Read Huli Pilimono 1 Bible Online

Pilimono 1 - Huli bible

Pilimono 1

¹I̱ Polo Keriso Yasunaga biabe biahaga hewago hondowa marume i̱ dariba hayago kogoni. I̱bi ina hamene Timodibi iyame ina hameneore howa biabe mandagi beramali Pilimono í̱bi ina mbalini Abiabi Yasunaga ami agali Agibasabi Keriso hameigini í̱ andaga ngoai hagarubi tíhondo beba ogo gilibu wia haraba.

³Inanaga Aba Ngode Datagaliwabebi Anduane Homogo Yasu Kerisobi libunaga biamogo bia holenebi mo palia holenebi tíhondo ngilo hamelo ko.

⁴I̱na horo bibahendengi Ngode Datagaliwabehondo bi lalu howa í̱ mitangi bialu ka̱i̱ laruli.

⁵Irane í̱na Ngode Datagaliwabenaga wali agalihondo gubalini ho kegobi Anduane Homogo Yasuhondo mini mbiraore wu kegobi hale haru.

⁶Í̱na mini mbiraore wu kegonaga mana wali agali maruhondo lamialu kegoni howa ina Kerisoha hogimbu bu kamagonaga turu holene tara tara ngaru manda biai hami̱ya Ngode Datagaliwabehondo bi ani lalu ko.

⁷Hamene-o í̱naga gubalini holene ngegome Ngode Datagaliwabenaga wali agali bibahendenaga gubalini mo turu hai hari. Ani birigome i̱ mo turu halu i̱naga mini mo hongo hari.

⁸Irane Kerisoha i̱ í̱naga hamene howa mbirale mbira bulene nga ale í̱hondo hongo howa, Harugo bia, labehe kogonigo.

⁹Nde abule i̱na í̱ gubalini timbuniore ho kogodago bame la hangu bero. Ani larogoni i̱ Polo Keriso Yasunaga bi lamiaga kogoni hewaria marume dariba henego áyu garabaya kogoni howa ani laro.

¹⁰I̱ garabaya howa Onisimasi ibu Kerisohondo mini mbiraore wilo lowa Ngode Datagaliwabe mana lawai haru. Ani lawai harugola ibu mini mbiraore wiyago Kerisoha howa i̱ iginiore kago ibunaga la haro.

¹¹Ala ibu í̱la habane mbira nabulene hayago áyu nde í̱nagabi i̱nagabi galone biaholene kagoni.

¹²Áyu í̱ kegoria daibi larogo. Ibu ibiradagua i̱naga gubalini holene ibu heba ibilaro.

¹³Bi mana debene lawai haruligonaga garabaya kogoni koria í̱na i̱ biamogo biradagua Onisimasi ibugua bilo ibu i̱la, Haba, lole hame laru.

¹⁴Anigo nde í̱na i̱ biamogo bia naloleberogo í̱ni bua biradagua dege bibe larogoni. Harugo mbira bia nalolebero. Í̱ni hame lededagua bia labelo henge ngero.

¹⁵I̱na manda berogola Onisimasi ibu emene tigimandi hanguni pubagi ho hayagonigo nde abule horo bibahendeni ibu í̱nila haabo holeberabi.

¹⁶Ai áyu ibu garabaya biabe ale biahaga hangu ndogo ibu Kerisoha howa iya hameneore kabagoni. Ibuhondo gubalini howa mitangi timbuni ho kogoni. Í̱na ibu garabaya biabe ale biahagabi Anduane Homogoha í̱naga hameneorebi ka mitangi buwa ibuhondo gubalini timbuniore ho holebere.

¹⁷Í̱na iya mini mbiraore ho kabago manda biriyagua i̱ eberogola turu holenedaguaore Onisimasi ibiragola turu halu haru dai bibe.

¹⁸Ibugua í̱hondo kagua mbira biniyaguabi í̱la dano mbira heneyaguabi i̱ha mo bade habe.

¹⁹Ogoria i̱ninaga gime gili berogo. I̱ Polohanda yolo bia dai bulebero. I̱na í̱hondo mo mitangi bia habe naheorego irane í̱naga holene i̱hondo dano ho kegoni í̱ni manda bidegoni.

²⁰Anigo i̱naga hameneore Anduane Homogo mitangi bialu i̱ mo turu habe. Iya Kerisoha hamenela kaba manda bialu i̱ mo wála habe.

²¹I̱na gili bialu howa manda berogola bi larugo hangu ndo bulebere. Maru biatago halu bulebere manda bido.

²²Ani bialu howa i̱ ibalu paluene anda hobane mbira manda manda bibe. Irane tígua i̱naga Ngode Datagaliwabehondo bi la halu kamigo ibugua ladai bialu i̱ tíni kamiria haru dai bulebira lowa mini dunu bia ho kogoni.

²³Ebaborasa ibubi Keriso Yasunaga biabe biyagola garabaya binigo i̱ heba kabago ibugua, Í̱ mitangi bialu ko, laya.

²⁴Agali maru i̱ heba mandagi biabe biaga Maga Arisadagasa Dimasa Luguma tiguabi anidagua dege laya.

²⁵Anduane Homogo Yasu Keriso ibunaga biamogo bia holene tíha wiaabo helo hamelo ko.