Read Huli Haguane Heneru 2 Bible Online

Haguane Heneru 2 - Huli bible

Haguane Heneru 2

¹Anduane Homogo ibunaga dahuliyali mbiralime Giligolo dindi howa Bogimi dindi puwa Isaraelealiruhondo lalu, I̱na tí Iyibi dindi howa haru halu tagira pialu dindi bamba tínaga mamaliruhondo ngulebero lo wirugo o biagoria haru pirugoni. Ani bialu i̱na bi au lo wiru. I̱na habo nalolene bi tí baba lo wirago napuguleore lo wiru.

²Tígua wali agali dindi ogoria karu heba habo nalolene bi mbira nalowilimu. Tinaga mbirale bo lomabu miaga dabu ngaru bo gialo waore halimu larugoni. I̱na ani bilimu larugoni tí nabi howa ai nalewadagua bu aribia halu harimida.

³Ani bialu harimidago ai áyu i̱na larogo wali agali o karuni tígua i̱na bo batagi helo manda bu harimigoni bo batagi naholebero. Uruni tínaga waitigi ti halu tígua tinaga dama tara tararuhondo bi pupu wilimulo ti warape halu holebira, lene.

⁴Dahuliyalime tihondo ogonidagua lamiyagola Isaraele wali agali bibahendeoreme taga halu dugu timbuni bini. Irane ogoninaga

⁵dindi ogoriani dugu bini lalu mini Bogimi wini. Dindi ogoriani tigua Anduane Homogohondo mbirale bo loma bialu mini. [1]

⁶Yosuahanda Isaraele wali agali ti hariga pole piyagoria, Hangu hangu pugupugu bidaba, lalu agali homane mbira hangu hangu ibuninaga dindi tale bialu karulolenedagua karulaga laga bilo pelene.

⁷Yosua heangi hama ibiyagoniha Isaraele wali agalime Anduane Homogonaga biabe bialu hene. Ani bialu mani ibu homehabi Anduane Homogonaga biabe biaho wini. Ogonidagua bialu henedagoni haru haga maru ti Anduane Homogohanda Isaraele wali agalihondo gibiore tara tara biyaru tinime hendenego hai heaore ani bialu hene.

⁸Anduane Homogonaga biabe biahaga Nunu igini Yosua ibu luha dege biane mali handari mbirani pira (110) peagola homene.

⁹Ibunaga tingini ibuni dindi gembone mbira mini Timina Sera hari bare Eberaimi dindi Hari Gasi weagoha hora hene.

¹⁰Wali agali dabane ogoningi henedaruni bibahendeore homai halu dabane mende maha ha aribia hayarume ti Anduane Homogo embeda halu ibugua Isaraele wali agalihondo bima ibiyarubi embeda hai hene.

¹¹Ani bialu Isaraele wali agali biarume Anduane Homogohondo mana ko ngubiore bialu tigua Kenana wali agalinaga bi pupu wule gime wabini Balaruhondo mitangi bialu mo tene ho hene.

¹²Tigua Anduane Homogo ti mamali henedaruninaga Ngode Datagaliwabe ti Iyibi dindi howa haru tagira ibiyago ogoni ibu embeda halu lotu nale wahalu tigua dama tara tara wali agali ogoriani ho mabu biarunaga damahondo bi pupu wule lowa wialu hene. Tigua dama urunihondo bulu palialu bi pupu wiyagome Anduane Homogo mo keba hene.

¹³Ani bialu tigua Anduane Homogo mitangi bialu lotu lolenego hado wahalu tigua gime wabini mini Balarubi mende mini Asedarerubi tinaga biabe bialu hene.

¹⁴Ani biyago hondowa Anduane Homogohanda Isaraele wali agaliruhondo keba kaubiore howa uruni pageali harigani karume balu mbirale henedaru tagu page bilo henge mini. Ibugua tinaga waitigi hearu kaware ti heagoria ho mabu bilalu tinaga hongo daligaore ho bolangua helene. Ani biagola Isaraeleali biaru tininaga tingini mo do halu ha do habe nahe wini.

¹⁵Bibahendengi tigua wai bule tagira pugu biyagola Anduane Homogo ibu ti heba nahole lalu bi lo wiyadaguaore habagiho hene. Ani biyago hondowa tigua mini genda timbuniore halu hene.

¹⁶Ani bu heagola Anduane Homogo ibugua Isaraelealiru pagealirume belo yupe hayaruni áyu pele milo haru haga maru dabo helene.

¹⁷Ani biyagolabi Isaraeleali tigua tinaga haru haga helayarume bi layaruni bayuwa hale ho tiga nabiore hene. Isaraeleali uruni ti Anduane Homogohanda layadagua nabi howa tigua dama tara tararuhondo bi pupu wialu hene. Tinaga aba ala henerume Anduane Homogohanda bi layadaguaore bialu penego áyu dabane gahenge ha aribia hayagome ani nabi abale yu hado wahalu hene.

¹⁸Anduane Homogohanda Isaraele wali agali haru helo haru haga mbira dabo mirangi Anduane Homogo ibugua haru haga ogoni biamogo biragola haru haga ogoni kangi ti waitigime nabelo pele miaga. Anduane Homogohanda tihondo dara henedagoni irane tigua mini burugu lowa tandaga nalu u̱lu̱ lalu dugu bialu heago hondowa ani bini.

¹⁹Ani bialu heagola dege haru haga biago homaga biyagola wali agali biaru ti ko ala bialu hene biagoria bule dai bigi bialu hene. Uruni tigua ko ala henedarume binidadagua ndo ko ngubiore bialu hene. Tigua dama tara tararu mitangi bialu urunihondo bi pupu wialu hene. Ani bialu tigua tininaga mana ko ngubiore biaga wiyaru yu wahole manga ho hene.

²⁰Ani biyagola Anduane Homogo ibugua Isaraele wali agalihondo keba taraore howa lalu, Dindi hameigini ogome habo nalolene bi i̱na ogoria tinaga mamaliruhondo puguaore nabi yu halimu lo wirugo puguarimida, lene.

²¹Ogoniore irane tigua i̱na bi lo wirudagua nabiyagome i̱na dindi hameigini mbira Yosua homedaha dindi ogoriani haho wiaabo karu wara tagi naholebero, lene.

²²I̱na Isaraele wali agali urunime tinaga mamalime i̱naga mana talialu binidagua áyu nde tigua birabe be nabirabe hondole haru holebero, lene.

²³Ani lowa Anduane Homogohanda dindi hameigini uruni dindi ogoniha helo henge mini. Ani bialu ibugua Yosuahanda hongo howa ti bope helo henge nami homehabi wara tagibi nahe dege helene.