Read Huli Yamese 1 Bible Online

Yamese 1 - Huli bible

Yamese 1

¹I̱ Yamese Ngode Datagaliwabenagabi Anduane Homogo Yasu Kerisonagabi biabe bia haga kogo howa Ngode Datagaliwabenaga wali agali dindi bibahendeni purogo lo kamiru tí mitangi bialu beba ogo gilibu wia haro.

²I̱ hamene mbaliniru-o mo tandaga holene tara tara tí kamigoria íbu ngagola turuho halimu.

³Mo tandaga holene tara tara urunibi íbu ngagola tí agi mitangi beramibe hondolenaga ngago manda buwa Ngode Datagaliwabehondo mini mbiraore wirimigome bolangua ho halimulonaga nga. Genda dewa urunibi íbu ngagola yu howa hongo ho haabo holeberami.

⁴Hongo haabo howa hibulo kamigome mini bogabi baya buruguleorebi karulapeorebi holeberami.

⁵Anigo agi buabe toba ho harimiyagua Ngode Datagaliwabehondo bi lolene nga. Bi lalu howa mini gigabi wulene ngi lalu kagohondo ibugua nangule nale turu howa mo tago halu mulebira.

⁶Anigo ngi lalu kamigo howa Ngode Datagaliwabehondo mini mbiraore wuwa ngulebiraore manda bialu bi lalimu. Mbiralime ibuhondo bi lalu howa mini dewa wuwa bi layagua ibu puyabu pu laragola iba yaribu bialu pu íbu dai bu biagagobi ka.

⁷Ibugua mini dewa wuwa hariga mbiraoreni polene manda nabi hariga dewani polene manda bialu kagoni. Ogonibime Anduane Homogohondo mini mbiraore nawi howa mbira ngi laragola ngulebira mitangi bulene nawi.

⁹Mbirali ibu Keriso hameigini howa yagibano kayagua Ngode Datagaliwabehanda ibu mo yaraga haragola turu holene nga.

¹⁰Mendeali ibu Keriso hameigini howa homogo kayagua Ngode Datagaliwabehanda ibunaga mbirale ngaru mitangi nabi ibu mo dindi haragola turu holene nga. Irane balawaya minane anda hararu gau lalu ereba hagadagua mbirale dewawi karu homolebira.

¹¹Balawaya dedago nime da ba haragola gau lalu dogolope hagadagua homogo karu uruninaga biabe bialu kaore homalu bibahende ngelalu polebira.

¹²Mo tandaga holene tara tara ngagola tígua ema nabi hongo howa hibu lalu haabo howa Ngode Datagaliwabehondo gubalini ho karuhondo holene gahenge Ngode Datagaliwabehanda, Ngulebero, layadagua ngulebiraore manda buwa tí turu holene nga.

¹³Mo tandaga holene ngagome mbirali ko mo bia haragola ibugua lalu, Ngode Datagaliwabehanda i̱ ko mo bia halu ka, lolene nawi. Ko ngagome Ngode Datagaliwabe ko mo bia habe nahe nga. Ngode Datagaliwabe ibugua mbirali ko mo bia nahaga ka.

¹⁴Mbirali ibuni dimagoli haragome ko mo bia holene tene nga.

¹⁵Ibuni dimagoli howa ko biaga. Ko biyago anda howa homolene wulebira.

¹⁶I̱ hamene mbalini turubiru-o tíni mo hondo nahalimu.

¹⁷Ngode Datagaliwabe ibunime mbirale bibahende baya buruguleore ngaru turu halu bame ngiaga ka. Ngode Datagaliwabehanda hariha wá haga bibahende karu Wabiaga ibu ka. Ngode Datagaliwabe ibu tara nahagabi de handa tara nahagabi mo aruma nahabehebi kagoni.

¹⁸Ngode Datagaliwabehanda bibahende wabuwa ina dunini holoma̱ya hame lowa ibunaga bi mana henene lolene ngagome mo gahenge ho helenego kama.

¹⁹I̱ hamene mbalini turubiru-o mbira ogo mitangi bulene nga. Bibahendeme bi bayuwa hale hai hami̱ya. Anigo bi abale la nabi kebabi abale nahe hami̱ya.

²⁰Wali agalinaga keba holene ngagome Ngode Datagaliwabenaga tigabi bulene ngago mo bia nahaga.

²¹Anigo ko bulene bibahende ngaru wahai halimu. Ngode Datagaliwabehanda bi mana tínaga bu habaneha hangayago manga nahe howa bayuwa yu tigabu halimu. Ani birimiyagua Ngode Datagaliwabenaga pele mulene yu holeberami.

²²Bi mana ogoni hale dege harimiyagua tíni mo hondo harami. Hale halu bulene nga manda bilimu.

²³Mbiralime iba wa̱yu̱ handalu puwa mani ibunaga dengui abi kobe toba halu embeda haga. Ogonidagua mbiralime bi mana hale howa bia nabiyagua ibu ogonibi ka.

²⁵Ngode Datagaliwabe bi mana baya buruguleore lowini ngagome wali agali golope haga. Mana ogoni mbiralime bayuwa mitangi bu haabo hayagua bi mana embeda nahe bulene ngadagua bialu ibugua Ngode Datagaliwabenaga turu holene handa walia holebira.

²⁶Mbiralime, I̱ Keriso hameigini ko, lowa ibunaga hége haru nahaga kayagua ibuni mo hondo hara. Mana yu kogo bamedago lowa ani laga ka.

²⁷Aba Ngode Datagaliwabehanda Keriso hameigini henemanebi tigabibi kayagua ti ogobiore holebira manda bu ka. Wali dalo bedarubi waneigini hono wahene karubi ti genda yu kagola biamogo bia holene nga. Ani bialu howa dindi mana ko ngarume tí mo pila holigo hondo wandialu halimu.