Read Huli Haguane Heneru 5 Bible Online

Haguane Heneru 5 - Huli bible

Haguane Heneru 5

¹Horo ogoningi Deborala Abinoama igini Baragalame mambolo balu iba gana ogodagua lene.

²Haru haga hearume Isaraelealiru haru bamba halu wai tini buleore lalu turu howa binidago Anduane Homogo mini yaraga hama.

³Kini kamiru hale hadaba Haru haga kamiru tí hale ho tiga bidaba. I̱na mambolo balu Ngode Datagaliwabe Isaraelealirunaga Anduane Homogohondo iba gana lo merogo.

⁴Anduane Homogo í̱ hari Sia yu wahalu Edomo dindi hobane wiagoha howa tagira ibiringi dalu hari daligani howa ibalu dindi dumbidumbi biyagoni. E̱ iba li ginurunaga howa porabupe hayuagoni.

⁵Anduane Homogo Hari Sainaini heagoria Anduane Homogo Isaraelenaga Ngode Datagaliwabe deni hari li hearuni ema bu handayagoni.

⁶Anada igini Samaga heangibi Yale bereangibi harigani garo ale nogo hosini gili lalu wali agali biru yalu bolangua halu dindi ogoriani pobe nahe wini. Ani bialu harigaliru ti hariga leneha pu bagi halu pene.

⁷Isaraele wali agaliru ema nabi hemigoria hope heagola Debora í̱na mo heya halu wali ai̱yali ai̱ya ibagadagua Isaraele wali agaliruhondo ibirigoni.

⁸Ani biagola Isaraelealirume dama tara tara dabeneya. Dabayagola howa dindi ogoniha wai tagira ibini. Agali daosini hangu pira maria (40,000) Isaraeleni hayaru mbiralime humbi yandarebi mbira yu ibaga bu heabe.

⁹I̱naga bu mini Isaraele ami haru haga hebabi Isaraele agali wai tinime bule turu halu biyaru hebabi heledogo. Anduane Homogo mini yaraga hama.

¹⁰Ogoninaga tí nogo dongi pelerunaga biraga kamirubi geme dindi dindi piaga kamirubime la handadaba.

¹¹Hale hadaba. Wali agali dewaore iba hambiagane uli wearuha ho mabu bu hagahaga buwa bi anda halu Anduane Homogonaga hongome Isaraele wali agali mo wayali hayarunaga te lalu mambolo baruagoni. Anduane Homogonaga wali agali tininaga dindi timbuni biagoria howa mambolo bama yupe hene.

¹²Haru bambaha Debora haru bambaha. Haru bamba halu iba gana la. Haru bambaha. Abinoama igini Baraga í̱naga garabaya biabe ale bilo agali mininiru haru bambaha.

¹³Wali agali mini bilina helaradagua bialu haga hayaru tinaga haru bamba haga hearu heagoria ubadali haya. Anduane Homogonaga wali agali ibuni heagoria wai bule manda manda bialu ibiya.

¹⁴Ti Eberaimi howa ibalu Beniyamini hameigini wali agali paleago ere mbirahayagi dindi guane mbirani íbu tagira pene. Ami haru haga biaru Magia dindi howa íbu daliyagola haru haga maru ti Sebulunu dindi howa dalini.

¹⁵Isaganaga haru haga hearu Debora heba ibiya. E̱ Isagabi ibalu Baraga ibubi íbu dege bialu ti haru íbu talima ni guane wiagoniha yupe haya. Ti ani bialu heagola Lubene hameigini ti hanuni talebuki buwa tidu yu haga haga bu howa dege ti ibuabe be naibuabe toba howa mini kira wu hene.

¹⁶Ti nogo sibi heba maha hadai bu hayago aginagabe. Nogo sibi haru hagarume nogo mbu lararu hale hole hadai biyadabe. E̱ Lubene hameigini ti hanuni talebuki buwa tidu yu haga haga bialu ti ibuabe be naibuabe toba howa mini kira wu hene.

¹⁷Gada hameigini ti iba Yodana ni tagira ibiragohayagi heagola Dani hameigini ti iba sibi wiagoria haho wiya. Ase hameigini ti iba solowara ange ange ha a̱i̱ a̱i̱ bima piya.

¹⁸Uruni ti ani bima peagola Sebulunu hameiginirubi Nabadali hameiginirubi ti tini homolene kaware wiagoria wai hamani hayada.

¹⁹Tanaga dindini iba Megido angeni kini biaru ibalu wai biyagoni. Kenananaga kini biaru ibalu wai bia biyagoyu tigua muni silibabi mbira namo yalupe.

²⁰Yakundirume li hari daligani howa wai bialu uba a̱i̱ na̱i̱ bialu wai li hari daligani wai bini. Wai ogoni Siserala bu banga bialu hea.

²¹Iba Kisono li wiagome ti hilo yalu pu wahaya. Iba Kisono ogoni hongoheore ndobe. I̱na ge mbarilo handarogo hongo howaore mbarilo handaro.

²²Ani bialu nogo hosirume gerai lalu ibalu tinaga ge habeme dindi biri lama gerai yu pepe biya.

²³Meroso tanobi Merosi tanoni karubi homai helo lalu Anduane Homogonaga dahuliyalime ha ho wia laragoni. Tigua Anduane Homogo biamogo bule ndo ibiniya. Ti ami ale howa ibunaga wai bia hole ndo ibiniya.

²⁴Wali maru beda lowabi waliore Keniali Hebe one Yale ibu ngui duguahe bereneya. Wali dewaore balai andaha bu bereneru wali mbira Yale hangu ngui duguahe bereneya.

²⁵Sisera iba nole hale halu berearia Yale ibugua nogo bulumaga andu iba hambu miya. Andu iba bayaleore be baya buruguleha hambu yu ibuwa miyagoni.

²⁶Ibugua balai anda pu dariba haga ira dehe gi mendeha yalu agalinaga ira nduli baga gi mendehabi yuwa ibugua Siseranaga haguane kuni dambialu ira dehe biagome haguane kuni bo bangalu baga bini.

²⁷Ani biyagola Siseranaga ge duli podape halu birupe hene. Pila podobaga buwa Yale geha ibira hene. Ibunaga geha ge duli podobagaore bialu dindini ibira hene. Ibira howa tongolo miya.

²⁸Sisera ai̱ya ibu anda windoha handa tagiho biru wiya. Ibu anda tamuha howa windo diriha handa tagiho wiaabo hene. I̱ igininaga wai biaga garo ale biago naibi wiaabo haruagoni irane agidabe, laya. Ibunaga nogo hosi biarume maniore íbu dai bule haruagoni irane agidabe, lalu berene.

²⁹Ani lalu berearia wali mini gigabiwiore berearume ibuhondo ladai bialu bereagola ibugua ibuni layago ale dege lone laga bialu laho wiaabo halu berene.

³⁰Tigua lalu, Uruni ti mbirale hangu tai bialu kago handa walia halu tale bule bialu ka. Ami agali mbirago ibu wandari mbiraha kiraha bigi bialu Siseranaga homogome biaga aga wiago ti mo halu ma gagua tongolo baga bialu maru maru wiago kuini walinaga mani wilo migi bialu ka, lene.

³¹Anduane Homogo-o í̱naga waitigiru ogonidagua bialu homelogo í̱naga dameneru dege ngiri ngarale wá hama egerebagi ni tagira ibiradagua bilo helabe, lalu lai hene. Ani bialu wai paluwa dindi ogoriani hemine mali pira maria (40) pene.