Read Huli Haguane Heneru 15 Bible Online

Haguane Heneru 15 - Huli bible

Haguane Heneru 15

¹Emene howa mani widi lini dolene tu hayagola Samasono ibu one biago berearia nenege pole pialu howa nogo meme igini daula mbira minu hana halu pene. Ani buwa ibu one biago abahondo lalu, I̱na i̱ one tamu paliaganeha anda poabago, layagola ibugua anda pelo henge namini.

²Ibugua Samasonohondo lalu, I̱na mitangi berogola í̱na wali ogonihondo handabe mangaore harida lo manda buwa i̱na ibu í̱ nenege biagohondo hado mirugoni. Ibu hagibuni heyogone bayaore bedago í̱ ogoni ho aribia harene, lene.

³Ani layagola Samasonohanda lalu, I̱ Pilidialiruhondo birulidagua i̱na áyu nabulene wulebira, lene.

⁴Ani lowa ibugua biango dudu ale handari tebira (300) minini. Ani buwa kira kira erene pongo pongo bima puwa pongonegoha ira hale hedo pongobi lama pene.

⁵Ani buwa biango dudu ale biaru ira hale deaore Pilidialinaga widi lini daga mabu wiagoha golope helene. Ibugua ogonidagua biyagome widi lini bogabi do wiarubi maru wene mabuni dearubi irame daiore halu olibe ira lini daga hearu heba daiore helene.

⁶Ani biaria Pilidiali biarume, O bidagoni aiwa binidabe, lene. Ani lowa tigua manda bialu hearia, Samasono ibuguaore biniyane hendene. Ogoni irane ibu imane Timuna agali biagome Samasono one biago ibu nenege biago hado miyagonaga biniya. Ani biniyagola Pilidiali biarume puwa wali biago homelo bo delalu ibu aba damenemabi anda heba delo bo heda halu bini.

⁷Ani biyagola Samasonohanda tihondo lalu, Tígua biaganedagua o bidamigonibe. Ogoniyagua i̱na lo werodaguaore bulego. I̱na naholego tíhondo paipai biaore bialu waholebero laro, lene.

⁸Ani lowa ibu kebaore gibi howa Pilidiali dewaore minalu bo homelai helene. Ani bialu ibuni ibida puwa Edama hari bare weagoha egeandaha pu hene.

⁹Pilidialiru ibuwa Yuda dindini anda pialu wali agali Lehi tanoni hearu minalu bene.

¹⁰Ani biyagola Yuda agali hearume tihondo lalu, Tígua irane aginaga ina minu balu kamibe, lene. Tigua ladai bialu lalu, Ina Samasono minu ibalu ibugua inahondo bialu hayadagua iname nde ibuhondo bialu hole lowa ibirima, lene.

¹¹Ani laya handala Yuda agali daosini tebira (3,000) Edama hari bare egeanda biagoria Samasono berearia pene. Puwa Samasonohondo lalu, Pilidiali biaru ibuwa tigua ina haru hagane kago í̱ manda nabi kebe, lene. Í̱na inahondo agi bialu pu kebe, lene. Ani layagola ibugua tihondo ladai bialu lalu, Tígua i̱hondo biyadagua i̱na nde tíhondo bialu pu ko, lene.

¹²Ani layagola tigua ibuhondo lalu, Iname ogoria ibirimadagoni í̱ minu daba howa tinaga giha ya hole lowa ibirima, lene. Ani layagola Samasonohanda tihondo lalu, Tígua i̱ heneneore Pilidialirunaga giha ya hole tínime naboleberema lalu bi henenego ladaba, lene.

¹³Ani layagola tigua lalu, Ogoni karulapego iname í̱ minu daba hangu howa tinaga giha ya holeberema. Iname í̱ homabelo naboleberema, lene. Ani lowa tigua ibu pulimu gahenge hongohe kirame hari bare biagoha howa minu daba ho yalu ibuwa Pilidialiruhondo mini.

¹⁴Samasono ibu Lehi tanoni íbu heagola Pilidiali biaru gerai lalu ibu heagoha bi hongo howa ladaga daga bima ibini. Ibiyagola Anduane Homogonaga hongo holeneme Samasono abaleore mo hongo hene. Ani biyagola ibugua pulimu gahenge hongohe ibunaga gini daba heago tongoloki halu irame pu payini do ganduloki haradagua bilene.

¹⁵Ani biagola ibugua nogo dongi mbira ayure dege homeneyago ogoninaga ne hengene kuni mbira wiaria handa walia hene. Ibugua o biagoni mo yuwa ogonime agali daosini mbira (1,000) homelo bai hene.

¹⁶Ani buwa Samasonohanda wai bi lalu agua lene. Nogo dongi ne hengene kuni mbiraore hangume i̱na agali daosini mbira (1,000) balu home larugo. Nogo dongi ne hengene kuni mbira hangume i̱na bo auya haga bigi buwa wima iri iri bu ngelarugoni, lene.

¹⁷Aguani biai howa mani ibugua nogo dongi ne hengene kuni biago mo wahene. Dindi o bialu hayadagoni mini Lamadi Lehi.[4]

¹⁸Ani bialu hearia Samasono ibugua iba noaore timbuni howa ibu Anduane Homogo olene. Olowa lalu, Í̱na i̱hondo wayali holene gibi ogoni ngirigo áyu i̱ iba noa howa homo ngoria Pilidiali Ngode Datagaliwabe mitangi nabiaga o karunime minilo birida, lene.

¹⁹Ani layagola Ngode Datagaliwabehanda Lehi tanoni dindi uli mbiraha howa iba dugua tagi helene. Ani biyagola Samasonohanda iba biagoni nayagola mini wá lalu ai dungulo daiore bini. Ani biyagola iba o dugui layagoni mini Hagore winigo áyu Lehini dugua ho wiaabo ka.[5]

²⁰Pilidialime dindi ogoni de hondo heago helowa Samasonohanda Isaraele wali agali mali pira kira (20) haru haho wini.