Read Huli 1 Samuele 28 Bible Online

1 Samuele 28 - Huli bible

1 Samuele 28

¹Mani emene howa Pilidiali ami biaru Isaraeleali baba wai bule lowa mo mogo bu hene. Ani bu howa Agisihanda Debidihondo lalu, Í̱bi í̱naga agali karubi tí wai i̱hayagi holeberemigo ogoni manda buwaore kegoni, lene.

²Ani layagola Debidihanda ladai bialu lalu, E̱ aniore bulebero ndobe. I̱ í̱naga biabe biahaga harugo í̱nime i̱na agua berobe hondole habe, lene. Ani layagola Agisihanda lalu, Bayalego i̱na í̱ i̱naga tingini mamage haabo habelo heloliya, lene.

³Ala Samuele homayagola Isaraele wali agali bibahende mo ngoai howa ibunaga dugu biahalu hene. Ani bialu tigua ibuni dindi Lamani hora hene. Ala Solohanda wali agali maru gamugamu biagarubi halaga biagarubi homene dinini baba bi laga hearubi ti bibahendeore, Isaraele dindini naholego tagira piaiore hadaba, lene.

⁴Ani bu howa Pilidialiru ti ami mo ngoai howa Sunemu tano handa de̱le̱ wiagoriani balai anda bu hene. Ani biagola Solo ibu nde Isaraelealiru ami mo ngoai howa Hari Giliboa wiagoria balai anda bu hene.

⁵Solo ibugua Pilidiali ami hearu hondowa gi gibiore hene.

⁶Ani bu howa ibugua Anduane Homogohondo agi buabe lalu hale hene. Hale hayagola Anduane Homogohanda ladai nabi mbira emagahabi ege to̱le̱ emene kira Urimu Tumimulamebi Ngode Datagaliwabe mana latagi halu mbiwia haga hearuha howabi mbira ladai nabiore wini.[8]

⁷Ani biyagola Solohanda ibunaga haru haga hearuhondo lamialu, Wali homene dinini baba bilaga mbira taibu pudaba. Ani beremigola i̱na ibu bedaria puwa bi lolobaya, lene. Ani layagola tigua ladai bialu lalu, Dindi Endoni mbira beda, laya.

⁸Ani layago hale howa Solo ibugua kininaga aga golo ngelalu aga tara mende karula aribia halu aruma hayagola agali kira haru halu wali biago berearia hondo pene. Puwa ibugua wali biagohondo lalu, Í̱na mani ogo ale tagira ibulebira lalu agali mbira i̱na mini loleberogonaga mini dinini olalu hale habe, lene.

⁹Ani layagola wali biagome ladai bialu lalu, Tígua Kini Solohanda biyagoni manda biaiore kamigoni. Ibugua wali agali gamugamu biagarubi halaga biagarubi homene dinini baba bi laga hearubi ti bibahende Isaraele dindini nahelo lalu bo ba tagi hayagoni. Ani biyagodago irane aginaga tígua ohowa i̱ belonaga ndelo wialu ibirimibe, lene.

¹⁰Ani layagola Solohanda habo nalole lalu bi hongohe mbira lowini. Anduane Homogo haluhe kagonaga minini howa i̱na bi mbira habo nalole lalu, I̱na ogoni langerogonaga tandagabi mbira í̱ keria naibulebira, lene.

¹¹Ani layagola wali biagome hale halu lalu, I̱na ai mini lalu oloabe, lene. Solohanda ladai bialu lalu, Samuele mini ola, lene.

¹²Ani layagola wali biagome Samuele hearia hendene. Hondowa mogo lalu koaba lowa Solohondo lalu, I̱ mo hondo halu haridago irane agibe. Í̱ Kini Solooredago, lene.

¹³Kini biagome wali biagohondo lalu, Gi nahabe. Í̱na agi hendedebe, lene. Ani layagola ibugua ladai bialu lalu, I̱na homa dinini dindiha howa tagira ibiraria hendedo, lene.

¹⁴Solohanda hale halu lalu, Ibu agi handalehedabe, lene. Ani layagola wali biagome ladai bialu lalu, Ibu agali wahe mbira iraga halu ibiragoni. Ibu aga luni bia gimbubi mbirada, lene. Ani layago hale howa Solo ibu mitangi bu handalu hearia ogoni Samueleda manda buwa íbu ka manda bialu dindini bulu palu ibira hene.

¹⁵Ani biagola Samuelehanda Solohondo lalu, Irane agi bulenaga í̱na i̱ barila halu mo heya haribe, lene. Ani layagola Solohanda ibuhondo ladai bialu lalu, I̱na genda timbuniore yu kogoni. Pilidialime wai i̱ baba kaware haanda halu Ngode Datagaliwabehanda i̱ yu wahalu piyagola ko. I̱na ibu olarogola hale halu mbira emagahabi ibunaga mana latagi haga agali karuha howabi ladai nabiaga. Ani biyagola í̱na i̱ ogodagua bibe lalu langibelonaga olaru, lene.

¹⁶Samuelehanda lalu, Anduane Homogohanda í̱ yu wahalu í̱ waitigi haya. Irane aginaga i̱ olaribe.

¹⁷Anduane Homogohanda í̱hondo biyadagoni ibugua ani bule lalu í̱nihondo i̱ha howa langiyadagua biyada. Ibugua í̱na kini howa haru haga harigo mo wahalu Debidi ho aribia helolebira.

¹⁸Í̱na Anduane Homogonaga bi mo wahalu Amalegeali bibahendeore bo hilo wahalu tinaga mbirale wiarubi mo hole bu waholene wiyago nabirigo. Irane ogoninaga Anduane Homogohanda áyu í̱hondo ogonidagua biragoni.

¹⁹Ibugua í̱bi Isaraele wali agalibi minalu Pilidialiruhondo mulebira. Yawi í̱bi í̱naga iginirubi tí i̱ heba mandagi hami̱ya. Ani bidamigola Anduane Homogohanda Isaraelenaga ami agali karubi Pilidialihondo minu mulebira, lalu Samuelehanda lene.

²⁰Samuelehanda bi ogonidagua Solohondo layagonaga Solo ibu mogo gibiore lowa dindini durulo ibiraho wini. Horo ogoningi tomo mbira nane heneyagome ibu hongo nahe heneya.

²¹Ani biyagola wali biago ibu Solo wiagoria puwa handalu hearia ibu mogo gibi lo wiaria hendene. Hondowa ibugua ibuhondo lalu, Agali haguane-o í̱na bia larigodagua bialu hewaria i̱ homoleneni pu kogo hendedeni.

²²Ai áyu i̱na í̱naga biabe buahagame bibe larodagua bibelo hameledo. I̱na tomo maru nabelo dawa manda manda bia harogo. Í̱na tomo ogoni naore bulebere nalu hongoore kegola hariga polebiridago pobelo, lene.

²³Solohanda tomo biagoni nolene manga howa lalu, Tomo mbira nanolebero, lene. Ani layagola agali kira ibu heba ibiyago labomebi wali biagomebi tigua ibuhondo lalu, Harugo naore bia, lene. Ani layagola ibu odo ibiraho wiyagoni heyuwa dagiani berene.

²⁴Ani bereagola wali biagome puwa nogo bulumaga igini hungubalua haba tigile mbira heneyago abale bo dawene. Ani bialu ibugua balawa wiago maru muwa mberedi yidi ibira nahene wabu hirini.

²⁵Wali ogoni ibugua tomo uruni Solobi ibunaga agali kira biago labobi nelo manda manda biagola ti nene. Nalu ti mbiraga ogoningi dege pene.