Read Iban Pemungkal 1 Bible Online

Pemungkal 1 - Iban bible

Pemungkal 1

¹Ba pun iya kelia,[1] lebuh Allah Taala berengkah ngaga[2] langit enggau dunya,

²dunya endang apin bisi bakal tauka gamal sereta nadai utai nguan. Semina[3] ribut ti deras ari Allah Taala[4] aja ti bepuput atas tasik ti agi petang.

³ Allah Taala lalu bejaku, “Awakka penampak pegari.” Penampak lalu pegari.

⁴Allah Taala meda penampak nya manah; lalu Iya nyeraraka penampak nya ari pemetang.

⁵Iya ngumbai penampak nya “Siang” lalu pemetang nya dikumbai Iya “Malam.” Lemai abis lalu pagi pen datai. Nya hari ti keterubah.[5]

⁶ Lalu ku Allah Taala bejaku, “Awakka kebung pegari kena nyeraraka ai ti di atas ari ai ti di baruh.

⁷Nya alai Allah Taala ngaga kebung nya lalu nyeraraka ai ti di baruh kebung nya ari ai ti ari atas kebung nya. Utai nya lalu nyadi.

⁸Iya ngumbai kebung nya “Langit.” Lemai abis lalu pagi pen datai. Nya hari ti kedua.

⁹Udah nya Allah Taala bejaku, “Awakka ai ti di baruh langit begelumu ba siti endur, ngambika tanah pegari.” Utai nya lalu nyadi.

¹⁰Iya ngumbai tanah “Darat,” lalu ai ti begelumu dikumbai Iya “Tasik.” Lalu Allah Taala meda utai nya manah.

¹¹Udah nya Iya bejaku, “Awakka tanah mansutka semua macham utai ti tumbuh: utai ti mansutka leka, enggau semua macham kayu ti mansutka buah ti bisi leka.” Utai nya lalu nyadi.

¹²Nya alai, tanah mansutka semua macham utai ti tumbuh, lalu Allah Taala meda utai nya manah.

¹³Lemai abis lalu pagi pen datai. Nya hari ti ketiga.

¹⁴Udah nya Allah Taala bejaku, “Awakka mayuh macham penampak pegari di langit, kena nyeraraka siang ari malam, enggau kena nunjukka maya hari, taun enggau maya gawai pengarap[6] belabuh.

¹⁵Sida deka manchar di langit lalu meri penampak ngagai dunya.” Utai nya lalu nyadi.

¹⁶Nya alai Allah Taala ngaga dua igi penampak ti besai, iya nya mata hari ti bekuasa lebuh siang hari, enggau bulan ti bekuasa lebuh malam hari. Iya mega ngaga bintang.

¹⁷Iya ngengkahka semua penampak nya di langit, ngambika sida manchar ngagai dunya,

¹⁸bekuasa lebuh siang enggau lebuh malam hari, sereta nyeraraka penampak ari pemetang. Lalu Allah Taala meda utai nya manah.

¹⁹Lemai abis lalu pagi pen datai. Nya hari ti keempat.

²⁰Udah nya Allah Taala bejaku, “Awakka ai penuh laban semua bansa utai ti idup, lalu awakka burung terebai di langit.”

²¹Nya alai Allah Taala ngaga jelu ti besai sereta nyelai di tasik, semua bansa utai ti idup dalam ai, enggau semua bansa burung. Lalu Allah Taala meda utai nya manah.

²²Iya merekatka semua sida, lalu ngasuh utai ti idup dalam ai beranak betelesak, lalu ngemenuhka tasik. Iya mega ngasuh burung beranak betelesak di dunya.

²³Lemai abis lalu pagi pen datai. Nya hari ti kelima.

²⁴Udah nya Allah Taala bejaku, “Awakka dunya mansutka semua bansa jelu ti idup: jelu tupi, jelu babas, enggau jelu ti ngerayap.” Utai nya lalu nyadi.

²⁵Nya alai Allah Taala ngaga semua bansa jelu, lalu Iya meda semua utai nya manah magang.

²⁶ Udah nya Allah Taala bejaku, “Aram Kitai ngaga mensia[7] neladan gamal Kitai Empu, baka gamal Kitai Empu; lalu awakka sida bekuasa atas ikan, burung, enggau semua jelu di dunya tu,[8] enggau semua utai ti ngerayap ba tanah.”

²⁷ Nya alai Allah Taala ngaga mensia[9] neladan gamal Iya Empu; Iya ngaga sida[10] lelaki enggau indu.

²⁸Allah Taala merekatka sida, lalu bejaku ngagai sida, “Beranak betelesak lalu ngemenuhka dunya meh kita sereta bekuasa atas iya; perintah meh ikan, burung, enggau semua utai ti idup di dunya.”

²⁹Ku Allah Taala bejaku, “Aku meri kita semua macham leka utai enggau semua macham buah nyadika pemakai kita;

³⁰lalu ke semua bansa jelu babas ti di dunya, enggau ke semua bansa burung, Aku meri sida rumput enggau utai ti bisi daun nyadika pemakai sida.” Utai nya lalu nyadi.

³¹Allah Taala meda semua utai ti udah digaga Iya manah magang. Lemai abis lalu pagi pen datai. Nya hari ti keenam.