Read Huli 1 Samuele 24 Bible Online

1 Samuele 24 - Huli bible

1 Samuele 24

¹Solo ibu Pilidiali heba wai bialu henego íbu daibuwa hale halu hearia Debidi ibu Engedi handa de̱le̱ tayanda wiagoria ka layago hale hene.

²Hale howa Solohanda ami agali hongohe wayaliru Isaraeleni hearu tagalo migi buwa daosini tebira (3,000) haru halu Debidibi ibunaga agali biarubi tai bima ni tagira ibiragohayagi dindi ko mini Nogo Meme Gabua Haga Ege To̱le̱ laga wiagoha tai bima pene.

³Ani bialu ibu nogo sibi pabe heagoria pialu egeanda mbira hariga teneni wiagoria ubanda howa ogoniha Debidi ibunaga agali biarubi anda puwa ha do heago nahende Solo ibu egeanda ogoniha dege ti to pene. Ogoriani abene mendehayagi Debidibi ibunaga agali biarubi ti egeanda habaneha anda puwa ogorianiore ha do howa hene.

⁴Debidi agali biarume Debidihondo lalu, Ai Anduane Homogohanda í̱naga waitigi biago áyu í̱naga giha dinini helo henge ngiyadago í̱na ibuhondo bule manda bu wirigo bia, layadagua ai berene. Ani layagola Debidi ibugua hendeore ge hogarale bialu puwa Solo nahende ti talu berearia Solonaga aga luni biago mbira podo yamini.

⁵Ani biyagoyu Debidinaga bu miniha mitangi mbira tagira ibiyagome, Nakarulape biruda, manda bini.

⁶Mini ogoni tagira ibiyagola ibugua ibunaga agali biaruhondo lalu, I̱naga kini Anduane Homogohanda dabo helene kago i̱na mo tandaga naholiya Anduane Homogo ibugua i̱ haru helo hameledo. I̱na ibu mo ko hole mbira nabuleberogo ogoni irane ibu Anduane Homogohanda kini helo dabeneore ka, lene.

⁷Ani layago Debidihanda ibunaga agali biaruhondo bi ogonibi layagome Solo homelo nabole lalu bilene. Solo ibu ti tai halu tagira pialu ibuni abale pole piyagoha pene.

⁸Pialu heagola Debidi ibu nde talima tagira puwa ibuhondo olowa lalu, Kini-o, layagola Solohanda olayago hale howa ho beregedene. Ani buwa handalu hearia Debidi ibu Solo ibunaga agali timbuni daligaore ka lowa ge duli hanga ho bulu palearia hendene.

⁹Ani bu howa Debidihanda Solohondo lalu, Wali agali marume i̱na í̱ bole manda bialu ka lalu karunaga bi hale halu hariligo irane agibe.

¹⁰Ai áyu ogoni egeanda ogoniha howa Anduane Homogohanda i̱naga giha í̱ mo ya haya. I̱naga agali marume í̱ homelo ba lalu langiyagoyu i̱na í̱ daraore howa í̱ homabelo nabole laru. Ogoni irane í̱ Anduane Homogohanda kini habelo dabeneyane ani laru.

¹¹Ai i̱naga aba-o o yidogo de handa. Í̱naga aga budini mbira ogoni. I̱na í̱ boleneyagua nde abale bedoledagua í̱naga aga emene budini ogoni hangu podo yamirudagoni handa. Ani birudagome í̱la keba howa heneda lowabi bole heneda lowabi mbira manda nabibehe kegoni. I̱na í̱hondo ko mbira nabi kogoria í̱na dege i̱ bo wahole taya bialu kegoni.

¹²Anduane Homogohanda iya mendealigome ko ogo ibugua bialu ka lalu dabelo. Ibugua í̱na i̱hondo kagua bule manda bialu harigonaga pani tandaga ngilo. I̱na í̱hondo tandaga mbira ngule manda nabiore haru.

¹³Mbira ala agua lagane wiyago manda bidegoni. Ko ngubi ngaru agali ko ngubi biagame hangu biaga nga. Anigo i̱na í̱ nabolebero.

¹⁴Isaraelealinaga kini í̱na i̱ talerego agibe. Ibugua mbira talima ibaga bialu kago agidabe handadaba. I̱ biango homene alebi tede alebi i̱ kogonidago.

¹⁵Ani bialu iya mendealigome kagua bu kabago Anduane Homogohanda dabo hendelo. Í̱na i̱ mo ko nahabelo ibugua i̱ pele ngialu biamogo bia, lalu Debidihanda lene.

¹⁶Debidi ibugua bi ogoni lai heagola Solohanda lalu, I̱ igini Debidi-o ogoni henene í̱ore kebe, lene. Ani lowa ibu dugu bini.

¹⁷Ani bialu howa ibugua Debidihondo lalu, Í̱ agali bayale hegola kagua i̱na biruda. I̱na kagua uruni í̱hondo bialu hewagola í̱na i̱hondo bayale birida.

¹⁸Áyu í̱na i̱hondo í̱ bayale ogobi ko lalu i̱hondo walia haridago ogoni irane Anduane Homogohanda i̱ í̱naga gi hongoheha mo ya hayagola í̱na i̱ bo home nale waharidagoni.

¹⁹Mbiralime ibunaga waitigi minu yuwa ba nabi wahaga aibe. Í̱na i̱hondo áyu birigonaga Anduane Homogohanda í̱ mo bayale helo.

²⁰Áyu i̱na manda berogola í̱na Isaraelealinaga kini í̱ kegola dindi bibahende ngaru í̱naga andaneha ngelowa haru haho wulebere.

²¹Anigoyu Anduane Homogonaga minini howa í̱na i̱naga aguaneneru mo ko halu mbira nabulebero lalu bi áyu lo wia. Ani beregola i̱nagabi i̱ one waneigini damenerunagabi mini mo embeda nahe wiaabobo helo.

²²Ani layagola Debidihanda lalu, Henene aniore bulebero, lo wialu ladai bini. Ani lowa Solo ibu ibuni andaga dai biyagola Debidibi ibunaga agalibi ti tininaga ha do hagane biagoniha ha do hole dai bini.