Read Huli Ludi 4 Bible Online

Ludi 4 - Huli bible

Ludi 4

¹Wali agali mo ngoai howa te laga Bedeleheme anda pugu bulene harabani winiyago Boasa ibu o biagoriani pu berene. Pu berearia Elimelege damene dege ala Boasahanda mana lo winidago bulene ibunaga nga lalu agali ka layago ibini. Ibiyagola Boasa ibugua ibu olowa lalu, Hambi-o ogoria birule íbu, lene. Ani layagola agali biago ibu ibuwa berene.

²Ani bereagola Boasa ibugua dindi ogoriani agali haru haga pirali hearu hondowa íbu biradaba, lene. Ti íbu bereagola

³Boasa ibugua agali ibu damene biagohondo lalu, Naiomi Moaba dindi howa dai buwa iya damene Elimelegenaga dindi biago yolo mialu nolene manda birago

⁴í̱ manda bibelo langibeheyane langero, lene. Ani lowa, Í̱na mulene manda bideyagua agali haru haga pirali o bedaru deni howa mia. Namuleyagua namule la. Elimelegenaga paluni mulene ala í̱ harigoni í̱ howa i̱ harugoni, lene. Ani layagola agali biagome lalu, I̱na dindi ogoni ibu yolo bialu i̱ muliya, lene.

⁵Ani layagola Boasa ibugua lalu, Dindi ogoni Naiomihondo í̱na yolo biriyagua nde Ludi Moaba wali dalo biago dabu bulenebi í̱naga nga. Ani buwa dindi í̱ meregoni agali homayagonaga minini wia ho wiaabo helo, lene.

⁶Ogonibi layagola agali biago ibugua lalu, Ogonidagua bulene ngayagua i̱na mibeheme waharo. I̱na miruyagua mani i̱ waneiginime karu lolene tinaga ndo wulebirago i̱ namulebero, lene.

⁷Horo uruningi Isaraele wali agali tinaga maname mbirale mbira mbiralinaga yolo buleyaguabi mbirale mbira ariari buleyaguabi walia agua haga wini. Yolo mo nole kago ibugua ge su golo muwa yolo biaga kagohondo yade haga. Ogonidagua bidagola maname mbirale biagoni yolo biyago ibunaga lolebira.

⁸Anigo agali biago ibugua Boasahondo lalu, Í̱ yolo bialu mia, lowa lame halu ibunaga ge su golowa Boasahondo mini.

⁹Ani biyagola Boasahanda agali haru haga pirali biarubi agali maru hondo íbu berearuhondobi lamialu lalu, O bedamiru tí bibahendenaga deni handai hene yolo berogoni. Naiomi ibugua Elimelegenaga dindibi mbirale wiyadarubi igini kira biago labo Kiliono Malonolanaga mbirale wiyadaruni heba i̱na miai harogoni.

¹⁰Ani bialu Moaba wali Ludi ibu Malono homayagonaga one dalo biagobi i̱ one bu hinarogoni. Ani berogome dindibi walibi waneiginibi Malono ibuninaga minini wia ho wiaabo helo lalu áyu merogoni. Agali bedamiru tí de hendedamigoni, lene.

¹¹Ani biyagola agali haru haga pirali biarubi agali maru dehondo íbu hearubi tigua lalu, E̱ ina bibahendeme handarimagoni. Anduane Homogo ibugua wali o ibiragoni waneigini dewa hono wiaga Yaigaba one Laiselola Liala ale berelelo. Í̱ Eberada hameigini homogo howa Bedelehemeni wali agali karume í̱ manda biaiheore habelo.

¹²Anduane Homogo ibugua wandari ogoniha waneigini ngiragome Yuda Tamalame hono wini inanaga aguanene Perese ale helo, lene.

¹³Horo odangi howa Ludi ibu Boasa onene berene. Berearia Anduane Homogo ibugua Ludi mo turu halu igiri gali mbira mini.

¹⁴Wali berearume Naiomihondo lalu, Anduane Homogonaga mini yaraga hama, lowa lalu, Ibugua í̱ hangu berelo wanahe aguane mbira í hondo helo ngiyada. Igiri ogoni ibunaga mini Isaraele wali agalime embeda nahe manda bia ho wiaabo helo.

¹⁵Í̱ aruni biagome í̱ore gubalini howa karia hamenemame bulenedagua ndo ibugua dewaore bu bolangua hayada. Í̱ wahe bederia hongo ngilobi mamage helobi ibugua igiri aguane ogoni ngiyada, lene.

¹⁶Naiomi ibugua igiri gali biago yamuwa ibuni buha yuhubi lene. Ani bialu ibugua gali biagoni ibuni hondo haabo hene.

¹⁷Wali kaware berearume igiri biagoni mini Obede wini. Ani wuwa tigua loyogo lalu, Naiominaga igini mbira hono miyada, lene. Mani Obede ibugua Yasi hono wini. Yasi ibu Debidi aba hene.

¹⁸Debidi ibu aguanene Perese howa ibuni ibule ibinidagua malu ogo. Tinaga aguanene Perese. Perese ibu igini Heserono. Heserono ibu igini Lama. Lama ibu igini Aminadaba. Aminadaba ibu igini Nasono. Nasono ibu igini Salamono. Salamono ibu igini Boasa. Boasa ibu igini Obede. Obede ibu igini Yasi. Yasi ibu igini Debidi uruni hama ibini.