widi gandulo winigo lini hondo ibira ibira bilo nogo bulumaga geme hengedama pelo haru howa bulumaganaga ne hangane huba bulene nawi, lalu gilibu nga. Bi mendebi lo ngago ogo. Biabe biaga kagome biabe biradagua yolo nolene nga, lalu gilibu nga.

¹⁹Mbirame lalu, Agali ala hene miniwi abogohanda ko mbira biya, layagua ogoni hale nahabe. Kirali tebiralimebi, Henene ko biyaria de handarima, layagua o karulape mo tiga bulene nga.

²⁰Ani mo tiga bialu keria henene biniyagua Keriso hameigini bibahende karu deni helowa ti hale halu gi helo í̱na agali ko biyago hongo howa talibe.

²¹I̱na Ngode Datagaliwabenaga denibi Keriso Yasunaga denibi dahuliyali loma bia henerunaga denibi howa í̱hondo bi hongo howa ogodagua laro. Í̱na bibelo bi maru o gilibu wia haroruni biai halu wali agali maru í̱ hame nalederuhondo ko bialu í̱ hame lederuhondo turubini bialu nabibe. Ani nabi bibahendehondo mana mbiraore hangu bialu habe.

²²Wali agali Anduane Homogonaga biabe bilo lowa loma bia helo haguaneni gi abale nawibe. Marume ko biyarunaga í̱ha para holani í̱ Ngode Datagaliwabenaga deni bayale hole manda buwa habe.

²³Iba ibuni hangu nanabe. Í̱ tombeha warago baraligo manda buwa waini iba emene mbira naga bialu habe.

²⁴Agali marume ko birago panigiore biagago wali agali bibahendeme manda biai howa lo tiga bule abale laga. Agali marume ko birago mendealime manda nabi bu donge ho kago maniore bia tagi haga.

²⁵Ogonidagua dege marume bayale birago wali agali bibahendeme manda biai haga. Bayale binigo maru manda nabini ngarubi do ho haabo habe nahe holebira.