Read Huli 3 Yone 1 Bible Online

3 Yone 1 - Huli bible

3 Yone 1

¹I̱ agali ala hene miniwi howa Gaiasa í̱hondo beba ogo gilibu wia haro.

²I̱ nenege turubi-o í̱naga dinini holene bayalehe kedagua í̱ warago nabe turu halu bayale dege habelo i̱na hamelo ko.

³Henene lolenehayagi haabo harilidagua mini bilinahe howa henene loleneyi haabo ke lalu Keriso hameigini marume ibuwa i̱ langiyagola hale howa turu timbuni ho ko.

⁴Mbiralime lalu, Í̱ waneigini henene lolenehayagi anda pu haabo ka, laragola hale howa i̱ turu timbuni ho haruli. Turu holene ogonime turu holene bibahende bolangua haga nga.

⁵I̱ nenege turubi-o mini bilinahe howa Keriso hameiginiruhondo biamogo bigi bialu ti maru í̱ manda nabini hearubi biamogo bigi bialu kego nde baya hangu bialu kegoni laro.

⁶Ti o biarume Keriso hameigini oali ngoai ho kamaruhondo langialu lalu, Gaiasa ibu gubalini hagane agalioreya, lalu langiya. Ani langiyaru ti ibaga bialu poradagua pelonaga Ngode Datagaliwabe mo turu helo í̱na ti biamogo bibe.

⁷Tigua Kerisonaga Bi Mana Debene lama pole lowa wali agali Ngode Datagaliwabehondo mini mbiraore nawi hearume tihondo mbirale mbira milo henge nami wahalu piyiya.

⁸Ani biyagonaga ina Keriso hameigini kamarume ti heba henene lolenenaga biabe bimaga hole ti biamogo bulene nga.

⁹I̱na Keriso hameigini ngoai ho kamiruhondo beba mbira gilibu wia haru. Ani birugola Diodorebese ibugua ibuni mo haguane hoa howa i̱naga bi mo wahayiya.

¹⁰Ibugua inanaga mini lalu wali agaliruhondo bi koorene kobi ke̱ holenebi laga bialu kago i̱ tí kamiria ibuwa ibugua mana ko ogoni biyagonaga tí manda biai halimulo i̱na latagi hai holebero. Ibugua ogoni hangu ndo biaga. Keriso hameigini marubi ibirangi ibugua, Ibirimida, lalu turu nahaga. Ani nabiaga howa wali agali marume ti ibiraruhondo, Andaga birule ibidaba, loa karu ti Keriso hameiginiru heba karia ibugua ti tagira pelo bo batagi hole manda biaga.

¹¹I̱ nenege turubi-o ko biaga karume biagadagua nabi bayale biaga karume biagadagua dege bialu habe. Wali agali bayale biaga karu ti Ngode Datagaliwabe aria ka. Ko biaga karume Ngode Datagaliwabe manda nabi ka.

¹²Wali agali bibahendeme Demidiriasa ibu bayale ogobiore ka lene haga. Ibugua henene lolenehayagi howa ibu henene loleneyi kagobi walia halu ka. Inamebi ibu de hondowa ibu ogobiore ka lene haramali. Í̱na nde inane laramago tigatiga laradalo manda bide.

¹³Í̱hondo dewa lolene manda bia bidogo bebani gilibu wialu lowia hole hame nale ko.

¹⁴Emene howa iyane dengui handaya hagabu howa bi la doba bibiya i̱na í̱ keria abale ibule kogo.

¹⁵Mo palia holene í̱ha wiaabo helo hameledo. Iya nenege oali karu bibahendeme í̱hondo, Iname í̱ore mitangi bu kama, lalu lawia harama. Iya nenege í̱ kegoria karu bibahende hangu hanguhondo iname, Tí mitangi timbuni bu kama, larama laya lalu lamibe.