Read Huli Ludi 3 Bible Online

Ludi 3 - Huli bible

Ludi 3

¹Horo mbiru hayagola Naiomi ibugua Ludihondo lalu, Dindini bayuwa walime agali heba biragadagua birabelo agali mbira tai bulene horo hayada.

²Agali Boasa biago ibunaga bali mabuni ibunaga biabe biaga waliru baba biabe bialu harigo agali o biago inanaga damenego manda bideni. I̱na bi mbira languleberogo bayuwa hale habe, lene. Ayu mbiraga haragola ibuni bali iraneru lini hondo ibira ibira bilo bo taulalu holebirago

³í̱ni tingini wayawaya babe. Wayawaya bowa weli ngabi ha̱i̱ habe. Ani buwa aga debenebi bayuwa bibe. Ani bialu bal iraneru lini hondo ibira ibira bilo bo taulalu kagoha puwa í̱ kalo manda nabilo ha do howa habe. Ibugua biai howa hina ibaru nelo henge mu habe.

⁴Nai halu palirago agoha yagidabe bayuwa handabe. Ibu padagoha puwa ibunaga balangiya geha yagi miale howa ogoniha palibe. Ani beregola ibunime au bibe lalu mani langulebirago, lene.

⁵Ludi ibugua ladai bialu lalu, Í̱na laregodaguaore biagua, lene.

⁶Ani lowa Ludi ibu arunime bibe layadagua biai halu bali bo taulalu hearia pene.

⁷Boasa ibugua hina ibaru nayagola howa hongo halu dungu lene. Hongo halu dungu leagola bali halu hengedo wiaru yaa̱i̱ na̱i̱ buwa palene. Ani biagola Ludi ibu hendeore ge hogorale bialu puwa Boasanaga balangiya yi heago miale howa paleagoha hendeore gehayagi palene.

⁸Mbi hanuni agima Boasa palu beregedalu howa handalu hearia waliore ibu geha yagi íbu paleneyane mogolo hendene.

⁹Hondowa ibugua hale halu lalu, O padago aibe, lene. Ani hale hayagola Ludi ibugua ladai bialu lalu, Í̱naga biabe bia haga i̱ Ludi padogoni. I̱naga dameneru hondo haga í̱ kegonigo i̱ dabu bibelo hame ledo, lene.

¹⁰Ani layagola Boasa ibugua lalu, Anduane Homogo ibugua í̱ mo turuore helo. Í̱na í̱ arunihondo birigobi ndo áyu i̱hondo í̱na mana debeneore bulene manda birida. Homogoyaguabi yagibanoyaguabi igiri ale hondolene waharida.

¹¹Ludi-o í̱ mini dege dindi holeni. Bibahende ogoria karume í̱ore wali bayaore ledago. I̱na í̱na bia laregoore biai holebero.

¹²I̱na í̱ damene hondo holeneha kogonigo agali mbira í̱ handaya ho holene mbira kago ogonihondo henge ala mibehego

¹³áyu mbiraga eberegoniha palibe. Egerebagi haragola damene biagome bulene ngadagua bero larabe be au larabe hondoliya. Ibugua í̱ hondo holiya layagua nde baya gibiore lolebira. Nabule layagua nde Anduane Homogonaga minini howa larogo dameneme hondo holene mana ngadagua bulene i̱naga ngago bulebero. Áyu ogoniha gao lelo palibe, lene.

¹⁴Ani layagola Ludi ibugua Boasanaga ge wiagohayagi palenego egerebagiore Boasahanda layadagua wali agalime de nahendelo manda buwa ohalu abale heyabe layadagua abale pole heyini. Boasa ibugua wali agalime Ludi ibu paleagoha íbu palialu piyadalo manda nabilo ani lene.

¹⁵Heyayagola Boasa ibugua lalu, Í̱na aga ogoriani dungu ha. Ludi ibugua ani biyagola Boasahanda bali lini biaru nu kira (20) kilo agima ale mo ya hene. Ludi henelo ibugua mo yaraga haya handala hanalu Bedeleheme tano dai bini.

¹⁶Dai biyagola ibu aruni Naiomi ibugua, I̱ wane-o, lowa, Bia agua biyabe, lalu hale hene. Ani layagola Ludi ibugua Boasahanda layarubi biyarubi bibahende lamiai hene.

¹⁷Ibugua lamaro bialu lalu, Boasa ibugua í̱ bederia bame gi walambo nadaibi lole lowa bali lini hilu hombedo ngiyadaruni,lene.

¹⁸Naiomi ibugua Ludihondo lalu, Ai mini dege dindi nahe ema nabi hendeore birabe. O biragoni bialu au biatagi harabe hondole. Boasa ibugua mo tiga au bibehedabe hondole hariga hai bialu hangu kane. Hariga mbira handa walia haradagua ibu ha̱lo̱ holebira, lene.