Read Huli 1 Samuele 2 Bible Online

1 Samuele 2 - Huli bible

1 Samuele 2

¹Hanahanda Ngode Datagaliwabe mini yaraga halu agua lene. Anduane Homogohanda i̱naga bu habaneha turu holeneme to̱lai heledagome i̱ turu taraore ho bedogo irane ibugua biyagome. Ngode Datagaliwabehanda i̱ biamogo biyagonaga turu ogobiore ho ko lalu i̱naga waitigi karu hondowa i̱ oba halu kogoni.

²Mbirali ibu Anduane Homogo mini baya gibiore kagobi nahe ibu ale mbiraorebi naheore. Ngode Datagaliwabe inanaga tigi pabe bu haga kagobi mbira naheore.

³Ogoni Anduane Homogo ibu Ngode Datagaliwabe howa ibu manda biaihe mbira kagoni. Ibugua wali agali karume birago damene bibahende dabo handai haga ka. Anigo mine howa hongo halu bi nalabe. Mine bi mbira í̱ ne hariga howa tagira ibulani handabe.

⁴Ami agali hongohe karunaga danda yidaru podene bame yu kagoyu hongo nahe karunaga hongo mo anda holebira.

⁵Wali agali ala tomo nabe manga ho haabo hayarume áyu tomo nolenaga biabe bia halu ka. Wali agali maru tomo garibilo hayaru áyu karulape nelo Ngode Datagaliwabehanda biamogo bialu ka. Wali waneigini mbira nahonowi bereagome waneigini karia hono wiya. Waneigini dewa ai̱ya berenego ibuni hangu berelo yu wahene beda holebira.

⁶Anduane Homogohanda mbira bo homelowa mo dére hodai biaga ka. Ibugua wali agali homene karu dindi humbirini andaga pelowa ibuni lone haru dai biaga ka.

⁷Ibugua wali agali maru mo yagibano halu maru mo homogo helaga ka. Maru mo dindiha halu maru mo yaraga howa daliga helaga ka.

⁸Ibugua yagibano karu himuni ngaria mo yaraga haga. Wali agali buru pale mini burugulo karu mo heya haga ka. Ibugua o biaru kini karunaga igini heba mandagi helalu ti daliga ogobi dege dege helolebira. Dindi o kamarunaga tiaga holene Anduane Homogo ibuni kago ogoriani ibugua dindi bibahende wabu heleda.

⁹Ibunaga wali agali mini bilinahe karunaga holene ibugua ho tigi pabe bidagola ka. Ko biaga karu arumaha pu ereba halu kagoni. Agali mbira ibunaga hongo hangume mbirale mbira buwa wayali nahaga ka.

¹⁰Anduane Homogonaga waitigi karu mo koore halu gurabaga bi lalu tihondo keba ho ko lalu bi dahuliya andaga howa hari kulu lalu ladali holebira. Anduane Homogohanda dindi bibahendeni karu tihondo ko birimida bayale birimida laga bialu dabo hondolebira. Ibugua ibunaga kini kagohondo hongo mialu ibunaga kini ibuni dabene ogoni ibu mo wayali helolebira, lalu Hanahanda bi ogoni lene.

¹¹Ai Elegana ibuni dindi Lama dai biya handala igiri Samuele ibu Silo dindini hondo halu ibugua loma binigo mo miaga agali Eli heagoria Anduane Homogonaga biabe bia halu hene.

¹²Eli igini kira Piniasa Hobinila libu agali ko habane nabulene hene. Libugua Anduane Homogonaga bi hale halu bia nabiaga hene.

¹³Ani bialu libugua loma binigo mo miagalirume wali agali bibahende karuhondo uru ale bilimu lalu lo ngaruni hale halu bia nabiaga. Ani biradagua loma binigo mo miaga agalirume tinaga mana biaga winidagua ndo libugua agali mbira ibunaga mbirale mbira bo lomabia howa delalu haga. Ani bialu karia loma binigo mo miaganaga biabe biahaga biago kanogo dene tebirahe yalu ibaga.

¹⁴Ibuwa nogo tara bo delayagonaga mbirini wene dalu kaore dege ibugua kanogo biagome todobene biagoha nogoba ha dali haragola kanogoni dugubu yamirago o loma binigo mo miaga agali ibunaga laga wini. Isaraele wali agali bibahenderu Siloni mbirale bo lomabia halu delole ibiragola mana ko ogonidagua dege biaga hene.

¹⁵Ani biaga henego mbirabi agua biaga. Nogo habane damenego podo dawale bialu karia loma binigo mo miaga agalinaga biabe biahaga biago ibaga. Ibuwa ibugua agali nogo podo delalu kagohondo lalu, Nogo mbirini maru loma binigo mo miaganaga hirilo podo ngidaba, laga. Loma binigo mo miaga ibu nogo mbirini todobeneha dawene meramigo nanolebirago gahenge hangu podo ngidaba, laga hene.

¹⁶Ani laragola agalime ladai bialu agua lalu, Iname tigabi bulene ngadagua bialu nogo habane uruni ala delama mani í̱ni hame lededagua mo yule, layagua loma binigo mo miaganaga biabe biahaga biagome lalu, Ani ndo áyu ogoni ngi. Nangiriyagua i̱nime gingilo muliya, laga.

¹⁷Eli igini biago labo libugua mana ko ogoni bialu hayagome Anduane Homogohondo nogo tara tara bo lomabia ho miaga wiaru mo nagalone bu hinalu Anduane Homogonaga deni kagua gibiore biaga hene.

¹⁸Ani bialu heagola igiri emene Samuele ibu Anduane Homogonaga biabe biaho wialu ibu aga lomabia heneme biaga winigo karulo hene.

¹⁹Mali bibahendeni ibu ai̱yahanda aga emene wabu hanalu ibu agalinila haru mali mbiranaga nogo bo lomabia ho mule piagane winidagua pialu howa ibuhondo aga gahenge yalu puwa miaga.

²⁰Ani biagago Eli ibugua Eleganabi ibu onebi mo turu howa Eleganahondo lalu, Anduane Homogohanda igiri mbira ibuhondo loma biaho miribigonaga wali ogohondo waneigini maru aribia halu ngilo, laya. Ani laya handala libuni andaga dai bini.

²¹Bi ani layagoni heneneore Anduane Homogohanda Hana biamogo biyagola ibugua igiri tebira wandari kira lowa taba henene. Igiri Samuele ibu Anduane Homogonaga biabe bialu bu anda hene.

²²Eli ibu ai waheore hene. Ibu igini biago labome Isaraelealiruhondo mana ko damene bibahende libugua bialu ka layaru ibu hale haiho hene. Ani bialu libugua Anduane Homogonaga wanakuini wali maru Balai Anda harabani biabe bialu biraga berearu heba ho palu ka layarubi Eli ibu hale dege hene.

²³Ani layago hale howa Elihanda ibu igini biago labohondo lalu, Libugua ko urunidagua bialu kabi layaruni irane aginagabe. Libugua ko ngubi ogobi bialu kabi lalu bibahende hearume i̱ langiai hayago.

²⁴Ai i̱naga igini labo-o ogonidagua nabi waore halibu. Anduane Homogonaga wali agali bu karume libugua ogonidagua bialu kabigo ko ngubi ngaru bialu kabi lalu kagoni.

²⁵Agali mbirame agali mendehondo kagua mbira biyagua Ngode Datagaliwabehanda dombeni howa la holebiragoyu agalime Anduane Homogohondo kagua mbira biyagua dombeni howa aiwa la holebirabe, lene. Anigo ogolabo libu Anduane Homogohanda bo wahole manda bu henegome libu abanaga bi hale howa nahalehe tingi hene.

²⁶Libu ani bialu heatambu igiri Samuele ibu anda ho heagola Anduane Homogo ibuguabi wali agali hearumebi Samuelehanda bialu henego hondowa turu hai hene.

²⁷Ngode Datagaliwabenaga bi mana latagi haga mbirame Anduane Homogonaga bi ogo yalu Eli hearia ibini. Ibuwa ibuhondo lalu, Ala bambaore í̱naga mamali Aronobi ibunaga damenerubi ti Iyibi dindi kini heagonaga garabaya biabe ale biahalu heagola i̱ Anduane Homogo i̱ni kogoni lalu Aronohondo mo walia harugoni.

²⁸Ani bialu Isaraele hameigini bibahende hearu helowa i̱na Arononaga dameneru tigua i̱naga loma binigo mo miaga helobi nogo tara tara i̱naga bo lomabu delolene dabuni biabe biaga helobi hagua ngabiaga inisenesi delolenaga helobi helene. Ani bialu aga tara mini ebodi loma bia heneme buwa i̱hondo bi langule howa bu erekunila dambi helo mani pongo bilobi i̱na ti dabo helene. Ani bialu i̱na tihondo dabuni bo loma bialu delene wiaru bibahende tale bialu ti mo yulenego karulape lamiru.[1]

²⁹Ani larugo lelowa i̱naga wali agalime nogo tara tara bo lomabia ho yalu ibaga ngarunaga í̱ hangu timbuni noa ho ngegoni irane agibe. Eli í̱na i̱naga wali agali karume nogo tara tara bo lomabia halu i̱hondo delararunaga bayale damenego í̱ igini kago labo libu no haba halu helowa í̱na i̱hondo mo galone hariligo emene lowa libugua biyago mo galone timbuni harigo irane agibe.

³⁰I̱ Isaraele wali agalinaga Anduane Homogo Ngode Datagaliwabe kogoni howa i̱na bi mbira bamba Aronohanda buleore lalu agua lo wiru. Í̱naga dameneru tigua loma binigo mo miaga howa i̱naga biabe biaho wilo laru. Ani larugonigo áyu bi mende lo aribia haro ogo. Marume i̱naga mini mo yaraga hararuhondo tinaga mini mo yaraga halu marume i̱naga mini mo dindiha hararuhondo tinaga mini nde mo dindiha helolebero.

³¹Ai hale hadaba. Í̱naga igini damene agali daliahe karu mbira haho wiaabo nahelo abale halu homelai holene horo biagoni ha para hayada.

³²Ani biyadago i̱na Isaraele wali agali maru karu mo turu halu ti mo bayale harogola í̱naga miniha henge lolene tagira ibulebira. Ani bialu í̱naga igini damene karu mbirago lone mani ho lu bu naholebiraore.

³³Anigo i̱na í̱naga aguanene karu mbirago hadai bilarogola ibugua i̱naga loma binigo mo miaga howa biabe bulene ngadagua bialu holebira. Ani bialu kagoyu ibunaga dengali bialu mbirale bibahende nahandabehe halu bidagola í̱naga aguanene maru karuni hiriribi homo yu lo waholebira.

³⁴Ani bialu í̱naga igini kira Piniasa Hobinila kirabali horo mbirani hangu homo palu birangi mbirale bibahende i̱na langirugoni damenego heneneore layida labelo walia halu ani bulebira.

³⁵Ani biragola i̱na i̱naga loma binigo mo miaga mbira i̱na larodagua bialu mini bilinahe helo dabarogola ibugua i̱na bilo hameledoru bibahende biai holebira. Ani bialu i̱na ibuhondo aguaneneru merogola tigua horo bibahendengi i̱naga kini dabene kagonaga wanakuini biabe bialu haabo helo.

³⁶Í̱naga aguanene homa nabi haho ngaru ti loma binigo mo miaga ogoni karia puwa muni tomo nolenebi ngi lalu hale holene wulebira. Ani bialu loma binigo mo miaga karuhondo tomo nolenenaga biabe mbira ti biamogo bialu bulene ngabe lalu hale holene wulebira, lalu Anduane Homogo ibugua ibunaga bi mana latagi haga biagoha howa bi ogoni mbiwia hene.