Read Huli Mo Walia 5 Bible Online

Mo Walia 5 - Huli bible

Mo Walia 5

¹Mbirali handame ho biragane dagiani bereagonaga gi tigame mbuga mbira yu hearia handaru. Mbuga ogoni abene mendeha mendehabi gili bume howa wagaya ale kariame mo ndibulo para heneya.

²Ani handalu hewaria dahuliyali hongohe mbirame bi dalimu lowa lalu, Mbuga ogoni wagaya aleme ndibulo para ho ngago ogoni mbirali aiwa laga lalu mo anga labehe kabe, laya.

³Ani layagola dahuliya andagani karu ariamebi dindini karu ariamebi humbirini andagani karu ariamebi mbuga ogoni anga lalu hondolene mbira naheoreya.

⁴Mbuga ogoni anga lalu de handabehe mbirali naheoreyagola i̱na yi lalu dugu timbuni biru.

⁵Ani birugola dahuliyali haru haga biaru aria mbiralime i̱hondo lalu, Dugu nabibe. Yuda hameiginiha howa budi gabua ale timbuni Laiono ibu Debidinaga aguanene gibiore kago ibugua wayali howa mbuga wagaya ale kariame ndibulo para hene ngago laga lowa anga labehe ibuni dege kagoni handa, laya.

⁶Ani handa layagola handalu hewaria Nogo Sibi Igini Mbira handame ho biragane dagia wiago hanuni helowa holenehe mariali helene biarubi dahuliyali haru haga pira kirani maria (24) biarubi ho mabu bu hearia handaru. Nogo Sibi Igini o hayadagoni ibu homelo bene handalehe hea. Nogo Sibi Igini biago ibu haguaneni ne gayane kariahebi de kariahebi hea. De karia uruni Ngode Datagaliwabe Dinini karia ka lalu ti dindi bibahendeha pelaame hayaruya.

⁷Nogo Sibi Igini biagome mbirali handame ho biragane dagiani bereagonaga gi tigame mbuga yu heago ibu berearia puwa yamiya.

⁸Ibugua ogonidagua biyagola holenehe mariali helene biarubi dahuliyali haru haga pira kirani maria (24) biarubi Nogo Sibi Igini biago heagoria buhayagi bulu palu ibira haya. Uruni bibahende hangu hangume ga̱wa̱ ale timbunibi ndisi ngolome wabini hayadaruha mbirale ira hagua ngabilo delaga mini inisenesiru yu hea. Mbirale ngabi uruni Ngode Datagaliwabenaga wali agalime ibuhondo bi laganeru nga.

⁹Tigua iba gana gahenge lalu, Mbuga ogoni mo yuwa wagaya aleme ndibuledaru laga lalu anga labehe karulape í̱ kegoni. Irane ogoninaga í̱ homabelo bayagola darama pela harigome wali agali hameigini tara tara karubi bi tara tara laga karubi dindi tara tarani bu karubi tingini tara tara karubi bibahendeoreha howa ti Ngode Datagaliwabenaga helo haru dai biri.

¹⁰Ani bialu ti Ngode Datagaliwabenaga biabe biaga helo í̱na Ngode Datagaliwabehanda handame ho kagoria loma binigo mo miaga mo hela harigo ka. Ani biragome ti dindini howa wali agali haru holebira, lalu laya.

¹¹I̱na lone handalu hewaria dahuliyali daosini dege daga labe nahe dewaoreme bi layuago hale haru. Dahuliyali uruni tigua Ngode Datagaliwabenaga handame ho biragane dagiabi holenehe mariali helene biarubi dahuliyali haru haga pira kirani maria (24) biarubi ho mabu bupe ho howa

¹²iba gana laraga halu lalu, Nogo Sibi Igini homelo bayago ibuhondo haru holenebi homogo holenebi mini gigabiwi holenebi hongo holenebi mini yaraga holenebi mini lene holenebi ka̱i̱ lolenebi uruni damenego mulene ibuni dege karulape ka, laya.

¹³Hale ha ho wialu hewaria dahuliya andaga hearubi dindini hearubi humbirini andaga hearubi iba solowaraha berearubi mbira mbira tara tara haame hearubi uruni bibahendeoreme iba gana lalu, Mbirali handame ho biragane dagiani bedagohondobi Nogo Sibi Igini kagohondobi ka̱i̱ lolenebi mini yaraga holenebi mini lene lolenebi hongo taraore holenebi wia dege bidane wia ho wilo hame ledama, lalu laya.

¹⁴Ani layagola holenehe mariali helene biarume ladai bialu lalu, Aniore bilo, laya. Ani layagola dahuliyali haru haga pira kirani maria (24) biarume bulu palu ibira howa libunaga mini yaraga halu hene.