Read Huli Mo Walia 16 Bible Online

Mo Walia 16 - Huli bible

Mo Walia 16

¹Ogoni hondowa hale halu hewaria Ngode Datagaliwabenaga anda biagoha howa dahuliyali kariali biaruhondo bi mbira dalimuore layuago hale haru. Hale halu hewaria ogodagua layua. Ngode Datagaliwabenaga keba holene ndisi be kariaha ngaru dindini odope hole pudaba, lalu layuago hale haru.

²Ani layagola dahuliyali mbirago ibugua puwa ibunaga ndisi beha yayago dindini odope haya. Ani biyagola wali agali nogo taranaga magi ho hayarubi nogo tara ogoni ibuni kagobiore wabu wiyagohondo bi pupu wiyarubi uruni ti bibahendeni dere ti̱wa̱ ale tandaga timbuni bialu bia pani haya.

³Dahuliyali mendego ibugua ibunaga ndisi beha yayago iba solowarani odope haya. Ani biyagola iba solowara biago mbirali homenenaga darama ale bu hinalu iba solowaraha berelene biru wiaru bibahende homai haya.

⁴Dahuliyali tebonego ibugua ibunaga ndisi beha yayago iba piyaruriabi iba duguayaruriabi odope hayagola iba uruni darama bu hinaya.

⁵Ani biyagola hale halu hewaria dahuliyali iba damene bibahendehondo heagome lalu, Ngode Datagaliwabe í̱ Baya Buruguleore ala henegobi áyu kegoni. Í̱na daba ki birigo tiga tiga hangu dabarigoni.

⁶Tigua Ngode Datagaliwabenaga wali agali henerubi Ngode Datagaliwabe mana latagi haga henerubi ti balu darama pelayagonaga í̱na ti darama nelo mo miri. Ani mirigo ti mulene wiadaguaore miri, lalu layuagola hale haru.

⁷Ogoni hale howa hale halu hewaria mbirale lomabu delagane dabu heagoria howa bi mbira layuagome lalu ogodagua layua. Anduane Homogo Ngode Datagaliwabe Hongo Haiheore kego í̱naga daba ki bulene henene ngagoriabi tiga tiga ngagoriabi hangu daba ki birili, lalu layuagola hale haru.

⁸Dahuliyali manego ibugua ibunaga ndisi beha yayago nini odope haya. Ani biyagola ni poboyogo gibiore dayagome wali agali delo henge miya.

⁹Wali agali uruni ni poboyogobi dayagome dayagola tigua bolene hongo uruninaga haru haga Ngode Datagaliwabe kago ibunaga mini ha haya. Ani biyago tigua tinaga ko biyaru wahalu mini beregedowa Ngode Datagaliwabe gibiore kagonaga mini yaraga nahaya.

¹⁰Dahuliyali daunigo ibugua ibunaga ndisi beha yayago nogo ko tara biagonaga haru howa biragane dagiani odope haya. Ani biyagola nogo tara biagonaga haru holene wiagoria aruma haame hayagola wali agalime tandaga nalu tininaga hége neme pugu naya.

¹¹Ani bialu tigua tandaga nayagonagabi dere bu hayagonagabi dahuliya andaganaga Ngode Datagaliwabe ha halu haya. Ani bialu hayago howa tigua tinaga mana ko bialu hayaru wahalu mini beregeda nabiya.

¹²Dahuliyali waraganego ibugua ibunaga ndisi beha yayago iba timbuni mini Yuberedisi piyagoria odope haya. Ani biyagola ni tagira ibiragohayagi howa kini hearu ibilonaga hariga wilo iba o biago hundiai haya.

¹³Ani biyagola handalu hewaria dama tebira yago handalehe hearia handaru. Dama tebira uruni ti abagua ale biagonaga ne harigaha howabi nogo tara biagonaga ne harigaha howabi mana henene ngadagua ndo latagi haga mbira heagonaga ne harigaha howabi tagira ibalu hearia handaru.

¹⁴Dama uruni ti dama koore agalime nabiagane ale bialu hagagonaga dama hea. Dama tebira urunime dindi tara taranaga kini bibahende karu karia piagago pialu kini uruni bibahende Ngode Datagaliwabe Hongo Haiheore kagonaga Horo timbuni harangi wai bilonaga haru íbu mogo bule piaga.

¹⁵Anduane Homogo ibugua lalu, Ai hale hadaba. I̱ pageali ohowa ibagadagua ibulebero. Ani buleberogo mbirali ibu wali agali bu kagoria ti babe napolebi taga naholebi ibunaga aga mamage halu palia nabi dengala ho kagome turu ho holebira, lalu laya.

¹⁶Dama tebira biarume kini biaru dindi mbira Hiburu bi lalu mini Amagedono wiagoria haru íbu mogo biya.

¹⁷Dahuliyali kanego ibugua ibunaga ndisi beha yayago daliga lira odope haya. Ani odope heagola Ngode Datagaliwabenaga andaha handame ho biragane dagia wiagoria howa bi mbira dalimu laraga halu lalu, Ai biaiore ogoni, layuago hale haru.

¹⁸Uruniore biai heagola hari dababi hari kilikulubi hari kulu timbunibi dumbirumbi gibiorebi biya. Dumbirumbi o biyadagonibiore mbira wali agali wabiniyangi howa biyariabi nahendenego áyu o biyadagoni maru biraliru bagi hene lowa gibiore biya.

¹⁹Tano timbuni wiago bu̱la tebo bialu dindi bibahendenaga tano wiaru poda holobiya. Ani biyagola Ngode Datagaliwabehanda Babilono tano mini lene timbuni biago mitangi bu dai bialu ibunaga beha howa waini iba ibunaga keba gibiore holene nelo mo na haya.

²⁰Dindi iba dege dombeneha wiaru bibahende pu ereba halu hari wearubi bibahende ligua piyabe nigua piyabe toba halu nahandabehe haya.

²¹Dalu dindi guni timbuniore genda to̱le̱ timbuni genda magi kilogarama pira duria (50) ale hari daligaha howa wali agalini ibira haya. O ibira hayadagoni bolene hongo gibioreyago wali agali Ngode Datagaliwabe ha hayaru biarume tini ibira haya.