Read Huli Haguane Heneru 6 Bible Online

Haguane Heneru 6 - Huli bible

Haguane Heneru 6

¹Isaraele wali agalime mana ko ngubiore lone Anduane Homogohondo biyagola ibugua wali agali uruni Midianalime mali kariani haru helo helene.

²Midianali uruni ti hongoheore lowa Isaraelealiru hongo emene nira hene. Ani heago hondowa Isaraele wali agali ti ha do hole lowa egeandahabi maruha ha do holene hari bare bareni karulape wiane hondowa ogoriani hene.

³Isaraelealirume mbirale egene mbira polayagola howa Midianalirubi Amalegealirubi hameigini maru dindi ko dalu naibaga wiagoha hearubi tigua Isaraeleali bole ibaga hene.

⁴Ibalu ti dindi ogoriani anda biade ho howa Isaraelealirunaga mbirale tomo damene hengedaru dugu pudubaga bima piaga hene. Gasa tano lene lenehabi dindi ogoriani hengearu bibahende dugu garalibu wahaga hene. Ani bialu tigua nogo sibibi bulumagabi dongibi nogo damene bibahendeore mbira Isaraelealiru nalu helo yu wa nahe haru halu tagira piai haga hene.

⁵Uruni tigua ibalu nogo hinulene tara tararu anda bu palu holene balai andaru gibi nu bagini hanaga hanaga bialu tidini uburili mindibi mberabupe hama ibiradagua ibugu bini. Tinibi tinaga nogo kamelerubi dewa gibiore daga labe nahe ibugu bini. Tigua ibuwa dindi ogoni mo koore halu dugu payabu wahaga biaga hene.

⁶Ani biyagola Isaraele wali agali biarume mbira biadai bibe naheore hene.

⁷Ani bibe nahe howa Isaraele wali agali uruni tigua Anduane Homogohondo yi lalu, Midianalime o biragoni í̱na ina biamogo bia nabere, lene.

⁸Ani layagola Anduane Homogo Isaraele wali agalinaga Ngode Datagaliwabehanda mana latagi haga mbira ti hearia dabo pelowa lalu, I̱na tí Iyibi dindi garabaya hemira haru halu tagira ibirugoni.

⁹Ani bialu i̱na tí Iyibialirunaga garabaya biabe bia halu hemira gini mirugoni. Ani bialu dindi ogoria wali agali hearu hebabi wai bialu hemira tí biamogo birugoni, lene. I̱na wali agali ogoriani hearuni bo haealo batagi halu tinaga dindi tí karulalimulo mo ngirugoni, lene.

¹⁰I̱na tíhondo, I̱ Anduane Homogo tínaga Ngode Datagaliwabe kogo tígua Amorali dindi tí áyu kamirunaga damaruhondo bi pupu nawilimu, lalu langirugoni. Ani larugoyu tí hale naharimi, lene.

¹¹Ani biyagola Anduane Homogonaga dahuliyali mbira ibuwa Obara dindini ira bai ale mbira Yoasanaga heago teneha berene. Yoasa ogoni ibu Abise hameigini hene. Yoasa igini Gidiono ibu Midianalirume de hondoligo lowa ibuni hangu ha do howa gerebi ira lini pingidaga wiagoha widi iraneru lini hondo ibira ibira bilo biabe bialu hene.

¹²Ani bialu hearia Anduane Homogonaga dahuliyali ibu hapani howa ibuhondo lalu, Anduane Homogo ibu í̱ heba kago agali wai biaga hongohe gi nahaga kegoni, lene.

¹³Ani layagola Gidionohanda ibuhondo lalu, Agali timbuni-o i̱na mbira í̱hondo hale habehedabe, lowa lalu, Anduane Homogo ibu ina heba kayagua nde inahondo o bidaruni irane aginagabe. Anduane Homogohanda baya burugule ogodagua biaga lalubi Iyibi dindi howa ogodagua haru tagira ibini lalubi ina abarume langiyagoni aguadabe. Ai Anduane Homogohanda ina yu wahalu Midianalirunaga giha ya heneda, lene.

¹⁴Ani layagola Anduane Homogohanda Gidionohondo lalu, Áyu í̱na hongo timbuniore howa Isaraele wali agali Midianani karu gi mule pu. I̱ i̱nime í̱ pu larogoni, lene.

¹⁵Ani layagola Gidionohanda ladai bialu lalu, Ani bia larego i̱na agua bialu Isaraele wali agali gini muabe. I̱ aria hameigini Manase karu gedaoreore halu i̱nibi mini lene ndo dindiha uruni aria ko, lene.

¹⁶Ani layagola Anduane Homogohanda ladai bialu lalu, Í̱na bibehe larogoni irane i̱na í̱ biamogo bulebero. Í̱na Midianali uruni agali homane mbiraoreali baradagua bialu bo podo waore holebere, lene.

¹⁷Gidionohanda ladai bialu lalu, Í̱na i̱hondo turu keyagua í̱ heneneore Anduane Homogo heneda loliya í̱na manane maru i̱hondo walia ha, lene.

¹⁸Ani lowa lalu, Í̱ pu nabi i̱na ala tomo mbira í̱ ngule mo porogo ogoria hondo habe, lene. Ani layagola ibugua lalu, E̱ í̱ dai bibelo haore bidogoni, lene.

¹⁹Ani laya handala Gidiono ibuni andaga ubanda howa nogo meme igini hungubalua mbira nai heagoni bo dawene. Ani bialu balawa nu mbira ale mberedi yidi nahe hirini. Ani bialu nogo mbirini nu mbiraha hanalu nogo mbirini dawenegonaga subu beha odo berelowa Anduane Homogonaga dahuliyali biago ira bai ale teneha berearia yalu ibuwa mini.

²⁰Ani miyagola dahuliyali biagome ogodagua bia lalu, Nogo mbirini mberedi biagobi ege to̱le̱ ogoriani wialu nogo mbirini dawenegonaga subu beha yayarume odo wia, lene. Gidiono ibugua o bia layadagua bini.

²¹Ani biagola Anduane Homogonaga dahuliyali biagome ibunaga gi dogolo amu halu halimbu yu hayagome nogo mbirini mberedila biago nguini mendehayagi ela hene. Ani biyagola ira hungu ege to̱le̱ biagoha howa tagira ibalu nogo mbirini biagobi mberedi biagobi dai hene. Ani biya handala dahuliyali biago pu ereba hene.

²²Ani pu ereba heagola Gidiono ibugua manda bialu hearia o biagoni Anduane Homogonaga dahuliyaliore handaruda lowa gi taraore hene. Ani bu howa lalu, Anduane Homogo Bibahende Haru Haame Ho Haga kego-o í̱naga dahuliyaliorela dengui handaya haga bu hariba, lene.

²³Ani layagola Anduane Homogohanda ibuhondo lalu, Gi nahe bu mini palelo habe. Í̱ homa nabuleberego, lene.

²⁴Ani layagola Gidionohanda Anduane Homogonaga lomabu mulenenaga dabu mbira o biagoria bini. Dabu ogoni mini Anduane Homogo ibu Mo Palia haga ka wini. Lomabu mulene dabu ogoni Abise damenerunagayago amu Obara dindini wiaabo hea.

²⁵Mbiraga ogoningi Anduane Homogohanda Gidionohondo lamialu lalu, Í̱ abanaga nogo bulumaga wangabe kagobi nogo bulumaga wangabe mende mali karia pene kagobi haru halu puwa í̱ abanaga bi pupu wiaga mini Bala dabu ngago gialope habe, laya. Ani bialu dama wali beda mitangi bialu bi pupu wiaga mini Asera irame wabu hapara heledagonibi dibupe habe.

²⁶Ani dibu podobaga bu ibiraho ngagoriani Anduane Homogo í̱naga Ngode Datagaliwabenaga bo lomabu mulene dabu mbira bayuwaore ogoriani bia dambi halu bia aribia ho helabe. Ani bialu Asera ibu dama lowa wabu helene dibupe harigo ira dene delowa nogo bulumaga wangabe mendego homa hende bo lomabia halu delabe, lene.

²⁷Ani layagola Gidionohanda ibunaga biabe bia haga pirali haru puwa Anduane Homogohanda layadaguaore bini. O biyadagoni Gidiono ibu aria damenerubi wali agali maru dindi timbuni ogoriani hearubi deni gi howa horombe bialu kamaria ti de hondoligo lowa tigua mbi ge howa bini.

²⁸Wali agali dindi ogoriani palearu egerebagiore heyuwa handalu hearia Balanaga dabubi Asera gime wabini biagobi nahe dibu ibira ho wiaria hendene. O biagoriani lomabu mulene dabu mbira gahenge bia dambi howa nogo bulumaga wangabe mende biago homa hende bo delearia handa walia hene.

²⁹Tini hale hagahaga bialu o biyadagoni aiwadabe lagalaga bini. Tigua aiwa binidabe hondole guaru handalu hearia Yoasa igini Gidiono ibugua biniyane handa walia hene.

³⁰Ani handa walia howa tigua Yoasahondo lalu, Í̱ igini ogoria haru tagira íbu. Ani beregola iname ibu homelo boloma̱ya. Balanaga dabu gialo bagabu ibira heledagobi Asera wabu helene biago dibupe hayadagobi ogoni ibuguaore binida, lene.

³¹Ani lalu peagola Yoasahanda ibunaga wanakuini handaya ho wiaruhondo lalu, Balanagaore heyuwa bi lahalu kamibe. Ogoninagaore hapai haramigonibe, lalu tihondo hale hene. Mbirali Balanaga heyuwa bi lahalu kago yawi egabi naledaore balu home lolebira. Bala ogoni ibu hongohe kayagua ibu ibunime bilo. Bo lomabu mulene dabu gialo bagabu ibira helayadagoni ibunagaore ndobe, lene.

³²Ogoningi howa Gidiono mini mende aribia halu Yarubala wini. Ogonidagua mini wiyadagoni irane Yoasahanda lalu, Bala ibu hongohe kayagua ibunaga bo lomabu mulene dabu gialope hayadagonaga ibu ibunime bilo tí wahadaba, lene.

³³Ai Midianali bibahendebi Amalegeali bibahendebi maru dindi ko dalu naibaga wiagoha howabi bibahende íbu ngoai howa Iba Yodana domowa Yaserili dindi guane wiape heagoria anda buwa hene.

³⁴Ani buwa heagola Anduane Homogonaga Dinini ibu Gidiono haru heagola ibugua mbelo biguli pu layagome Abise hameigini bibahende ibu talima ibilo mo ngoai hene.

³⁵Ani ngoai ho hearia Gidiono ibugua bi maru lo yalu Manase dindi abene mendeha mendehabi purogo lalu, I̱na larodagua bimi̱ya lole pudaba, lene. Ani bialu bi maru yalu Asera hameiginibi Sebulunu hameiginibi Nabadali hameiginibi uruni ti bibahendeore ibalu, I̱ heba ho gimbu bimi̱ya lole pudaba, lene. Ani layagola tibi ibalu ibu heba hogimbu bini.

³⁶Ani buwa Gidionohanda Ngode Datagaliwabehondo lalu, Í̱na i̱ha howa Isaraele wali agaliru gi mulebero larigoda.

³⁷Aniyagua i̱na nogo sibi iri mbira dindi amu widi iraneru lini hondo ibira ibira bilo beramaligoria wiaguago. Werogola egerebagiore dadimba dindini nawi nogo sibi iri biagoria hangu winiyagua nde Isaraele wali agali í̱na gini mibelo haru holiya larigoni aniore bulebedalo manda bu hagua, lene.

³⁸Ogoni layadaguaore biniya. Gidiono horo mendengi ibu egerebagiore heyalu puwa nogo sibi iri biago yamialu hearia iba dadimba bereneyago pingidayagola be mbira to̱lo tagi hene.

³⁹Ani biyagola Gidionohanda Ngode Datagaliwabehondo lalu, Í̱na i̱hondo kebaore nahabe. Bi halu mbira hangu lone loa kogo halu mbira hanguorego laro. Ai nde halu mbira hanguore nogo sibi iri ogonime bahondoliya. Ai áyu nogo sibi iri yobu wialu dindini dadimba berelo, lene.

⁴⁰Ogoningi mbiraga Ngode Datagaliwabehanda bi o layagonidagua bilene. Egerebagi hayagola nogo sibi iri biago yobu wialu dindi biago dadimba ibira howa ibahe wiaria hendene.