Read Huli 1 Samuele 3 Bible Online

1 Samuele 3 - Huli bible

1 Samuele 3

¹Horo uruningi igiri Samuele ibugua Eli andaneha howa Anduane Homogonaga biabe bialu heagola Anduane Homogonaga mana lamulenebi de gandeba ale hondolenebi emene ale wini.

²Mbiraga mbirungi Eli ibunaga de au halu ngaliore biai holebiyagola ibuninaga tamu paliaganeha palene.

³Samuele ibu Balai Anda tamu hobane Habo Nalolene Bi lo winigonaga Mbogoyi hangu mo wiaga wiagoha palene. Ani biaria egabi lole dege wene lamu hale daho wiagola

⁴Anduane Homogohanda Samuele olene. Olayagola ibugua ladai bialu, Agali-o ya laro, lene.

⁵Ani lowa ibu abale heyalu Eli palearia puwa lalu, Í̱na i̱ olarigoni o íbu kogoni, lene. Ani layagola Elihanda ladai bialu lalu, I̱na í̱ onalego palue dai bia, lene. Ani laya handala Samuele ibu paliyagoha palue dai bini.

⁶Anduane Homogohanda Samuele lone halu mende olene. Igiri Samuele ibu Anduane Homogohanda olarada manda nabi henego irane ala ibuhondo bi halu mbira nalenegome ani bini. Ani buwa ibu heyalu Eli palearia puwa lalu, Í̱na i̱ olarigoni o íbu kogoni, lene. Ani layagola Eli ibugua ladai bialu lalu, I̱ igini-o i̱na í̱ onalego í̱ni paliridagoha palue dai bia, lene.

⁸Anduane Homogohanda Samuele lone halu tebone olene. Olaya handala heyalu Eli palearia puwa lalu, Í̱na i̱ olarigoni o íbu kogoni, lene. Ani layagola Elihanda manda bialu hearia ogoni Anduane Homogohanda igiri Samueleore olayada manda bini.

⁹Ani manda buwa ibugua Samuelehondo lalu, Palirigoha palue dai bia. Ani beregola ibugua í̱ lone olayagua í̱na agua labe. Anduane Homogo-o í̱naga biabe biahaga i̱ hale ho kogo bi langi labe, lene. Ani laya handala Samuele ibuni paliyagoha palue dai bini.

¹⁰Ani biaria Anduane Homogo o biagoria ibuwa ibugua abale olayadagua, Samuele-o Samuele-o lalu, olene. Ani olayagola Samuelehanda ladai bialu lalu, Í̱naga biabe biahaga i̱ hale ho kogonigo bi langi, lene.

¹¹Ani layagola Anduane Homogohanda ibuhondo lalu, Horo mbirungi i̱na mbirale mbira Isaraele wali agalihondo buleberogo ogoni hiriribiorego bibahendeme ogoni hale howa mogo lowa duru lolebira.

¹²Horo ogoningi i̱na Eli damenehondo bule lalu ala lo wirugoriani howa bibahende bialu bu maro bulebero.

¹³I̱na ibu dameneru ti pani miaho wule lalu Elihondo abale lamirugoni. Ogoni irane ibu igini biagolabo libugua i̱ mege bialu ko taraore i̱hondo biyago Eli ibu manda biai ho howa dege ibugua nabidababe lalu lamia nabiyagome ani bulebero.

¹⁴Ani buleberogo i̱na bi ogo hongohe Eli damenehondo lalu mbirale i̱hondo ngiragomebi bo delararumebi ko ogoni biyaru nadomoleorebira lamirugoni, lalu lene.

¹⁵Olayadaruni Samuele ibu tamuha paliaho wiane dege egabi laya handala heyalu puwa Anduane Homogonaga anda panga duguini. Duguwa de gandeba handayago ogodagua handaru lalu Elihondo puwa lamulenego ibu gi hene.

¹⁶Ani bu hearia Elihanda ibu olowa, I̱naga igini Samuele-o, lene. Ani layagola Samuelehanda ladai bialu, Agali-o ya ebero, lene.

¹⁷Ani ladai biyagola Elihanda hale halu lalu, Anduane Homogohanda í̱hondo bi agi langiyabe. O langiyadaruni mbira i̱hondo ya do nahabe. Ibugua í̱hondo langiyaru damene bibahendeore i̱hondo nalangiriyagua Ngode Datagaliwabehanda í̱ pani gibiore ngulebira, lene.

¹⁸Ani layagola Samuelehanda ibuhondo lamiyagoni mbira ibuni hangunaga ya do nahe bibahendeore lamiai hene. Ani biagola Elihanda lalu, Ibu Anduane Homogo kago ibunime bayale bulene ngaru bulebira, lene.

¹⁹Samuele ibu Anduane Homogola ho anda hadaga halu ibugua mbirale bibahende bulebira lalu lamiyaruni henene laya walia halu Anduane Homogohanda mo lola hai hene.

²⁰Ani biyago hondowa Isaraele wali agali dindi gimbuni mbirahayagi howabi mendehayagi howabi bibahende henedarume Samuele ibu Anduane Homogonaga mana latagi haga mbira ka manda biaiore ho hene.

²¹Anduane Homogo ibu Silo dindini Samuele hearia ibu ala ho pani halu bi lamiyagoriani ibuni mo walia halu haabo hene. Samuelehanda bi mbira Isaraele wali agali lamiyagola ti bibahendeme hale hai hene.